《或者存在的不存在職業 - 試藥員》
「呢個世界實在太少人。」
同時世界充滿疾病同病毒。有人話，係神對人類嘅懲罰，又有人話係大自然嘅平衡。
要保存人類，就要有藥。
要確保每隻藥嘅功效，唯有「活人實驗」。
我嘅工作就係奉獻自己，成為拯救人類嘅活體實驗品。
我從來不被需要。
孤兒一名，冇父冇母、冇人領養。
由出世嘅一剎那，社會從來冇為我預留一個位置。
之後有一班人帶走咗我，去到一個島嶼，幫我起咗個名。
帶畀我一個位置，一個命為「試藥員」嘅職業。
我好幸運，由無人需要變全人類歌頌，醫生成日畀好多報導同Video我哋睇，
世界各地都對「試藥員」心存感激，甚至當選年度最偉大職業。
醫生話：「世人對你哋嘅歌頌就係現實。」
當然工作上都有痛苦時刻，
既要試藥，先要注毒。
毒素走遍五臟六腑，再以不同新藥加所以嘗試。整個過程，付出嘅係生命。所以我哋好少過到25歲。
今日，係我25歲生日。
呢個穿著白袍向我祝賀嘅，我哋叫佢做嚴醫生。
嚴醫生：「又要開工啦，啱啱一班市民喺時代廣場同你錄咗段生日Video。」
一路睇住Video，個心就好暖。
因為佢哋嘅健康，就係我嘅工作成果。
之後嚴醫生再講：「不過今次嘅工作好嚴峻...」
我都好緊張：「又有新嘅流行病？」
嚴醫生：「係愛滋病...」
我有點不解：「上個月唔係已經有藥可以完全根治啦咩？」
嚴醫生嘆氣：「係...不過隻病已經變種，上次隻藥已經起唔到作用...真係好對唔住你哋...」
我拍拍醫生：「唔好咁講，你都好努力，我哋開始啦。」
=================
每次實驗，我哋都會被全身麻醉，但今日....發生咗一件意外。
麻醉藥注射完畢，但我冇被麻醉...
曾經一個同伴都話出現過呢種情況，應該係長期嘅試藥，令我哋喺特定條件下出現抗藥性。
我打算叫佢哋再施一次藥，但首先一段對話傳入耳邊：
「醫生，上次批藥已經完全銷毀。」
「非常好，真係嚇死我，如果咁就醫返好，啲人仲使買咁多藥？」
我漸覺不妥，於是合上眼，扮成被麻醉一樣。
「一陣順便幫佢試埋另一隻藥，設計上係咪服用期十年，病毒要有適當潛伏期，每50人有一個會翻發。」
「服用期有冇可能變十五年，咁對公司業績有利啲。最緊要賣多啲藥。同埋呀，最近啲Video冇咩新意，啲人太似做戲，下次搵啲自然啲嘅，要令班人覺得自己係救世主一樣！冇呢種 精神支援，佢哋點撐到啲療程？」
此刻，我百感交集。佢哋一路閒話家常，一路悄悄逼近。
我二十五年嘅價值觀受到瞬間摧毀，我已經分唔到咩係真，咩係假。
到底外面嘅人，知唔知有「試藥員」呢個職業？究竟佢哋欣唔欣賞我...
同埋，拎我嚟實驗...到底係研發「救人之藥」，定抑或係測試「啲藥會唔會醫得太快。」
針筒將至，凌亂嘅思緒令我用本能行事。
「你老母呃我？」
我一手擋開針筒，另一手搶咗把手術刀。
大約冇人估到我未被麻醉，毫無防備。我一刀就插落工作人員嘅咽喉，
混亂之間眼前一切都變殘影，只知道有血、有尖叫、有警號、同嚴醫生一個凶狠嘅眼神。
「要逃走。」我同自己講。
對自己嘅腳程，我好有信心。而且我手中有最強嘅武器—手術刀。
我絕對有機會走得甩。
我要知外面世界有幾大，有冇時代廣場、有冇人祝福自己、佢哋點睇我嘅工作，
我要話畀佢哋知好多病都已經有藥醫！我要話畀佢哋知有人蓄意隱瞞！
我要佢哋感激我，
我要..一個容身之所。
『砰！砰！砰』
三下響聲之後，眼前嘅環境由直倒變成橫倒...我知道，我倒下了...
係麻醉藥終於發作？唔係...感覺唔同...背部一陣涼意...好痛...
我回頭，發現嚴醫生喺數十米外，拎住一件我未見過嘅武器。
佢漸漸行近：「呢支叫槍，你由出世開始都未見過，唔止咁，你成個世界觀都係我哋建構嘅。好多嘢，都係以防萬一，所以由我哋虛構。」
我想掙扎，但只能夠用無力嘅拳頭觸及到佢嘅小腿。
佢笑住講：「你哋並唔偉大，只係公司嘅實驗工具。作為公司，就要有盈利。『救人』係旗號，『賣藥』先係主業。年終大會我哋唔會理『救咗幾多人』，而係『賣咗幾多藥』。」
「咁呢25年...我做咗啲咩呀？」我雙手已經冇力，剩下瞳孔依然縮放。
嚴醫生將槍指住我額頭：「咪做咗傻仔囉。你咁偉大，記住下次投胎，問下有冇得做救世主啦。」
原來我嘅職業....係傻仔...
砰！
---
------
------------
眼前一黑之後，我再次聽到呼喚我嘅聲音
「行啦，唔使懷疑，呢度係死後世界。」
「咁你係邊個？」
「我呢家有份差事叫『死前通知員』。但生前同你有啲似，不過我專試毒，就係咁，奈何橋位哥仔叫我照顧下你。佢知你有心事未了。」
「我已經分唔到咩係真咩係假，我唔知咩係生咩係死...」
「我知你生前嘅故事，所以第一步就係，我帶你睇清楚咩叫現實。」
「咁...我可唔可以拯救世界？」
「好快，你就唔會問呢條問題。」
==============================
其他不存在的職業系列Album：https://goo.gl/xh4bbt
其中推薦：
《試毒員》https://goo.gl/f3ruQ9
《死前通知員》https://goo.gl/jK49QO
《職場公敵》：https://goo.gl/zxb4PG
《不幸者》：https://goo.gl/zWKl4A
Ig:cheungson88
*會慢慢Up嘢上去
