［掃盲系列］［港美息差咁大，卒令金管局出手］之後啲港紙拆息應會落返啲。
1. 都係明報嘅圖，原文呢度（https://bit.ly/2XxPPbe）
2. 我自己都有做類似嘅圖，但反而複雜，呢張夠簡潔。
3. 就畀你見到，過去兩個月，拆息市場嘅情況。相當有趣味
4. 危機前嘅2月，風平浪靜，港美息差唔爭太多。正常根據聯繫匯率下唔應該差太多，差得太多會有人套利：例如港紙息高太多，我咪借平嘅美金，存貴嘅港紙，然後呢個過程就會令港紙多咗，個息就變返低，自然調節
5. 但實務上有好多其他問題，例如之前都寫過，而家間間銀行啲襟派仁士都麻撚煩，而銀行亦唔多鼓勵炒房自己炒得太勁（同好多人估嘅唔同，銀行會自己炒，但唔係炒股票）。再加上花紅文化都唔同，Dealer呢啲，以前就似吹打咁，銀行賺大錢靠佢，花紅多多。而家就真係往住只係中介人，個客要一球南非蘭特咪幫佢搵一球，back to back，食少少差價，咁咋。花紅文化冇埋，咁我做Dealer嘅，犯不著為咗見到少少利錢就去做 — 反正公司賺錢之嘛，又唔係落我袋。早啲收工去Liberty Exchange 好過（講下啫，以我所知Dealer 多數唔去）。如此種種奇怪嘢，令到有時啲息差相當闊都冇人做嘢。
6. 然後見到，3月頭嗰次緊急減息。美金拆息有急跌的，還好。港紙都有，但唔係好跟得足。息差拉大咗，都算。
7. 3月中嗰次緊緊緊急減一厘息就堅了。見唔見到？減完拆息都要仲升，美金係，港紙升得仲勁。減完息拆息仲升，奇怪冇？當然你可以話，唔係聯儲局減息，升得仲勁，我可以接受呢個講法的，唔係你想像中咁無聊。
8. 的確見到，之後啲拆息係咁升，到而家都仲係高過減息1厘前，更唔好話要跌1厘。原因？當然係銀行淆底，唔肯放錢出去。我點知你會唔會執笠？以上講啲咩套利行為，係常規時期做啫。當你放出去，對家可能會執笠時，我就唔做呢啲嘢架啦。我執你幾十點子，可能仲係十幾日，但我風險係成個本冇晒喎。
9. 你見港紙情況仲嚴重，但好合理，美金都唔敢借，何況港紙？都唔得閒理你。港紙拆息一向極波動，所以你見個息差拉到闊晒
10. 咁但，都係嗰句，驚慌係一時。我最常用嘅比喻，就係好似啲小動物咁，最初驚就縮埋。但貪婪先係人性，隔一排又會伸個頭出嚟animal spirit架啦。見到有咁嘅息差，自然有勇士夠膽做，最多揀間好啲嘅對家（＊）。
11. 所以咪見到早前港紙升到3年高位咯（https://bit.ly/34vVUXc），無非就係因為息高，吸引資金流入。
12. 講到尾，今次金管局減發Exchange Fund Bill and Note，所謂「注資」，都係順水推舟。見到個息差咁闊都冇人做，就推佢兩下。你見既然個銀行體系結餘升咗咁四成，五百幾億升到七百億，就照計港紙供應多咗好多，拆息應該回落啦掛？
13. 所以，真係受惠嘅，應該係供樓嘅人
（＊）呢度有少少technical，但理論上，你同業拆借，係不能揀對手嘅。你不能放咗舊錢出去，例如五億港紙，一個價。咁有人hit到，你係冇得唔借的。但同股票唔同，股票你沽完都唔知畀咗邊個，係咪？拆錢出去當然知道去咗邊個度，亦有情況係嗰間名做唔到嘅（例如某阿拉伯銀行咁，以前試過）。但，你講大話，人地好快會知。例如你話間嘢我地做唔到，但人地可能明明上星期先嚟開條line．或者你話呢間嘢唔夠line（每間銀行有額），但人地明明記得冇借過你錢，咁你就會畀人在公在私狂屌了，小則飲嘢唱你，大則去你老細投訴你。
——————————————-
版務：收費專欄已推出，支持埃汾高質文章。幾舊水睇三個月，一星期三篇
請去呢度訂：bit.ly/2wVXndj
課程編號填: CC01
科咗水後後有Login及Password畀你
逢一三五入去 homebloggerhk.com （見到就睇到《事先張揚》），亦睇得返以前嘅文。一般我都係會黃昏出文嘅。
