《無異之地》惡夢島（五）
雖然戴住頭盔望唔清表情，但從「清理小隊」嘅即時反應，都可以幾肯定佢哋事前唔知惡夢島會變成咁……而實際上佢哋都冇必要扮唔知。
「向好嘅方向睇，既然係『香港』嘅話，咁要定位就更加容易喇。」Match好快已經反應過嚟，「如無意外控制塔應該喺青衣島上面，所以我哋會喺九號貨櫃碼頭落船。」
「隊長，如果上岸見到有人應該點做？」664號問。
「如果佢哋行為唔似生還者，就當係怪物直接射殺。」Match冷酷咁講：「記住完成任務係首要，救人係其次。」
話咁快，我哋就可以見到一排排密密麻麻嘅貨櫃出現喺眼前。預備泊岸嘅時候，我見到其他人都提槍擺出攻擊姿勢，以防敵人突然來襲。
……可能各位會想像到下一秒就會有一堆異形或者喪屍好似螞蟻一樣蜂擁而至，然後展開一場激烈嘅廝殺。但好遺憾，最後係咩事都冇發生。成個貨櫃碼頭渺無人煙，一片死寂。
＝＝＝＝＝＝＝＝＝
《惡夢島》連載中：
https://www.facebook.com/pg/Echo.of.Heart/photos/?tab=album&album_id=1861298627335278
《惡夢，藏在門後》全集：
https://www.facebook.com/pg/Echo.of.Heart/photos/?tab=album&album_id=1342167935915019
《極樂謊園》全集：
https://www.facebook.com/pg/Echo.of.Heart/photos/?tab=album&album_id=1736011713197304
【廣告時間】《無異之初》、《時間守衡者》、《絕命上映》、《絕望走廊》、《絕無轉機》各大書局有售！
＝＝＝＝＝＝＝＝＝
「我哋就咁留架船喺度？」上岸後，我問Match。
「嗯，艘船會交畀結界外面嘅人遙距控制。」Match回答：「完成任務之後會喺最適合嘅位置接我哋。」
「你所指嘅人應該係青鹿啦？」
「嗯。」佢點點頭。
難怪就算人唔喺度，我都一直可以感覺到佢嘅氣息。可以喺結界外面自由控制結界入面嘅物件，呢個人的確係唔簡單。可惜佢選擇加入一個唯利是圖嘅組織，確實係香港人嘅不幸。
「不過艘船本身都有自我保護裝置，所以無二你大可以放心。」講到呢度，Match手上嘅無線電突然傳嚟聲音。
──喂喂喂，聽唔聽到？
係青鹿把聲，出現時機真係啱啱好。
「聽到，我哋啱啱提到你。」Match回應。
──嘩，真係受寵若驚。各位，我諗你哋都應該係第一次遇到咁嘅情況？
「青鹿，我哋唔係你……喺度唔可以回憶。」Match顯得有啲無奈。
──啊，係喎。咁就唔講廢話喇，我想趁而家通訊仲良好嘅時候分享更加多訊息……不過你哋唔洗停落嚟，邊行邊聽就得。
Match冇回應，而係向其他人揮手示意，然後就帶頭開始行動。
──首先係「惡夢島計劃」嘅實驗方式：俱樂部當初捉完人之後，係會先將實驗者困喺一間房裡面，再「故意」留一道門等佢哋醒返之後可以離開，然後進入一個預設好嘅迷宮，面對佢嘅各自嘅「惡夢」。
我頭先都講過。因為碼頭係一片死寂，變相令到青鹿把聲更加響亮。假如我係怪物嘅話，根本唔洗理乜嘢「禁忌」，直接聽聲就可以搵上門。
