百萬富翁殺機版（上）
2101年，一條繁華嘅街道上，突然間，有個人停下腳步，瞓咗喺地下。
人羣圍上嚟，只見佢睜大眼睛，胡言亂語：「答案係33......呢題我唔識、唔記得......唔好！」
佢嘅聲音同呼吸愈嚟愈微弱，面都青埋。
無人幫佢叫救護車，因為救護車已經嚟緊。
喺呢個年代，每人體內都植入咗晶片，唔止可以定位、驗證身份、付款，當身體出現突發情況，都會即刻通知醫院。
可惜，科技救唔到每一條生命，喺救護車嚟到之前，佢已經窒息死亡。
同一日，同樣嘅事件，喺世界各地不斷發生。
死者身份無任何共通點，有男有女，上至九十老翁，下至三歲細路，有人喺眾目睽睽下死去，有人喺屋企死咗。
只有一點，所有人都係窒息，甚至有時救護車趕得切幫佢戴呼吸機，都依然救唔番。
呢件事引起全球恐慌，每個人都好驚，彷彿下一秒死嘅就係自己。
兩日後，真相揭露。
一個戴住粗框眼鏡，個樣好似書呆子嘅男學生，成為窒息事件嘅第一個倖存者。
喺全球嘅關注下，佢講出佢嘅體驗。
佢溫緊書，突然覺得自己抖氣有啲辛苦，然後腦裡響起一把聲：「歡迎參與『百萬富翁殺機版』，你有五分鐘時間，回答50條問題，只要答啱35條，就可以獲得保險線金額：生存！」
據男學生所講，把聲問嘅問題唔算太深，大部份都係佢學過嘅嘢，只係偶爾有幾條陌生嘅題目。
「最大嘅問題，唔係『問題』本身，而係一路答，窒息嘅感覺愈嚟愈嚴重，個腦開始郁唔到......」
男學生繼續講：「好彩我呢排準備考公開試，啲嘢溫到好熟。」
記者面面相覷，答問題？答啱就唔駛死？
好快，第二、第三個倖存者出現，印證咗男學生講嘅說話。
同樣係要答啱35題，只係問題有啲唔同，例如係地盤工人，就有地盤相關嘅問題。
各國政府聯手，搵晒啲倖存者，統計佢哋收到嘅問題，大約得出結論：
50題內，有20題係讀書時學嘅嘢，20題同工作有關，仲有10題係隨機，天文地理歷史咩都有。
如果係學生，就會40題都係讀書題。
換句話講，當中有40題係我哋學過、應該識嘅嘢，要答啱35題係可以做到，甚至連幼稚園學生都有機會成功。
真正嘅難度，在於窒息嘅恐懼，抖唔到氣，好想快啲答完，愈心急就愈諗唔到答案。
目前為止，仲未搵到「百萬富翁殺機版」係點樣嚟、點樣令人窒息、點樣揀到適合每個人嘅題目。
唯一值得慶幸嘅係，倖存者似乎唔會再被考多一次，即係每人只會面臨一次危機。
全球掀起溫書熱潮，為咗保命，早就還番畀老師嘅數學公式，都要搵番出嚟反覆背誦，各種「求生補習班」紛紛湧現。
各國政府都出晒公告，叫大家冷靜應對。
但係，無論做咗幾多準備，真正死到臨頭，有幾多人可以靜心答題？
「百萬富翁殺機版」死亡率，依然高達九成。
順住敵人嘅思路行落去，只會邁向滅亡。
要贏，就要諗方法破局。
我係一個特工，上頭落咗命令，要我哋儘快解決呢件事。
每個特工都各展神通，有人反覆研究失敗者嘅屍體，有人不斷搵倖存者收集更多細節。
呢段時間裡面，都有啲特工遇上「百萬富翁殺機版」，佢哋訓練有素，槍林彈雨中仍可保持冷靜，通通都順利過關。
而我，仲未經歷呢場考驗。
有一日，我上司搵我，提出一個諗法。
根據資料，「百萬富翁」係一個一百年前嘅節目，答錯咗，會得到保險線嘅獎金；答啱晒，會得到一百萬嘅終極獎金。
「百萬富翁殺機版」嘅保險線，係生存，咁終極獎金係乜嘢？
我一臉迷茫：「我唔知啊，未有人可以答啱晒50題，咁有10題係隨機題，都無學過，點會識？」
「而且，抖唔到氣嗰陣，見到陌生嘅隨機題，大家都會『飛咗佢』，唔會花時間諗答案。」
上司話鋒一轉：「既然無人試過，咁你嘅任務就係：答啱50題。」
靠住各國收集番嚟嘅問題庫，我了解咗隨機題嘅模式，然後收集資料，努力溫書，仲要練習自己喺瀕臨窒息狀態下嘅反應。
呢段時間，死亡人數一直上升。
我焦急，但係我咩都未做到。
終於有一日，我喺街食緊飯，突然間透唔到氣，腦海裡響起一把聲：「歡迎參與『百萬富翁殺機版』......」
身邊嘅食客見到我嘅神情，都知道我面臨挑戰，紛紛叫我「加油」。
下集：https://bit.ly/33sVull
將專頁設定為「搶先看」/ "See first"，最新故仔馬上睇！
女友原來無失蹤：https://goo.gl/nqQQXn
我嘅職業係：地府法官：https://bit.ly/3c7mGIC
#短故 #短篇 #小說 #陳美濤 #廣東話 #粵語 #tomatochan #百萬富翁殺機版
面面相覷粵音 在 覷粵音點讀 的推薦與評價
有邊讀邊，無邊讀中間？一直咁讀原來係讀錯? 廣東話讀音隨時考起人，一於齊齊努力，學好正音。覷/ceoi3/ 音「翠」詞例/意思：偷看、看； 面面相覷 、 ... ... <看更多>