關於 阿 仙 奴 亞洲 球員 ，我們在網路上蒐集到這些相關的討論、資訊與評價

好記得佢喺遊戲入面，速度數值最高去到95
轉自 @華拉堤踢法似我
====================================
《球迷世界》已經開設Patreon平台，依家加入仲可享迎新優惠，希望大家繼續支持我哋炮製高汁節目！

加入我們：https://www.patreon.com/footballfansworld

［歐超聯夭折！］講咗兩日就收工。嘻，大師都算冇點你。

TLDR：股價嘅嘢，多數冇死錯人。拜仁漢尼斯路明尼加嘅嘢，更加冇死錯人。

1. 真係極長，又亂，但，我當然係反對歐超聯嘅。現行嘅玩法固然唔多理想，亦有好多矛盾解決唔到，但歐超聯容許AC米蘭之類（得罪了）嘅球會去永續，本身已經十分搞笑。況且，歐超聯全無代表性，既不歐洲（三個國家），亦不超級（AC米蘭，well）．現實亦明顯唔會過到政治法律等等關口。

＝＝＝＝＝＝＝＝＝＝＝＝＝＝
2. 2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費80，半年已1600人訂！ 畀年費仲有85折
＝＝＝＝＝＝＝＝＝＝＝＝＝＝

3. 傳說中嘅「歐超聯」，講咗唔夠兩日，應該就可以收檔。6間英超會又話唔玩（可憐啲跟車太貼嘅球迷點面對其他球迷？），咁即係搞唔成啦。米蘭馬德里雙城記咩。

4. 在講落去之前，不忘貼返舊文（即係早兩日）講嘅嘢：

5. 「歐洲足協國際足協必然反制，禁晒你啲會踢國內聯賽，球員冇得踢歐國盃世界盃。你班武夫不過係帝王家屋簷前嘅堂前燕。12間球會因為冇錢要急於另起爐灶，就正暴露咗佢地冇錢，worst case 嘅，攬炒，可以燒幾耐？拜仁PSG似乎押注呢一邊」

6. 基本上你好快就會見到拜仁慕尼黑嘅漢尼斯路明尼加出嚟拎光環了，係咪好嘔心呢，不過佢地慣架啦。但真係，老奸巨滑嘛。

7. 呢啲，就係政治啦。冇錯，12間球會有嘅係錢（主要係收入，你講盈利其實冇乜），另外有水喉JP Morgan射住—但JP Morgan 同你非親非故，有事仲唔第一個走？

8. 固然，你見好多名宿，同埋球迷，都係反對嘅。但不得不十分cynic咁講句，不見得係因為你地反對就撤回。祖雲達斯嘅Agnelli （歐超聯推手之一）講得有道理的：扯，當年推歐聯，你班友咪又係反對。我覺得啱的，佢霸王硬上弓，我就唔覺得你班友真係杯葛唔睇。講真球迷多數都冇乜風骨，點會杯葛自己間會？將件事針對落某啲人就得。至於名宿云云，更加得罪講句，可以不理，影響力低過啲港女KOL。

9. 球員呢？如果佢地夠醒嘅，應該反對歐聯超（下面會解），因為歐超聯其中一個對付嘅，就係啲球員薪水不停升身價不停升。當然球員未必諗到咁多，而實務上梗係唔出聲，唔好伸個頭出嚟，同埋，有經理人搞掂啦。

10. 所以講到尾，最大阻力，一如所料係嚟自歐洲足協。歐洲足協國際足協最大嘅武器，始終係法律。大把嘢玩，除咗上面講，封殺你班球員唔畀你踢國內聯賽，唔畀你睇歐國盃世界盃（有球迷話：冇呢堆球星嘅世界盃邊有人睇）外，仲有大把嘢可以玩。例如有冇諗過，12間球會準備學NBA NHL咁推集體談判 salary cap，擺明係違反競爭法（下面慢慢解）。仲有你啲球員合約點計？好似早初冇話畀你自己搞一個嚟踢喎，咁你12間會堆球員，合約全部作廢，可以自由身走喎。仲有，你呢12間會，點簽人？你好多球員合約都要當地足協去ratify。何況，足協呢啲嘢，全部都有當地政府支持，法國政府固然稱讚球會唔入歐超聯，但連英國首相都出嚟反歐超聯的。

