《迷離短篇》出軌得到原諒 | 兼職女友 | 今晚屋企冇人 | Dse 邂逅
第二回，睇完記得 follow 埋 ig（echoofheart）呀。
＝＝＝＝＝＝＝＝＝＝
《出軌得到原諒》
「妳真係肯原諒我？明明……我做咗咁過份嘅事。」
「咁你話晒都肯自己認錯，而且都係飲醉咗先會出事……阿善又係我好姐妹……總之，我考慮咗幾晚之後，決定畀多次機會你。」小娟溫柔咁講。
「太好喇，咁我下一站落車即刻嚟搵妳！」
收線嘅時候我真係鬆一口氣。因為我係真心愛小娟，嗰晚只係衰衝動抵受唔住誘惑。係男人就會明白，食得多西餐都會厭，厭就會想試下新野。
而且，小娟嘅家底係堅雄厚，如果因為一次做錯就失去所有嘢，我將來肯定係會後悔死。
一諗到自己咁好彩，就即刻忍唔住笑出聲。而正好喺呢個時候，坐我對面一臉鬍鬚嘅男人亦都傾完電話。
「Yes！太好喇……八婆，講到底你咪又係冇咗我唔得。」
換轉係平時我應該唔會亂咁同人傾計，但呢刻心情實在太好，所以一下心血來潮就問：
「兄弟，成功箍煲？」
「你又知……唔通你又係？」
「唔係咁啱嘛……」
「哈哈哈……」
傾到中途，突然又有另一個男人走埋嚟插嘴。
「原來你兩個都係……我老婆啱啱又係原諒咗我！」
「嘩，簡直係大奇蹟日啊！」鬍鬚男笑到見眼唔見牙。
但我就再笑唔出，因為成件事實在橋到令我開始不安起嚟。而正好喺呢個時候，又有另一個人走過嚟──係阿善。
我到而家，仍然忘記唔到佢一邊除衫一邊爬向我嘅嗰一幕。
「點解妳會喺度？」我問，雖然係回味，但其實都驚會俾其他熟人撞見我哋又起埋一齊。
「我都唔知……」佢一臉驚慌，「我一醒就喺隔離車廂，然後，我收到小娟嘅訊息……」佢將電話遞畀我睇。
【出軌之後，我就會原諒你。】
「吓？」我不解。
──下一站尖沙嘴……Next station Tsim Sha Tsui……
但大約五秒之後，我就會知道答案。
然後，就再沒有然後。
＝＝＝＝＝2️⃣＝＝＝＝＝
《兼職女友》
【十萬蚊連拍三日拖，包攬同錫，Sex就額外加錢，今次係最後喇，一於咁話啦。】
起初朋友話妳瞞住我去做兼職女友，我都係一笑置之，直到有晚妳沖涼嗰陣，無意中俾我撞見呢個訊息通知。
當刻我冇選擇攤牌，而係詐唔知……因為始終驚係誤會，萬一處理得唔好大家心中有條刺就麻煩。
考慮咗一晚之後，我決定請幾日假偷偷跟住妳……頭兩日都冇事發生，係去到第三日，終於俾我見到妳出去旺角同另一個男人見面，仲要一嚟就主動拖住對方隻手，臉上甜蜜嘅笑容係我從未見過。
我當場理智崩潰，趁住你哋入後巷食煙嘅時候衝過去大嗌：「估唔到妳真係出去做PTGF！妳對唔對得我住？」
「你……」妳聽完好慌張，「你誤會晒啦！」
「誤會？拖晒手都有得誤會？妳唔好話佢係妳阿哥吖！？」
「唔係，但我真係唔知點解釋……」妳向旁邊嘅男人打眼色求助，「喂……幫下手喇……呢單嘢你都有份搞出嚟㗎。」
男人收到之後一臉從容咁走上嚟。
「你係咪想打呀！？」我擺出攻擊姿勢，「我唔驚你㗎！」
「點會想打你呢？話晒你都係大客……我只係想你『清醒』下。」
一聽到「清醒」呢兩個字，我突然感到頭昏腦脹。而男人就趁呢個機會抽出一枝針，毫不留情咁直插入我條頸……
「喂，你做咩呀！？」妳尖叫一聲。
「咪幫緊妳囉！一陣扮佢係飲醉，我哋嗌的士帶佢返公司……」
「我一早就話唔應該繼續做呢條友生意！」妳埋怨咁講：「好喇，佢上晒癮玩到開始精神錯亂，分唔清現實定虛構喇！」
「小姐，佢咁闊綽畀得起錢，更係要賺喇！」男人回應。
「辛苦嗰個又唔係你！條友啲性癖真係好難頂㗎！」
我越聽越唔明，眼皮開始越嚟越重，最後完全失去意識。
*
一個月前。
「點解我哋公司嘅兼職女友會咁出名呢？因為我哋有獨門秘訣，」男人邊解釋邊展示佢身旁嘅頭罩，「完全代入裝置，除咗可以令你忘記對方係兼職女友嘅身份……仲可以加埋你安排嘅背景設定，等你完全當佢係你嘅真實女友咁。」
