喺炎熱而抑鬱嘅星期一，我已經唔再有Monday Blues，因為正式投身廢青大軍，長期放假兼去旅行。
有冇發覺每當同人講起放假，通常第一個問題一定係：去邊度旅行？
其實外國有嘅嘢香港未必冇，點解放假一定要去旅行？我諗其中一個原因，就係因為香港嘅生活節奏太急促，壓迫到大家就算唔使七點鐘起身迫港鐵再直踩十幾粒鐘，只係單單喺呢個城市吃喝呼吸都覺得辛苦。
奈何香港嘅勞工假唔多，於是精於計算嘅香港人就將師奶假呢樣嘢發揚光大，即係將大假斬件楔落啲紅日度，務求只需要請三兩日假就可以去到一個短途旅行。
香港人拎住呢幾日得來不易嘅師奶假，硬係怕執輸行頭慘過敗家，於是將啲行程排到滿過喇沙仔啲補習班，結果成個假期只有打卡同碌卡，返到香港仲攰過平時朝九晚八。
要遠離呢種窒息嘅生活，唔應該單單靠每年嗰十幾日大假，生活從來唔止返工放工等月尾嗰份人工。
香港人轉工嘅考慮往往就係人工跳咗幾多個Point，而人生嘅Checkpoint就空白一片，就算終於肯跳出Comfort Zone興起辭職嘅念頭，都硬係要工接工，唔搵到Offer就賴死唔走。
外國有人會選擇安排Gap Year，或者係返一排工之後畀自己Break下享受人生，所謂享受，唔係好似紂王咁酒池肉林有靚女搣提子餵你食，可能係純粹花時間專注喺自己嘅興趣，甚至乎咩都唔好做，只係慢慢食飯，慢慢走路。
我唔知道而家呢種每日淨係睇書睇戲做運動嘅生活仲可以過幾耐，但係我發覺原來一個人需要嘅嘢真係唔多。
頭盔：但由於有時太得閒，而且每月都要畀家用還學費，各路朋友如果有Projects或Jobs可以考慮下我，等我呢個悠長假期可以繼續延長落去。
香港人生活節奏急促原因 在 香港快餐及美食廣場關注組 - Facebook 的推薦與評價
香港人生活節奏急促 ，所以在快餐店及Food Court用餐，已是一種常態。 ... 票後送餐、甚至是行這模式的熟食中心，只要不是太離題的，還是有斟情空間，原因還是旨在弘揚 ... <看更多>