11. 不過而家事後講返，真係拎嚟出歐洲研究通識卷都得。背後折視咗好多好多嘅矛盾。原本想寫，但未寫呢個歐超聯已收皮。歐超聯未必係個好嘅解決方案，但即使歐超聯收皮，呢啲矛盾多數都仲存在。

12. 首先係，歐超聯先天已經不足，唔夠多人支持。唔止係講球迷同名宿，而係其他會。我見有個評論話，歐超聯既不歐洲，亦不超級。三個國家咋喎，有幾歐洲？仲要加埋AC米蘭呢啲全無戰績又唔見得有錢嘅球會，而上屆歐聯冠亞軍 拜仁慕尼黑 PSG 都冇份嘅，有幾超級？ 唔好睇少呢樣嘢，你見最初咩G14又好，ECA又好，個代表性都大好多。而家你得12間會出嚟，兩回事。

13. 亦都扯到去足協腐敗呢部份。呢個係支持歐超聯嘅人（主要係球迷，12會就唔會講呢啲嘢，雖然大家心照）講嘅嘢，甚至話「歐足協食咗好多」（我唔知佢條數點計，實際上係好多去咗小國）。要講嘅係，足協固然好多貪污嘢。但歐超聯嘅重點不在此：難聽啲講句，你12會班友之前咪又係一齊搵食。仲有，如果真係針對歐足協體制或班友嘅，點解唔係齊齊咁多國搞個新嘅東西？而係三國小圈子？所以講到尾，都係為飛起啲小國啫。

14. 呢度帶到第三個問題。就係大會唔想同其他會分。無論係本土聯賽定歐洲賽，大會認為大家只係想睇皇馬對曼城，唔係史篤城對巴塞甚至史篤城對杜爾堡。點解要分畀你地？有人話會審美疲勞，個個星期都皇馬對曼城仲有乜好睇，我估就未必，你見NBA都年年係嗰啲隊打N咁多次，咪又咁多人睇。所以重點都係大會唔想分錢。

15. 之後再帶到又一個問題：大會點解咁莫財。短因固然因為係疫情，但大家都知球會差不多全部都唔會點賺到錢。講過了，全球最高收入嘅巴塞，放埋去全球最高收入嘅公司（蘋果）比，收入係人地0.5%都冇，更加唔好講盈利。而你計咩「市值」，應該冇一間球會可以大過300億港紙市值（FYI：有上市嘅曼聯，而家係200億），即係，冇一間大過一間維他奶（正係300億市值）。亦因為，根本冇一間收入多過維他奶。球會係一門被高估嘅生意。

16. 然後到另一個問題：球員薪水。固然存在即合理，但球員薪水不停升，正係球會永遠賺唔到錢嘅原因。死局嚟的：因為仲要有啲土豪（呢個又另一個課題），例如PSG當然要用高人工搶人，你唔去跟埋一份自然就唔夠踢。大家軍備競賽。而歐超聯點解決呢個問題？基本上就係好似NBA NFL 咁，封閉系統，集體（聯盟）同你傾—咁就唔再有咩轉會費呀之類，亦都會有類似薪酬上限嘅嘢。

17. 再帶去一個問題：歐聯位。呢個亦係本人最反對嘅位。由於以上講嘅嘢，球會收入已經唔多，又要高薪搶人—但一個唔該簽著啲水貨（自己填名），錢又洗咗歐聯位又冇，就好大件事的。一個唔該搞到降班仲大鑊。呢個正係好多球會想避免嘅嘢。