「係咪……設定咩都得？」我急不及待咁問。
「冇錯，可以係青梅竹馬、可以係中學同學、可以係分手完復合、亦可以係師生或者兄妹呢類禁忌之戀……」
「我諗到喇……一於設定佢做兼職女友。」
「即係？」男人皺起眉。
「佢會成日背住我出去接生意，我會懷疑，然後發現，但最後又會原諒佢……嘿……嘿嘿……一諗到有其他男人都佔有緊佢……我就越諗越興奮……」
男人應該注意到我講嘅時候褲襠越脹越大。但佢做得呢行，應該早就對變態癖好見怪不怪吧。
「冇問題，咁就請你戴上頭罩……十分鐘之後，兼職女友就會開始為你服務。」
＝＝＝＝＝＝＝＝＝＝
《今晚屋企冇人》
「我今晚屋企冇人呀，你上唔上嚟？」
一收到呢女朋友呢個訊息，我真係忍唔住喺條大街直接「Yeah」一聲大嗌出嚟。
明明拍咗拖差唔多成年，但我哋就一次關係都冇發生過。每次佢唔係話身體唔舒服，就話唔想我晒錢租酒店。
終於俾我等到呢日，斷估冇理由上到去係齋睇netflix。所以，我覆完訊息後，即刻衝去最近嘅便利店買好套，去到女友屋企門口嘅時候全身已經慶烚烚……
點知應門嘅居然係伯母，當刻真係好似成盤冷水淋落頭咁。
「玟玟佢煮緊飯。」伯母開門嘅時候講。
「唔係話冇人咩？」我一入到廚房，即刻用輕鬆嘅語氣問女友。
「我都唔想。」女友無奈咁講。
既然有人，就應該即刻send返短訊叫我唔好上嚟喇。我本來想咁回應，但見佢心情都好似麻麻就算數。
結果，本以為嘅魚水之歡突然變成毫無準備咁見家長。呢晚我當然俾伯父伯母不斷問長問短，真係差在未問我祖墳係咩位置，簡直痛苦過以前考口試。
捱咗兩個鐘，我終於諗到個藉口走人……
「我要返去帶隻狗散步……」
「一日半日冇嘢嘅，放心喇，我哋唔會阻到你同玟玟。」伯父講。
「唔係幾好嘅，隻狗呀，一唔帶佢散步就會係咁嗌嘈到鄰居……」
「咁我幫你叫佢冷靜喇。」伯母一講完，即刻起身飄去門口穿出走廊。
なに！？What the fuck！？
「我都話咗屋企冇人……」沉默咗好耐嘅女友喺呢刻終於開聲。
伯父聽完之後對我露出一個意味深長嘅笑容，然後全身開始慢慢腐化，漸漸變成骷髏骨頭最後化成煙消失……
下一刻，我開始感到喉嚨有異樣，就好似有一堆蟲喺度蠕動咁。佢哋一直爬一直爬，慢慢蔓延到全身，我痛苦到攤喺地下……勉強抬起頭，只見女友露出一個狂熱嘅笑容……
「今晚……都唔會係例外。」
＝＝＝＝＝＝＝＝＝＝
《DSE 邂逅》
我同妳嘅第一次見面，係喺某校嘅試場外面。
當時，妳著住一身藍色旗袍，坐喺小食部嘅一角垂低頭默默咁背書，有地方唔記得咗嘅時候，妳總會先撇一撇瀏海，再拎起Notes望一眼，最後露出恍然大悟嘅可愛表情。
而我就企喺幾米以外，睇得入迷。
記得可以入場嘅時候，突然有怪風吹走妳嘅Notes，我見大好機會第一時間走去幫妳執返，交返畀妳嘅時候，妳腼腆嘅一句「唔該」，瞬間將我腦海裡面所有微積分嘅記憶一掃而空。
接著，我哋失散喺人群之中。本來我打算用盡最大嘅努力，極速考完然後喺試場外面等妳出現。點會諗到，妳居然咁啱就坐咗喺我左手邊。
呢一切，大概就係緣份。
妳大概都係咁諗吧？
所以喺應考嘅時候，我哋先會不時互相對望。即使戴著口罩，我都睇得出妳一直甜絲絲咁笑。
終於，妳緩緩舉起右手，原先我仲驚訝妳居然答得仲快過我……
「我要投訴，個男仔一直喺度偷睇我！」
估唔到，妳居然咁同監考員講。
「ＷＴＦ？」
結果，我一樣係喺試場外面等妳出現，但當然係帶住另一種心情，因為我係俾人趕出去。
「妳點解要咁做！？」到妳終於出現，我即刻忍唔住問。
「因為……」當時妳嘅臉珠微微泛紅，尷尷尬尬咁講：
「我唔希望我嘅男朋友叻過我。」
我嘅一生，就係由呢次邂逅開始，注定俾妳食硬。
＝＝＝＝＝＝＝＝＝＝＝
鍾意就記得畀個 like 同幫手分享下！
IG：echoofheart
更多足本短篇歡迎訂閱 Patreon：
https://www.patreon.com/echoofheart
