【英國佬都唔洗施政報告】
「以前英國佬都好衰，點解啲香港人重咁懷念？」
衰得黎，做得到，重要做得好
我好怕聽到厘句嘢，因為講嗰啲根本唔識乜嘢係真正嘅「管治」藝術。不如大家試下用今天嘅「前輩」或者有識之士嘅角度，去講英國佬有幾「衰」。大家又討論下，現今世界各地政府（咪只講香港咁狹隘），可以做到幾多，學到幾多？當年無施政報告，但係影響力到今日！
66年天星、67年反英暴動之前係點，講都悶（又要講埋點解大逃亡）。要講就係67年之後，港英政府（稱之為英國佬）真係「搞研究」，就係研究點樣「管」同「治」厘班好分裂嘅左有共產黨，右有國民黨，中有非常窮嘅香港人。講社會分裂，當年就真係同依家無得比！
所謂衣食足而知榮辱，英國佬先係興建大量公屋，比一大班窮華人「有瓦遮頭」。有得住喎！唔迫人要買喎！感激都黎唔切啦。之後又搞什麼「香港節」，再推動香港經濟（真係話推又推到嘅呢？！）。結果係點，香港咪開始有中產，香港嘅中產特色係乜，睇黎今日都無變。然後就出現華人富商，既得利益者。
大家又記下，無線電視、香港小姐之如此類嘅娛樂，係邊個年份出現？有得住，有機會，有娛樂，請問重有無心機再去反政府？
唔講大家都知，當年嗰啲「暴徒」，唔係放晒番台灣（五幾年暴動嗰堆）同大陸（好聽啲叫遞解出境），留低嘅就係判到經經地。結果思想最極端嘅走晒，留低嘅怨氣加唔到幾多。之後再加什麼社團同集會條例，唔好話外來壓力抑制，想再黎都無力啦。鐘意嘈嘅可以去集會，大家有無見過香港有裝到多過五百人嘅廣場呢？公園係可以嘅。不過所有公園到今天都係有圍欄，有乜事就拉閘放狗。今日嘅「人流管制」措施，其實都唔知係同邊個學嘅呢？
要啲年青人唔「搞事」，用晒啲心力去玩咪得囉。市政局主辦「新潮舞會」，不過响卜公碼頭的露天花園。即係一條路出入，目的如何好易明白。從而引人歐美流行曲，用軟實力進行「洗腦」。六、七十年代歐美樂壇信嘅係自由，Make Love Not War！
覺得歧視同有階級咩，將所有華人嘅公職或公務員嘅職級限制提高，同工同酬。要留意係提高，並唔係取消喎。貪污，的確係影響所有嘅經濟、生活、穩定，結果就狠狠地成立ICAC，乜人都唔聽，只係聽從港督一個。要拉嘅拉晒，留低嘅就高薪養廉，同時又做就另一班中產。
最後要安頓嘅安頓晒，要提升嘅提升咗，要洗腦嘅洗完。75年英女皇訪港，軟實力洗腦之終極，中國人基因最愛：「皇恩浩蕩」！大家上網睇下當年英女皇就咁受「愛戴」，原因就係當年港英政府同英國殖民地部用咗8年「搞掂」香港與及香港人。完全沒有施政報告，亦無乜乜會議。
我唔識分辨「英國佬」當年係衰還是好，但係至少就係「維穩」到中英聯合聲名之後回歸前嘅某一年。
#英國佬係衰
#衰到做得到