18. 呢個你由歐超聯嘅制度就見到（亦係我最反對嘅位）：呢堆創會會員，係唔會降班唔會走嘅，永續阿仙奴熱刺。你話每年各國最好成績嘅入呢個歐超聯我都仲信服，而家呢堆會係永遠唔會走嘅，有冇搞錯？固然你阿仙奴熱刺有相當嘅收入（倫敦球迷有錢嘛，加上國際上多球迷），直接啲講我英超冇前四啫，但我去德甲法甲踢實有（有啩），咁做乜唔英超多幾個位先？呢部份我覺得都講得通—但，大佬，AC米蘭（得罪了）何德何能？佢地收入在意甲都前列，薪水更加畀得高（所以咪負債），但踢意甲都冇歐聯位，然後而家出嚟霸住個永續位？居然好意思？

19. 記住，歐超聯嘅重點，就係免除呢啲不確定性。大會唔會降班唔會冇歐聯。我見之前有評論講，啲美國佬覺得，下，乜你歐洲咁低能嘅？我地美國冇呢啲嘢架。點解要降班點解咁多不確定性。

20. 正因為咁，你見到歐超聯一話搞，星期一晚祖雲達斯同曼聯嘅股價即時狂升！年年有確定嘅收入喎！投資者最鍾意。（順手講埋，星期二晚啲股價即插，然後就話退出了，你話冇insider trading？）

21. 於是好多球迷會話，足球好睇正係因為有呢啲不確定性，有李斯特城捧盃呢啲神話。我覺得一半半啦，咁你見NBA亦係咁多人睇啫。

22. 亦都再深一層，去到歐洲（包埋英國）同美國嘅文化唔同。呢部份就最詭異，同大家想像唔到，在體育層面，美國十分社會主義，歐洲先係資本主義。咪講咗咯，美國嘅玩法係大聯盟，限制薪水，保障球會。歐洲唔係喎，有得暴富有神話，但亦可能豪門失手。今次歐超聯風波，美資擁有嘅球會，係大推手。出錢嘅亦係美資銀行。（而AC米蘭亦都變咗美資）

23. 最最最後，最廢，但都係要反思：足球是甚麼。其實都隨時代而變，唔係中二病，但如果四五十歲嘅，其實最有資格評論（我都略為後生）。因為剛好見證咗足球「商業化」嘅年代，甚至係「商業化」由盛轉衰（即係而家）。你睇英超聯，歐聯，都係九十年代嘅產物。背後多得全球化，新自由主義（包括波士文案，否則球員人工點會咁升？），亞洲中產堀起等等。而家又走到另一個轉角位了。

24. 真的，啲名宿之類，象徵係上一代嘅價值觀，「足球屬於社區」（應該好多人想笑）。我地年代嘅，一半一半，大家（在鬼佬眼中）都係glory hunting rich Asian，你去幾多次曼市馬德里同埋啲鬼一齊屌對家，都改變唔到呢種印象。但再新一代嘅，可能只係視呢啲嘢係娛樂，有得睇咪得咯，嘈乜？NBA都係咁睇啦，又係喎

25. 我見有啲講法，講到底球會係屬於球迷丫，定係搵錢工具一盤生意。咁呢啲二分法多數冇乜答案，但不如又諗下，NBA都係一盤生意啫，但又不見得脫離晒球迷丫，啲友都睇好開心架喎

26. 結論？都係冇乜結論，點解一定要有個結論？背後係太複雜，大家有唔同價值觀。不過剛夭折嘅歐超聯我就必定唔BUY（創會球會永續呢樣嘢實在好難接受，況且又冇代表性，得三個國家）。

27. 我個人覺得啦，而家成個生態，已經夠晒偏袒大會。你咩祖雲達斯跌到落意乙都話咁快彈返上嚟，曼聯利物浦之前冇歐聯，但因為底子好，亦係話咁快返返前列。拜仁PSG嗰啲在聯賽已經玩晒（但啲友話悶嘅，我又反擊你：你睇啲入場入數一路升喎），仲要不停去保護大會？似乎說不過去。

28. 真正嘅弔詭位，真係在熱刺阿仙奴之類。金錢有，如果飛去德甲法甲踢，前四應冇問題添。難免唔順超，因為佢地實力應該高過好多其他歐聯分組賽嘅球會。係咪分得太少位畀英超呢？

