新年都唔準時出糧嘅公司，唔值得留戀。
樂視唔係第一次出現喺《辦公室日報》，因為我有一位好好嘅朋友喺裡面任職，所以身同感受，我要恭喜佢終於下定決心離開，導火線係2月遲咗半個月出糧。
關於樂視遲出糧，員工其實都慣晒，因為公司總會喺勞工法例訂明嘅7日內支薪，我只係有一個疑問，如果信用卡同貸款遲找數要罰息，咁點解遲出糧唔使計息？銀行同財仔可以有7日免息？
首先唔好攻擊樂視員工，亦唔好話佢哋奴性好重之類，如果你曾經喺呢類公司工作過，你一定會明白佢哋感受------「一間衰公司，總會孕育出一班感情好好嘅同事」，所以佢哋遲出糧都留低，一定有自己嘅原因，當中包含對呢個行業嘅興趣，甚至係手足之間嘅一啲承諾。
之所以咁清楚，因為我曾經喺一間執咗笠嘅報館工作，我本新書嘅「作者介紹」有講。（咁都要植入sell自己本書）
既然慣咗，又滲入咁多感情，點解我朋友忽然下定決心走呢？因為今個月過年，而公司竟然遲咗十幾日出糧，其實2月都係得28日咋。
樂視，總部喺北京，紅底，乜唔係最清楚中國人最重視過年㗎咩？如果連農曆新年都係咁，呢間公司真係冇得救。
最可悲係樂視嘅員工去勞工處求助嗰陣，竟然要排隊輪候個幾鐘，因為香港仲有其他公司都係遲出糧，所以勞工處好多人......
呢個社會愈嚟愈畸形，好多人覺得有汗出、冇糧出係好合理，甚至覺得佢畀緊機會你，唔好話打工，我平時接廣告都遇過，明明係2018年，但就想將個經濟推返去石器時代以物易物一樣。
不如大家以後唔收取任何報酬工作好唔好？你畀兩張戲飛我，我幫你作文做圖出廣告Post，咁月底你唔好出糧喇，去領取食物代替人工，以後唔使交租唔使還Loan，拎啲報紙、月餅罐去抵償。
想向呢啲無良老闆或者食免費午餐嘅人講：「冇錢唔係罪，但唔好搞咁多嘢，執柒咗佢啦！」
PS: 呢幅圖我唔知出處，唯有保留水印。
勞工法例7日出糧 在 HR 識法勞工法例僱傭條例 - Facebook 的推薦與評價
【HR識法】【老闆唔出糧繼唔繼續返工？】 【熟悉勞工法例，保障公司或個人權益】... ... 假設一間公司工資期為1月1日至1月31日，僱主必須在2月7日或之前依時支付工資。 ... <看更多>