──為咗脫離呢個迷宮，班實驗者會無意中想像一啲協助佢哋逃脫嘅工具。當想像變為現實之後，呢啲工具就會成為相當有用嘅「資產」。譬如你哋而家手上嘅特製槍，就係專門用嚟對付「蝕客」。但即使係有逃脫工具，班實驗者都注定冇辦法離開惡夢島。因為講到明係「島」，所以喺迷宮出口等緊佢哋嘅只會係茫茫大海。
轉眼間，我哋就離開咗貨櫃碼頭，去到公路旁邊。
──當班實驗者唔小心觸犯咗「禁忌」之後，班「蝕客」就會搵到佢哋，再喺佢哋深信自己可以離開嘅一刻出現捉走佢哋。呢個由希望轉化成絕望嘅過程，就會產生出新嘅「領域」，從而擴大惡夢島。而實驗去到最後，「蝕客」就會將佢哋帶返去房間，等待下一次嘅輪迴。
「呢個乜鬼俱樂部嘅人果然夠晒變態。」275號講出咗我嘅心聲。
──至於點解實驗者會死，當然有一部份人係喺實驗過程俾「蝕者」嚇死。至於其他……點解釋好呢？人並唔係神，想創造出一樣嘢就係要付出相對嘅代價。而喺惡夢島，代價就係實驗者嘅心智同靈魂。喺實驗過程會反覆被拉扯同撕裂，最後等待佢哋嘅就係死亡。
聽到呢度，感覺現場嘅溫度都好似一連跌咗好幾度一樣。
「咁一陣我哋係咪有機會遇到類似嘅情況？」我打破沉默問。
──既然控制塔已經壞咗，咁絕對係有呢個可能……阿Match，你見唔見到前面有架小型貨車？
「見到。」
──正常情況下應該係用唔到，但我有辦法可以啟動佢，你哋就上車用佢直接駛去目的地。
「但唔驚咁做太明顯？」Match疑慮咁問。
──唔驚。太明顯嘅話，你哋咪可以見識下無二先生嘅實力。
Match先望咗我一眼，然後就行去車門前「啪啦」一聲爆窗伸手入去開門。等到所有人都上晒車後，小型貨車就自動開啟引擎，由399號負責開車駛去目的地。
──好喇，我要專心去揸船，費時你哋走嗰陣冇得坐。臨尾送多你哋一句……祝你哋可以順利擺脫惡夢。
之後，又係一段頗長時間嘅沉默，直到貨車駛到去一座工廠大廈前面停低落嚟。
「到喇。」Match探頭望向車窗外面，「控制塔。」
「但呢度點睇都係工廠嚟。」275號皺起眉頭問：「係咪肯定冇錯？」
「用下你個腦，既然成個島都可以變成香港咁，控制塔當然都可以完全唔同晒。」664號回應，然後就率先推門落車。
「啊，你條友語氣唔可以好少少嘅？」275號粗聲粗氣咁講。
「但664號講得冇錯。」Match接住講：「無嘢係100%肯定，我哋只可以親身入去睇清楚。」
「你感唔感覺到啲咩？」臨落車之際，731號不安咁問我。
「你係問之前定而家？之前嘅話，無論坐船定係坐車嗰陣我都一直感覺到有人監視緊我哋。」我語氣平淡咁講：「至於而家，大廈裡面干擾太嚴重，一時三刻我都分析唔到太多。」
但既然有明顯嘅干擾，其實都間接證明咗大廈裡面有「重要嘅嘢」存在。
731號聽完顯得更加緊張，但最後都係鼓起勇氣落車，真係可憐又矛盾嘅後生仔。
我哋先穿過大廈嘅停車場，再進入管理處。直到呢一刻，除咗無任何生還者嘅氣息之外，所有嘢睇落都係一切正常。
「門後面有樓梯。」行頭嘅275號講：「隊長，我哋上去定落去？抑或分頭行動？」
「上頭話唔需要分開行動。」Match回應：「我哋先檢查下層……行動唔需要迅速，最緊要穩陣。」