29. 歐洲足協近N年嘅方針，都似乎係關顧細國。呢個同國際政治都有啲似，「一人一票嘛，梗係拉攏啲非洲兄弟」。你話再要偏返向啲大會，都冇話唔得。但冒住畀人屌嘅風險我都講：不如踢多啲歐洲賽咯，大家happy．你話球員好累，我又真係有啲懷疑係咪克服唔到：輪換咯，你大會咁多錢，搵副選踢都夠照啦。

＝＝＝＝＝＝＝＝＝＝＝＝＝＝
2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費80，半年已1600人訂！ 畀年費仲有85折
＝＝＝＝＝＝＝＝＝＝＝＝＝＝

［英超停擺，球會輸幾錢？］唔算多圖，但兩個圖好重要，睇medium啦

1. 作為睇國家隊多過球會，睇歐聯多過德甲（更甭講英超）嘅鍵盤球迷，除咗「幾時有返波睇」外，我就只係關心好實際嘅問題：數字。所以以下嘅分析評論，絶不涉及任何個人感情或道德判斷。

2. 點解要睇數字？like it or not，多得全球化，亞洲中產（即係你同我）冒起，電視廣播，仲有歐聯，波士文等等，歐洲足球產業已經係一門極大嘅生意。同你接唔接受，鍾唔鍾意已經無關。唔鍾意嘅，去睇第四五級別嘅地區聯賽，搵返你嘅足球社區感覺。

3. 我認為金錢，對足球嘅影響，就算唔係完全正面，都係中性偏正。否則我一句同你講細細個我楊屋道同老豆睇完波，在酒樓仲見到顧錦輝隔離枱食飯，就可以講，拿，呢啲先係社區呀，就可以否定晒新一代而家啲足球體驗。但現實係大家選擇咗億萬富豪踢波娛樂班窮撚（你同我）嘛

4. 講遠咗少少。想講金錢係足球極其重要嘅一部份，而家肺炎疫情停擺，當然你會問有幾大影響。而可以話你知，你量化到個影響，知道影響有幾大，邊啲球會影響最大，你就知道會有乜發生。腰唔腰斬？閉唔閉門？減唔減人工？你冇數嘅，講乜都係鬥大聲，或者鬥價值觀，鬥得閒。你寫一萬字講足球唔係生意，佢寫一萬字講球員搵百萬鎊周薪唔係生意係乜，浪費大家時間。攤開睇，睇到數字，你咪知會點。

5. 以下講英超，而英超嘅財政已經比較健康（同意甲或西甲比應係）。其實我差不多係照搬著名 足球財經博客 Swiss Ramble嘅東西　（https://bit.ly/3cgEVLh）。如果你識英文又有心機嘅，大可以自己睇，繞過我。圖我都係用佢嘅。我建議你開個推特去科勞佢，提升下自己嘅水平，咁我呢啲中介人就唔使存在。我已經send咗email希望佢畀我用佢嘅圖，暫時未有回覆，如果佢話唔得，就當然成篇文下架。

6. 言歸正傳，先睇，就當然係疫情對球會收入嘅影響。當然佢有提到，好多數字都唔準，只係上季。但英雄所見略同啦，有大約嘅數字，好過你空口講白話吹水。未必好準，但唔會爭太多。

7. 首先明白，英超雖然係最富有（＊）嘅聯賽，但入面嘅分野都仲好大。20間會收入52億（英鎊，下同），但所謂嘅迫悉匙，六大會，已經佔咗30億，六成。剩返22億其他14間分。亦都所以，影響都好唔同。

8. 最富有嘅曼聯，一年收入6億3 ，最窮嘅諾域治，1億3左右（估計，因為升班，之前啲數唔肯定），相差5倍。而迫悉匙最窮嘅阿仙奴（估唔到呢！），近4億。去到第7嘅韋斯咸，1億9—畀你見到迫悉匙同其他嘅分野幾咁大。

