雖然已經轉場去 Patreon 同 Podcast，絕大多數嘅長文都唔再公開發表；但好似呢個題目，相信 Patreon 嘅支持者都會希望多啲朋友一齊討論（我諗）：
如果你支持我寫作：
https://www.patreon.com/LeeSimon
＝ ＝ ＝ ＝ 我是分隔線 ＝ ＝ ＝ ＝
一，美國嘅傳統基金會，點解要將香港從世界經濟自由指數 DQ？陳茂波又點解要寫信去華爾街日報投訴？
二，其實，人哋承認你係一國，唔通你可以話認咩？再講，人哋只係一個境外嘅非政府民間組織，堂堂一個特區政府財政司司長，去信傳統基金會嘅 media partner 投訴，表面上睇來於禮不合。錯晒。
三，過去四份一世紀，傳統基金會同加拿大 Fraser Institute 都分別評香港做世界最自由嘅經濟體；由港英到特區，好非常咁重視呢個第一位嘅排名，點解呢？
四，正所謂：「面就人哋畀。」舊年香港失去咗排名第一位，其實已經好肉酸。又點會估到傳統基金會，今年勇武到直頭將香港同澳門 DQ？講開又講，呢個經濟自由指數，台灣都榜上有名，而且都唔算排得好低。呢個一中一台嘅玩法，其實夠晒位畀戰狼發爛渣，但目前佢哋好似相對克制，點解？
五，但睇真啲就會發現，全世界咁多排名，香港政府特別重視呢個經濟自由指數。政府其實一直都有人跟進編制呢個指數嘅兩間機構；甚至以董建華為首嘅香港明天更好基金，多年來都會派人去 Washington DC 做民間外交，定期拜訪當地哋自由經濟智庫；唔通呢個政府，對自由市場真係咁神心？
六，1995年佛利民提出經濟自由排名，最主要嘅用意係：what get measured get managed。佢老人家嘅諗法係，你整個排名，啲人咪會去爭個第一囉。但咁多年後我睇返轉頭，呢個自由經濟指數，真係好似為香港度身訂造咁。1997 主權移交之前，自由經濟指數其實係一個好高段數嘅方法向中共講： the world is watching。另一方面，將香港評為世界最自由經濟體，其實都係畀中共有個機會去同全世界人講：成功落實一國兩制。唔好忘記，就算最嚴格嘅定義裡面，兩制所指嘅資本主義制度，簡單直接去理解，就係經濟自由。
七，佛利民一直心繫香港。2006年佢老人家臨終前，最後一篇評論文章，就係華爾街日報刊登嘅：Hong Kong Wrong。我仲好記得，篇文一開首就好灰咁講：It had to happen. Hong Kong's policy of "positive noninterventionism" was too good to last.
八，香港終於畀傳統基金會 DQ，我見到有啲人話：「咁樣仲好，以後唔需要就住就住，特區政府可以全面干預。」早幾日南華早報見到有位年青學者，更加形容呢次畀人 DQ is a gift that will keep on giving。
九，每個人都有表達意見嘅自由，所以其他人嘅觀點，我都費事評論。但陳茂波代表特區政府嘅回應，似乎話畀我哋知：「話唔定，特區政府仍然好在意外界點睇一國兩制。」當然，我唔知北京點睇；更唔知道特區政府係唔係代表緊北京嘅睇法，甚至乎所謂嘅北京，係唔係只有一派睇法。
十，兩個經濟自由指數，其實都係「百鳥歸巢」嘅複合指數；即係話，裡面用嘅數據，其實全部都係由其他機構去搜集編制，係公開嘅資訊。至於指數裡面唔同成份嘅比重，亦都係公開嘅資訊。即係話，經濟自由指數，係 open source；又即係話，傳統基金會 DQ 香港，其實唔緊要，政府理論上可以叫好似團結香港基金咁嘅組織，用返同樣嘅方法，同樣嘅數據，做一個出來囉。兩、三個研究院嘅學生，三幾個星期功夫，應該就交貨。
十一，都係個句：「面，係人哋畀㗎。」一國兩制呢場戲，究竟做畀邊個睇？做畀香港人睇？定係做畀全世界人睇？華爾街日報嘅回應，都已經好直接打面：「好心你哋班人就唔好再自己呃自己啦。」
十二，之前特區政府好似話想請公關去處理國際形象；我唔知結果有冇人肯接呢單 Job。其實，公關又好，Spin 又好，Propaganda 又好，任何傳訊工作，其實分三個層次：
十三，最低水平係 inform：「話咗你知！」特區政府嘅傳訊功夫，就係停留呢個「講咗當做咗」水平。
十四，高一個層次係 influence，又或者所謂嘅 propaganda 。過去，香港都有例子，政府可以成功影響到群眾嘅思想行為；又或者當年社會民智未開喇。成功嘅 propaganda，除咗可以令群眾知道乜嘢係應該做，乜嘢係唔應該做，仲要深信不疑呢啲價值，甚至主動周圍去同人講。
十五，最高段數嘅溝通，係 inspire；有意思嘅溝通，應該係有來有往，互通有無。溝通嘅目標，唔係去 inspire 人哋，而係 inspire 自己。Be inspired，大前提係人家畀反應嘅時候，你係唔係願意虛心反省。永遠都只係諗住講說話畀人聽，一味想改變其他人嘅人，往往就係最 uninspiring 嘅對手。
十六，1995年嘅時候，點解世界咁多人相信香港可以延續過去賴以成功嘅制度？當時點解有人肯相信中共？十幾年前，佛利民話 It had to happen，究竟所指嘅係啲乜嘢？十幾年後嘅今日，又係乜嘢原因令人家咁 blunt 咁叫你面對現實？世界除咗自己嘅主觀願望，人哋都有自己嘅睇法；你有權話香港係一國兩制，但人家都有權唔為你抬轎。傳統基金會 DQ 香港，講到尾，其實就係唔想再畀人利用。
＝ ＝ ＝ ＝ 我是分隔線 ＝ ＝ ＝ ＝
另外嘅新嘗試，就係 Podcast：
Apple Podcast - http://apple.co/3loKmNR
Spotify - http://spoti.fi/2OYvV7l
AnchorFM - https://anchor.fm/simoncf
六度分隔理論定義 在 微職人Gogoldtalk - 什麼是六度分隔理論🎯數學是這樣解釋的 ... 的推薦與評價
什麼是六度分隔理論 數學是這樣解釋的 隨著社群網路的發展，人與人的距離更近了 你最想透過六度分隔理論和誰聯繫呢？ 鄧巴數｜人類社交的最大極限根據英國牛津大學 ... ... <看更多>