細個嘅時候，我會同人講，我婆婆好靚㗎，同街上面嘅婆婆唔同，我婆婆係全世界最靚嘅婆婆
婆婆好錫我，細個成日帶我周圍飲茶，呢間去下，嗰間去下，荃灣、葵芳、青衣、大埔周圍去，每次飲完茶都會同我去買糖，叫我鍾意食咩就揀，買咩都得，而呢個亦係我每次最期待嘅活動，有次婆婆帶我去阿波羅食乳酪雪糕，可以揀兩隻味，佢一揀就揀咗椰子，話好香好好食，另一隻味就由得我揀，嗰次係我第一次知道椰子嘅味道，真係好香好甜，仲有啲椰絲嘅口感添，簡直係人間美食，自此，我每次食阿波羅乳酪雪糕都一定揀椰子做膽，而每一次食都會諗起咁好味嘅雪糕係婆婆帶我食嘅
我又記得婆婆永遠係我嘅擋箭牌，每次我做錯事，好曳比媽咪打，就會即刻打電話比婆婆，喊得好淒涼咁話，媽咪打我啊，嗚嗚嗚...婆婆就會錫返我，又叫媽咪唔好打我，呢個時候我就會自己改詞唱「世上只有婆婆好，有婆的孩子像個寶...」
當我一路長大，婆婆仍然會成日同媽咪講，唔好鬧個女啊，要慢慢教㗎，然後就會對住我話，唔好成日激阿媽，要錫阿媽，阿媽好錫你㗎，知唔知啊？直到二十幾歲都會繼續講，到我識咗男朋友，婆婆又會叫我對男朋友好啲，好好珍惜對方，然後就講佢14歲就跟咗阿公，16歲就生仔...
婆婆年紀愈嚟愈大，腦筋有時會唔清晰，但仍然會關心我，問我點解咁瘦，要食多啲嘢，隻手點解咁凍，要著多件衫，又會怕我唔夠錢洗...同婆婆嘅回憶有好多好多...講好耐都唔會完...但願有一日我哋可以再重聚，可以見到您笑起嚟細細粒嘅綠豆牙，婆婆我愛您❤️我會好掛住好掛住您㗎❤️
.
.
.
好多人成日問我點解唔出片，咁少曝光，又會催促我快啲穩定自己嘅事業，闖一個高峰，我都明白要把握仲係2字頭嘅日子，但其實生活中有好多事發生咗，我仲感受緊處理緊，呢一切嘅轉變真係冇想像中咁容易過，我會加油～
最後想講，雖然生命入面最重要嘅兩個女人都喺呢幾個月離開咗世界，不過我知道您哋會永遠係我心入面錫我支持我，多謝您哋生我育我，愛您們❤️
阿波羅乳酪雪糕 在 Appolo HK - 阿波羅正價乳酪優惠: 買第2杯即減$10 的推薦與評價
軟棉棉嘅雲呢拿雪糕，加上蘋果味、 青芒味或者可樂味嘅脆冰， 每啖都食到雪糕與脆冰混和之後嘅甜度與特殊口感 ，各款口味都值得一嚐再嚐 。 優惠期間$28/4件，由即日起至 ... ... <看更多>