等我嚟翻譯，佢哋明顯係覺得分頭行動會大大提升死亡風險。總之跟住我就最保險……大致係咁。
「下面係暗房，要開燈喇各位。」275號笑一聲之後就行落去。
下層係一個類似地下倉庫嘅黑房，見眾人都開晒頭盔燈，我都趁落樓梯嘅時候用「萬變紙」變出手電筒。
「地下有支燒完嘅蠟燭。」664號望住地板講：「旁邊仲有乾咗嘅血跡。」
「睇嚟應該冇錯喇，呢度就係控制台。」Match開始檢查牆身。
「隊長，呢邊有道門。」399號喺一堆木箱後面講：「睇落冇鎖到。」
「房間、門……無二先生，」731號望向我，「呢個情況同個實驗好相似……」
「嗯。」我點點頭，「做好準備喇，我唔保證可以保護到你哋所有人。」
「知道。」731號點點頭。
確認清楚房裡面冇其他出口之後，我哋先等399號呢位技術專家分析道門會唔會觸發乜嘢陷阱，肯定冇問題之後就由唔怕死嘅275號負責開門。
開門一刻，已經可以見到另一邊光源非常充足。幾秒後，映入眼簾嘅係一條長走廊，走廊嘅左手邊擺咗唔少藝術裝飾同人像畫，整個感覺就好似一間兩三層嘅英式大宅咁……呢個環境，同我當年住嘅孤兒院有幾分相似，令我諗起一啲不快嘅回憶。
你哋話我唔應該回憶？冇所謂喇，反正「敵人」已經準備要出現了。
「啊……」275號行咗兩步就停低落嚟，「我認得呢度，係我前妻嘅舊屋……」
「吓？」731號愕然。
「唔好回憶呀……275號！」664號怒聲道。
但就喺下一瞬間，走廊邊緣突然傳嚟急速嘅腳步聲。除咗275號之外嘅小隊成員即刻反應過嚟舉起槍。幾秒後，一個矮小嘅身影出現喺面前，係一個睇落唔過十歲嘅細路仔。
「阿仔……？」見狀，275號難以置信咁講。
「爸？」細路仔手上面嘅超人玩具甩手落地，「點解你會喺度嘅？」
「我……仔……真係你？我有冇眼花……」
「275號！佢唔係你個仔！」664號提醒道：「你個仔七年前已經死咗喇！」
睇嚟佢哋終於放棄咗「唔去回憶」呢件事了。嘛，呢件事本來就係強人所難呀。
「我當然知！但唔代表我唔掛住佢！」275號咆哮道：「仔，你行近啲……俾爸爸再望清楚少少。」
「嗯……」細路聽完照做。
「你唔好再行埋嚟！」664號咆哮：「你再行我就會開槍！275號，清醒啲，唔係我連你都打埋！」
我望咗眼Match，佢睇落對現況一啲都唔緊張，完全係放任自己嘅隊員爭執起嚟。至於731號，就緊張到成個人震晒。
「爸……」細路仔聽完之後即刻停低，臉上面流露出驚訝嘅表情，「佢哋係咩人嚟？點解會拎住枝槍……嗚……我好驚……」
「仔，唔洗驚……你哋放低枝槍！」275號行前幾步擋喺前面，「我只係想睇清楚個仔，一眼咁多……」
「我都話佢唔係……」664號講到呢度突然睜大雙眼，表現得好痛苦，就好似被隔空捏頸一樣。最後跪喺地上面，連枝槍都揸唔實。
見到呢個情況，我即刻行埋去拍一拍664號嘅肩膀，佢馬上好似得到解放一樣連咳好幾聲。然後用心靈傳送同我仲有Match講：
──係隻怪物，佢想阻止我講嘢，快啲阻止佢哋……
「爸，佢哋係壞人，我講得啱唔啱？」細路仔一步步行近，語調變得低沉起嚟，「爸……壞人就應該死……殺晒佢哋，你就可以帶我返去……」