9. 一句，如果踢唔完球季，有幾大影響？答案係，好撚大。英超主席Richard Masters提過，話損失係11億—留意呢種損失好實際，唔係咩「企業因為員工返公司屙屎每年損失幾多」之類。好實際，咪就係你樓上見到，英超球會嘅收入，會冇咗幾多。作者自己計都係計到差不多，證明英超主席啲數口都幾好（或者根本係同一班人計）。11億即係幾多？相對於52億。冇咗兩成收入咯。作者畀埋個碧丹你，比賽日收入1億2，電視轉播7億6，商業收入2億5。加埋11億損失

10. 睇到呢度，其實都唔使再睇落去。你就知道，必撚然係要繼續完成賽季（否則會冇咗20%收入）。驚感染？就當然係閉門。閉門當然你會近乎冇晒門票收入，但，殘忍嘅真相嚟啦—現場嘅球迷，係唔多值錢嘅—你估你張飛真係好貴咩。何況好多係高價買，都唔係落球會袋。你見比賽日收入真係事少，必要時連商業收入都可以犧牲埋，但電視轉播係命根，命根，命根。老死都要踢埋佢，老死都要播！冇現場就冇現場。冇球迷打氣冇意思？戇居，除非你畀6倍價錢入場，或者買返十件八件大蝦三文治。

11. 亦都可以再解多次，歐洲球會，基本上全部都係三種收入來源：比賽日（門票季票食熱狗都可能計），電視廣播（本土加全世界），商業（贊助，合作，賣波衫賣頸巾，留意賣波衫並唔太好賺，咪撚以為你一千銀買波衫有九百蚊去咗球會度）。電視廣播一般成個聯賽咁去傾，入面點分就自己傾掂佢，英超應該係比較大鑊飯，人人差不多，西甲嗰啲就真係強隊立好多。盃賽應該另計，所以你見無線當年會播德國盃又有埋德國國家隊，因為呢兩味係德國足總，但德甲係另一檔。

12. 至於咩買賣球員，唔好打太多機。冇錯都係球會一部份，但唔計落去恒常收入，係non operating items．仲有歐聯獎金之類，唔同地方唔同人有唔同分法，但一般不計入上面呢三類。當然不代表不重要。但絶大多數隊係冇歐聯踢嘅，所以有係錦上添花。

13. 樓上個圖你睇到收入碧丹，比賽日收入，係最唔重要嘅！冇一隊波超過三成，好多都十幾巴仙，甚至單位數。總數先佔13%。而中下游球會差不多一定係電視轉播佔最多（講過，英超相對大鑊飯）。大會就有時係商業收入佔得多啲。但總之，比賽日收入，係最唔重要嘅。社乜鬼區丫，而家咁嘅售價，啲當地球迷已叫救命係咁鬧，何況你班Asian好多仲係幾倍價錢入場。

14. 樓上講咗總損失11億（20%總收入），但亦話過你知，唔同球會收入水平唔同，收入結構亦唔同。呢11億當然唔係平均咁損失，但又不代表損失最多嘅最到肉（霍建寧收少200萬同你收少100萬係兩回事）。計金額曼城曼聯損失過億，利物浦都近1億，但，霍建寧嘛。

15. 上面呢個表，就係每隊損失幾多，同埋即係，會少咗百份幾多嘅收入。有幾傷。咁大約都估到了，既然樓上有提，損失金額最多係轉播，而又話過你知，中小型會好靠轉播，就梗係中小型會仆街啦。迫悉匙嘅，講緊唔夠20%—好似就只係呢六隊唔夠20%。其他就去到三成都有。拉勻晒，就係成個聯賽收入冇20%

16. 入面啲細數，我唔再一一細講。例如話比賽日收入損失1.2億點計？咪計返之前一場收入平均幾多，然後睇下仲有幾多場未踢咁，分析員101啦。當然要玩牛角尖嘅你計埋對邊隊都得嘅，你剩返六場都對迫悉匙，收入咪多過六場太公波—但呢度又要講judgement啦—反正門票收入都唔多，就唔好花呢啲時間lun．要快定要準？咁梗係自己拎個trade off，就係呢啲判斷最難學嘛。你鍾意逐場run regression計埋溫度估啲人飲幾多啤酒都仲得架，但why bother？

