《讀者投稿》
第一次投稿，因為實在抑壓太耐，所以可能有少少長......多謝呢個平台可以俾我抒發一下。
同退休老爺同住，佢一直係一個好污糟邋遢、又唔注意個人衛生、又懶到出汁、又唔聽人講野、死要面但又唔係醒既人。所以奶奶都因為咁頂唔順而搬左出去住。冇人同佢傾計，所以佢更加變本加厲，長期活起自己世界入面，嬲曬全村人咁，成日覺得全世界錯曬，欠左佢咁，得佢岩曬......
佢成日去完廁所都唔洗手。
我同老公反映過，老公都呆左話應該唔會既，但佢都照聽我話去同個老豆講叫佢記得洗手。但條友擺明冇聽啦，有一次我終於頂唔順，趁老公返工時同佢講：「而家d病毒好勁，去完廁所記得一定要洗手。」佢一向都撞聾，竟然聽錯係我冇洗手......我已經反白眼，再講：「我係話你記得去完廁所要洗手，呢排疫情嚴重最好注意下個人衛生。」雖然我內心十九幾萬句粗口，但我依然保持禮貌微笑住咁講。
丫！但點知佢竟然發惡話：「拿！我平時煮飯前一定有洗手既！但去完廁所，對手再掂其他野，咁其他野都污糟架啦！」癡線！都唔知咩logic黎！即係佢認為自己對手非常乾淨，反而係其他物件整污糟佢對手啦！
我忍唔住再講：「咁你都識講其他野係污糟，咁你唔洗手去掂，果d野咪會更加污糟囉！」我已經忍住未講埋佢平時日日淨係識攤起梳化度，咩家務都唔做！又唔抺野，所以至會多塵污糟咋嘛！我同老公要返工，我平時放工返黎要吸塵拖地，都係要星期六日至有時間大清潔！我係個有少少潔癖既人，所以見到阿老爺咁污糟真係好崩潰！
跟住條友已經ignore曬我所有說話，再話：「既然嫌我唔衛生，聽日開始就分開煮啦！咁你唔怕唔乾淨啦！」
我話：「我都係想大家都注重下衛生，去完廁所要洗手係好基本姐。」
但當然佢完全無理會我既說話，淨係一味話其他物件會攪污糟佢對手......又話自己煮野來來去去都係果幾味架喇，唔岩食咪自己煮囉！
雖然條友煮野係超hea，但我都已經無所謂，諗住佢肯煮就算啦，都係務求填飽個肚姐。
老公一向係孝順仔黎，但呢次佢都頂唔順，叫我唔洗理阿老爺，仲話以後等佢煮仲好（因為老公煮野食岩我胃口好多）。夜晚老公返黎，條友即刻同個仔講：「聽日開始我唔煮你地飯喇，有人嫌我污糟啊！」我老公淨係「哦」一聲就算XD 見老公都冇盲撐個老豆，我個心都舒服番d。
頭先講到阿老爺煮野超hea，點hea法？永遠淨係買現剩外賣，蒸野，煮野永遠唔落配料，冇薑冇蔥冇蒜，因為懶得切同懶得洗鑊。我成日都覺得佢d蒸排骨唔熟架喇，有乜理由d肉咁粉紅色？！所以有一次我特登望住佢蒸幾耐。大大碟排骨，聽到佢蒸左10分鐘都冇就熄火，我拿拿臨衝入廚房問佢蒸左幾耐，佢仲懶巴閉咁話：「蒸左好耐喇！10幾分鐘都有！」我話：「下？！你7:20至放入去，而家7:30都未夠喎......」隨即即刻開爐再蒸。但我一行開，佢又熄火！我呢次乜都冇講，再㩒著個火就算！但見到佢嘴瞄瞄咁好不滿話點會唔熟丫......
同埋佢預餸既份量永遠勁奇怪......有好多次三個大人淨係食一兜仔一人份量既蕃茄牛肉......有一次我因為放工已經好攰好肚餓，見到果兜仔蕃茄真係爭d想喊.....老公都忍唔住話：「其實呢兜仔點夠三個人食呢...下次可以煮多樣。」條友竟然反駁話煮多d咪盞食剩！老公話：「你試下煮多d睇下食唔食得曬丫，大家都係見咁少至唔敢夾餸咋。」
成日都懶到唔買餸，要我同老公放工買埋俾佢煮，仲要話好多野都唔識煮，好多時要老公教埋佢同埋要老公親自出手......
仲有一次佢話老公因為冇覆佢食幾多隻雞翼，所以淨係得一碟菜心......大佬...幾多隻雞翼...而家配給咩...仲有，如果工作太忙冇覆你，你咪煮第二樣囉...但佢完全唔覺係自己問題，淨係覺得係我老公錯。
點都好，而家由老公出手煮，我終於有啖好...而阿老爺就更加懶，一次過煮曬一星期份量既餸，每日淨係無限翻蒸再翻蒸兜餸......
＃我的極品四大長老
蒸排骨要幾多分鐘 在 家常便飯之蒜蓉豆豉蒸排骨 - Facebook 的推薦與評價
【製作方法】 1. 將 排骨 洗淨及印乾 2. 加入豆豉、蒜蓉、砂糖、老抽、蠔油及生粉拌 ... ... <看更多>