《8年嚟…我都無砌呢盒高達…等我話你知點解》
呢篇文…其實講少少人生嘢嘅，
太細個睇未必明、太大個睇會覺得經歷過…
你會唔會係「啱啱好」嗰個？
好，講返盒模型先…
前幾星期，個人無無聊聊…
忽然有返「砌模型」嘅念頭。
正想去買嘅時候，先記得係櫃頂…
根本有一部好值得砌嘅高達－RG Freedom Gundam。
佢其實…已經陪咗我8年，
但點解…我依然無砌佢呢？
我爬上櫃頂拎佢落嚟，為佢拍拍身上嘅塵埃。
諗咗好耐，
終於記得呢8年嚟，點解一次一次咁放棄。
1. 『也許正正因為它是高GRADE的貨色吧？』
模型有分Grade，所謂RG就是「Real Grade」，其實都唔係好高級。但比一般HG(High Grade) 高級少少。
正因為高級，所以唔砌？
無錯…正正係咁。
人類係咁㗎啦，好易覺得「自己配唔起」。
一部低Grade模型，平到幾廿蚊盒，咪是但砌咗佢囉…唔講究，衰咗都唔可惜。
但去到RG，你覺得應該要滲線、噴油、打磨、拋光…等等等等。
咁多「等等等等」，你自然就會一等再等…
等咩？
等自己技術夠、工具夠，覺得「配得起」嘅時候，先開工砌。
呢部RG就好似一個「機會」咁，
但你對自己有懷疑…於是久久未有打開。
就好似好多朋友/異性，其實你想搵返佢哋，但又覺得自己係好多方面未Ready…
你想等自己Ready好晒，有啲成就，先行出第一步。
可惜「機會」同「對象」唔似呢盒模型，唔會等你8年。
於是…
我們都喜歡等待時機，直至再無機會。
＝＝＝＝＝＝＝＝＝＝
2.『沉迷一個世界，對長大了的我們而言很恐怖』
咪係囉…好驚㗎。
我已經好沉迷返工嘅世界、沉迷加班嘅世界、被逼沉迷投資嘅世界…
一個人嘅時間有限；
一個並非生於大富之家嘅人，時間更有限。
當進入社會去到一段時間，你就好怕自己會浪費時間。
其實好多世界你都有興趣，
好多「搵唔到食」嘅領域你都想沉迷。
但你好怕，快樂完，就追唔上通漲。
見住一班「人到三十」嘅老死們，
每次踢波、唱K、畫畫、齊人打機，都一定會狂Share相上Group。
你替佢哋開心，同時傷心。
因為…為一件事影相，只有一個可能性。
就係…「罕有」。
大家都將「內心最愛」由一個世界，變成一個旅行，得閒先去。
而家…
唔得閒都唔砌模型啦？係咪。
但細個嘅時候，
我係因為砌模型而唔得閒㗎。
＝＝＝＝＝＝＝＝＝＝
3. 『其實…它並不屬於我的。』
無錯，呢部高達唔係我買嘅。
係親友買嚟送畀人，而「嗰個人」亦都唔係我。
咁點解又會喺我度？
詳情我都無問，總之就係某啲理由無送到出去，又知我鍾意高達，
輾轉之間覺得「唔好嘥」，咪落入我手囉。
一年又一年過去，親友都無問我攞返…
我明白，呢部高達即使本身有主人，呢一刻都係無主孤魂。
曾經有兩次…甚至三次，都諗住拆開佢、砌咗佢。
但往往內心會制止自己…
覺得「始終…呢盒高達本身係屬於其他人。」
就係咁…8年過去。
但今晚，我拆開咗佢。
原因好簡單…可能到咗呢個年紀，我已經充分明白到…
「好多自己可以擁有嘅嘢，本身都唔係屬於自己。」
好多人、好多事嘅First Choice都絕對唔係自己。
得到一樣嘢嘅原因，
對比起「因為係你」，
更多係「因為你咁啱喺度；佢咁啱見到。」
自身能力有啲關係嘅，但緣份佔大多數。
於是，我都無咁計較，
對所有事，都唔執著過去同歷史。
反正，今日大家撞到，行同一條路，咁咪得囉？
呢部RG Freedom Gundam，無諗過會嚟咗我度，我知道。
但呢度對佢而言，都唔太差（有好多部沙漠高達陪佢。）
今日嘅我…依然無技術、無工具，但同時覺得，自己已經無時間…無時間再等好多嘢。
於是…我好簡單地，
拎起線筆同模型鉗，將佢據為己有。
或者都等我為呢篇文，做個小總結。其實唔太關事，但純粹突然諗到。
就係：
如果你都有好珍重嘅人，早啲搵佢。
唔係嘅話，可能會畀人砌咗好多次。
==========
為甚麼稱之為《注定沒有Like的文章系列》？
有5個原因。
原因1：因為這系列的內容不跟潮流
原因2：圖中的一句，不會刻意譁眾取寵
原因3：寫作時隨心，不計較長度，不計算太多
原因4：我覺得現在網絡上太少這種文章(不跟潮流、不譁眾取寵、不計算)
.
.
原因5：為系列起了這個名字，也許你就願意花少少時間看了。
謝謝你真的看完了。
IG: cheungson88
https://www.instagram.com/cheungson88/
你的一下Follow，我的無上成就
