《廢老慫恿譚德塞告陶傑》
睇國家領導人嘅fb（左圖），有時真係忍唔住笑。
早幾日佢叫警方告香港電台誹謗，尋日又叫譚德塞告陶傑誹謗...佢真係以為「誹謗」等於小學雞向老師告同學隻手伸過界？
我想問下國家領導人，之前自己大鑼大鼓話要告議員梁繼昌誹謗、又告專欄作家鍾劍華誹謗、又聲稱要告「天下為公」嘅林卓廷誹謗...點解冇曬下文？
689自己有姿勢冇實際（學人哋鄭經翰謝偉俊嗰單誹謗咁打到終審吖笨），依家周圍煽風點火挑撥離間，叫人告呢個告嗰個，完全只係想隔岸觀火嘅搞屎棍。
須知只有當事人自己，先有權判斷人哋係咪誹謗，旁觀者不得依牙鬆槓。
帶大家睇下近年比較出名嘅case：
曾志偉告「模特兒教母」韓穎華誹謗、專欄作家李兆富告葉劉淑儀誹謗、林建岳告「電競搞手」鍾培生誹謗、葉劉淑儀告鄭經翰袁彌明誹謗... 有邊單最終真係上法庭打官司？
漢基國際學校家長告陳茂波夫婦誹謗案，拖咗十年八年都未分勝負，法官判詞指「案件無明顯輸贏」，即係邊個有一千幾百萬閒錢就可以繼續玩。
法律行內對於呢種官司有句術語："Let sleeping dogs lie" ，意思係隻狗瞓咗就唔好搞佢，大家側側膊就算。
不過香港嗰隻狗，唯恐天下不亂，一日到黑亂吠...
李懂媽
