以下分析並不代表林作本人立場，僅供參考，因太多人想研究林作。重點係，本人真係免疫於所謂負面新聞，百毒不侵 （多謝 Nick Wong嘅詳細分析）：
//林作好聰明，一次又一次咁展示比我哋睇乜嘢係"Succès de scandale （sucess from scandal)" ，又或者更多人聽過嘅 "there is no such thing as bad publicity"。
其實林作好知道佢自己嘅長處同短處喺邊度：佢一定係一個聰明、有EQ、有邏輯、同有一定工作能力嘅人，呢個從佢咁多年嘅學術背景同埋公眾新聞入面可以證明到；但係同時，佢的確唔係一個樣貌俊、可以令人輕易喜歡上嘅一個（公眾）人物。對佢嚟講，用一般方法嘅話，佢花好多氣力都未必可以入屋或者受廣大嘅人認識（都唔好話愛戴）。但係正正係咁，佢先可以立於一個不敗之地：運用負面新聞去為自己做新聞，而唔多受影響。
佢之所以可以免疫負面新聞帶嚟嘅影響，其實都要多謝大家對佢嘅言行咁「支持」。其實佢選區議會嘅時候佢仍然只係一個講說話好務實嘅人，當年亦無好多出位嘅言行，公開講嘢無而家個種 #LamChok勢 。當年麥明詩當選港姐，大家見佢參選就當娛樂新聞咁睇。而大部分人睇娛樂新聞都係鍾意評頭品足，呢啲反而就令佢更加清悉佢自己嘅定位，佢知道自己如果要令公眾認識，要做一個公眾人物嘅時候，佢應該要行條乜嘢路。
根據之前一個不知名嘅港女study，喺香港啲囡囡寧願揀個揸巴士（2分）嘅都唔揀保險佬（1分）。保險佬本身就一世都無可能可以好似醫生律師ibanker呢啲可以有顯赫身份嘅職業，亦正正係咁所以nothing to lose🤷♂️ 所以，所有做保險做得最叻團隊過百嘅人，佢哋成功都有一個共同嘅方法，就係大大大方方、大大聲聲咁話俾人聽自己做保險。因為，如果平均每一百個記得你嘅陌生人入面，會有一個人同你做生意嘅話，你令到一百萬個人認識你，你就會有10000單生意。林作越出名，越有人記得，佢就會越多生意。你覺得佢會唔識sell or 唔識睇保險內容？我成日同我啲學生講，如果保險考試係一個連毅進都合乎資格同可以考畢合格嘅考試，你覺得有無可能一個讀哈羅公學，Oxford 讀數學同哲學，擁有PCLL資格嘅人會唔識計數、唔識理解保險條款、同唔識persuade 你？所以佢會爆人爆數爆case number我一啲都唔驚訝。因為佢正正就係複製緊啱啱睇過好多保險公司agency director嘅成功方程式。
你話係咪所有人都可以用嘅方法呢？如果你係許志安或者黃心穎呢啲本來有好多正面印象嘅人嘅話，行錯一步就好易一沉到底。但係如果你係好似Coffee 咁本來係nobody 或者係無任何正面信息嘅話，去一次殘廁都可以令你一飛沖天。//