17. 重要嘅講幾次，廣播很重要—所以根本係啲海外球迷養英超，英國人覺得難受都要講，如果只諗本土嘅就死咗十世，你睇意甲？英超轉播收入，佔總收入60%，玩晒的。最極端係般尼茅夫，88%，即係冇電視佢執笠。13間會都佔超過7成 — 亦差不多所有迫悉匙以外嘅會。

18. 至於話電視廣播冇7億6，點計？其實都係計冇30%總廣播收入。而你見大約都係大鑊飯，隊隊都分咁多 — 好景時咪對細會好，但而家齊齊減差不多嘅數，細會就好大鑊。

19. 再講一次，睇到呢度，都唔使點討論。電視廣播佔咗英超總收入60%，重中之重，所以寧願閉門都一定要踢埋佢，或者去新加坡或邊度踢埋佢。否則電視台唔找尾數就死得。

20. 呀仲有，歐聯收入。「其實唔使點計」。利物浦熱刺出咗局啦，車路士基本上都出咗局（作者話的，唔係我話），係曼城仲有關係。

21. 商業收入，作者話頭，其實最難估。因為透明度低，咩terms唔知，有冇保險唔知，有冇不可抗力條款唔知，甚至分分鐘贊助你嗰間都執埋笠（你估啲航空公司執笠先定球會執笠先呢？）。但我見有個畸屎，法甲嘅，酒店集團Accor（題外話：呢間啲啲sales煩撚過煩精），贊助PSG。講到明，如果腰斬嘅，唔畀錢。但如果復賽嘅，仲會照畀。咁你又睇到，點解點都要復賽。

22. 講咗咁多，只係講收入呢方面。下篇講開支，但其實結論都好簡單，如果復賽嘅，球會而家可能唔使減薪，減咗都可以加返。但如果賽季收皮唔復賽，邊撚度變錢出嚟？球會最大開支就係球員人工。你冇咗一大截收入，唔郁球員，郁邊個？所以你話送球員去死都好（但，屌，你自己咪又係星期六去長洲去西貢），但我估復賽，六七月快手搞掂埋佢，閉門又好，去新加坡又好，點都踢晒佢。電視廣播肯找數，贊助商肯找數，球星減少少人工（唔會太多），會方食少少，大家好做。

23. 但當然個變數係，球員係極重要嘅人物。唔係睇低咩行業，但你公司冇個分析員冇個會計師冇個CEO冇個空姐冇個廚，畀多啲錢，花少少時間，好歹搵個頂住唔難 — 但我當曼城First Team全部工業行動罷工，咁你總冇可能推預備組出去咁掛？雖然，好似係電視錢照收 贊助照收。觀眾柴台？你有得入場柴咩？掟爆自己電視機咯。定或者玩個全球封殺，邊個罷工就全歐永不錄用？「到時就真係C朗踢中超」 ，just saying．但其實億萬富豪罷工，有冇人同情架？球會一招「感情勒索」（其實我好憎呢個詞），講到你班大帝唔肯出汗搞到幾千人被炒，即時拎晒高地的。

24. 總結定，既然足球係大生意，基本都係睇到大生意嘅兩大定律：1. 危機下當然係強者越強弱者乞米。2. 講到尾都係巴京拎包華，球員咪有，底層員工就冇。當然球員可以做好心捐錢，正如冇人阻止霍建寧捐錢畀你同我，但球員堅持唔肯踢嘅，基本上必然係大攬炒。

（＊）寫過無數次，一般講呢啲都係講收入，因為球會係唔多賺錢嘅，全歐洲都係，所以同其他行業唔同，唔會睇純利。當然如果睇Balance Sheet嘅，你可以睇負債多唔多嘅，另一角度。理論上可以有啲收入相當高但負債重嘅會。