「明白喇。」275號毫不猶豫咁講，然後舉起佢手上嘅槍。
「啊！？」731號反應過嚟即刻將槍移向佢，但俾我阻止咗。
呯！呯！呯！連開三槍之後，眼前嘅細路仔應聲倒地……幾秒嘅沉默後，275號即刻抱腹大笑起嚟。
「哈哈哈哈，嚇到喇，你哋係咪嚇到先！？」275號邊笑邊講：「我嘅演技係咪好好？一個俾亡子操控嘅老豆，企圖殺晒自己嘅隊員……」
「你……！」664號聽完當然好嬲，企起身抓住佢衣領，「你喺呢個時候玩嘢？你想死呀！？」
「唔好怪佢。」Match過去撳低664號嘅手，「係青鹿叫佢咁做。」
我果然冇估錯，佢事前一早已經知道了，所以先可以咁冷靜。
「吓？」眾人聽完都好意外。
「確認威脅唔大嘅話，就要測試下你哋嘅臨場反應。」Match接住講：「而呢次只有399號嘅表現合格……唔計我同無二，只有佢睇穿275號係扮嘢。」
「多謝。」399號點點頭，「呢段時間我已經搵埋出口，就喺下層。」
「咁就行喇。」275號望住664號，舉起手指一指自己個腦，「下次用下個腦。後生仔，我點會咁易俾怪物呃到？」
果然入得「白色秩序」嘅都係一班自我中心嘅人……664號聽完當然係相當氣憤，但既然係高層落嘅指令，佢都只能夠將呢啖氣吞落肚。
「何況，我從來未忘記個仔離開之前講嘅嘢……呢世人只會愛佢一個。」275號冷冷咁講，行到倒地細路旁邊嘅時候對佢吐咗啖口水，「嘔心嘅怪物。」
我嘆咗口氣，正想跟埋去。但就喺下一剎那，突然有個強烈嘅存在感突破干擾吸引到我注意。
「咪住。」Match睇嚟都注意到，「我好似聽到附近有聲。」
「係咪又係怪物？」275號轉過頭問：「等我再殺多一隻。」
「唔肯定，但我依稀聽到有人喺度嗌救命……有可能係生還者。」說罷，佢就打開側邊嘅門，行入一個類似客廳嘅地方。
「我而家都聽到聲喇。」399號壓低聲講：「應該再隔幾幾間房。」
我哋就係咁一連打開好幾道門。最後去到一間接近三百呎嘅主人房，而虛弱嘅求救聲就喺浴室裡面傳嚟。
──有冇人……救我……
「我哋應唔應該開門？」Match問我，睇嚟佢都注意到我表情有變化。
其實早喺佢推開第一道門嘅時候，我已經知道求救嘅「人」係邊個，亦都有諗過阻止佢哋……但我最後並冇咁做。因為，我有種強烈感覺，門後面呢個「人」會係一個指引，帶我搵到惡夢島之所以變成咁嘅「真相」。
但代價，會係乜嘢？
見我點點頭，Match先深呼吸一口氣。然後就解開門鎖，推開浴室嘅門。
門後面係一個少女，躺坐喺浴缸旁邊，身上只係著住一件單薄嘅連身白裙。睇落佢應該啱啱喊完，用梨花帶雨嘅表情望向我哋。
「無二……先生？」少女用難以置信嘅語氣咁問。
「妳冇事喇。」我望向眼前呢位引路人。
「……如初。」
（待續）
下回：誰的惡夢。
今章預計節奏係好快，亦都唔會非常長，開快車直奔結局。
睇完幫手畀個 LIKE 同留個言啦～你幾秒鐘嘅動作對我已經係非常大嘅原動力 😭
下集暫定星期日或一。
＝＝＝＝＝＝＝＝＝＝＝＝＝＝＝＝＝＝＝
【非呃嬲植入式廣告時間】《無異之初》《時間守衡者》《絕命上映》《絕望走廊》《絕無轉機》《無限次告白》《醉後的藍》已經登錄各大書局。
IG: echoofheart
