《宅男日記》
我個名叫做陳大文，做咗半世紀單身狗， 大半生嘅成就只有一樣嘢：抱怨。
我一直都抱怨政府有公屋政策、有綜援政策、有醫療福利…… 但係點解完全冇關注單身狗問題？
終於，皇天不負有心人，唔知喺邊度爆出一個天才林建鋒，建議打完針可以免費安排相睇，我而家先至相信呢句老話，「天才與白痴 只係一線之差」， 應該係呢個世界白痴太多，林健鋒逼下逼下，逼的咗個隔離線天才嗰邊……
星期一朝頭早，我冇刷牙冇洗面，一起身即刻走去投注站，原來搞錯，應該係去注射站……嗰個護士問我打邊種針，我話冇所謂啦，破傷風白喉都得，至緊要有得相睇。
個護士望住一份表格，好細心咁對我講，「先生，有分別㗎，打four兄就會安排四川妹湖南妹、打復必泰就會安排鬼妹……」
我當堂打個突，「姑娘，我係想搵斷背山喎……」
姑娘似乎完全冇諗到呢一點，即刻擰轉身搵高級人員過嚟，呢個時候，林健鋒啱啱喺後面打點緊，走埋嚟對我講，「即係咁，hehe呢家嘢，香港仲未完全合法」， 佢彎低身細細聲喺我耳仔邊講「嗱，你打完針我私下幫你安排……」
我同林健鋒講：「講笑啫，我唔係攣㗎。」
既然係咁，我又唔識英文，打咗four兄先算啦……
姑娘喺電腦輸入咗資料，電腦畫面眨下眨下，「而家會同你安排一位打咗國產疫苗嘅單身華籍女性，其他資料暫時要保密，依家只可以話你聽，對方姓譚。」
三星期後……
主辦方安排得唔錯，包咗全香港譚仔做相睇場地，dress code 係 Black Tie.
我著返嗰套封咗塵幾十年嘅西裝，仲同骨精鵬借咗條黑色煲呔，攞完籌，正襟危坐坐響譚仔裏面等對方出現，心諗，姓譚嘅，起碼都好似譚小環啩。
最終，林健鋒引領咗單身嘅譚惠珠過嚟……
