所有人都叫我去死（上）
你知唔知道，謀殺一個人有咩方法？
除咗粗暴地消滅佢嘅肉體之外，你仲可以諄諄善誘咁勸佢去死，可以匯集大家嘅力量，一齊勸佢去死。
呢個，就係我最近嘅遭遇。
我係陳伯，今年七十二歲。
後生嗰陣，我去大城市讀過幾年書，後來返咗嚟，會教吓小朋友寫字同基本計數。
依加村裡嘅壯年，基本上都俾我教過，都會叫我一聲「陳老師」。
我十幾年前就退咗休，喺屋企享吓清福咁。
但係，呢兩年村中收成唔好，生活捉襟見肘，連食飯都成問題。
大部份人家已經由一日三餐，改做一日兩餐，食嘅都係粥水。
目前為止，已經有幾個小朋友，因為營養不良而病死。
糧食，成為家家戶戶最煩惱嘅問題。
上個月，六十幾歲嘅吳婆婆，同個仔講：「我都老啦，留番啲糧食畀後生仔。」
然後，佢半夜上山，吊頸自殺。
村民知道呢件事之後，都好感動，為吳婆婆舉辦咗一場隆重嘅喪禮，大肆表揚佢嘅犧牲精神。
仲有人提出，要將隔離嘅山頭改名，叫做「吳婆坡」。
又有人話，應該紀念吳婆，但「吳婆坡」實在太難聽。
結果，全村一致通過，嗰個山頭改名為「老人山」。
去過大城市嘅我，隱約都知道，「命名」除咗紀念之外，仲同信念、期望有啲關係。
吳婆自殺，個山唔叫「吳婆坡」，而叫「老人山」。
咁大家嘅期望，到底係乜嘢呢？
之後嘅事，向住最差嘅方向發展。
村中嘅糧食愈嚟愈少，各家各戶都有老人深夜自殺。
每朝都有村民上山收屍，大肆歌頌自殺嘅老人。
有一次，十歲嘅小虎問：「爺爺係同我爸爸同叔叔一齊瞓㗎喎，爺爺又行得慢，點解佢半夜起身，爸爸同叔叔聽唔到嘅？」
佢爸爸衝出嚟，捂住佢個嘴，佢嘅質疑亦馬上被村民嘅噓聲淹沒。
村民話，依加糧食不足，老人願意犧牲自己，係大義之舉，佢哋嘅親人都係大義之家，冇人可以質疑大義之家。
老人死一個，少一個，依加我已經係全村年紀最大嘅老人。
我發現，村民開始奇怪嘅目光打量我。
終於有一日，佢哋忍唔住出聲。
有幾個村委會嘅人，嚟我屋企探訪。
佢哋寒暄咗一陣，終於有個村民話：「陳老師，你哋屋企夠唔夠糧食啊？一日食幾多餐？」
「我哋都係一日兩餐稀粥，呢個時候，家家戶戶都唔容易。」我小心翼翼咁答：「不過都可以支持落去嘅。」
村民話：「您嘅仔女又要務農，又食得咁少，真係好辛苦喎。其實呢，如果少一個人頭，糧食嘅消耗又少啲……」
「你係咩意思？」我面色一沉。
見我黑晒面，村委會嘅人都圖窮匕現：「意思係您為人師表，更應該做個好榜樣，將糧食留畀青壯年。」
「又唔係益外人，都係留畀您嘅仔女啫，您都唔想睇住佢哋餓死㗎？」
「陳老師，我記得當年您教過我一個成語，老而不死……」
佢哋一人一句，我個心好似冬天跌落冰湖一樣咁凍。
我冇諗過，佢哋口口聲聲叫我老師，但句句都係問我做咩未自殺。
我冇諗過，有人可以冠冕堂皇，大大聲咁叫另一個人去死。
下集：https://bit.ly/2WHdrMh
Patreon訂閱即時睇下集，快人一步：https://www.patreon.com/tomato28
#短故 #短篇 #小說 #陳美濤 #廣東話 #粵語 #tomatochan #所有人都叫我去死
諗粵語意思 在 香港有文化，粵語最古雅！ ．佢（今）渠（正） 意思 的推薦與評價
尋例如：「尋日」(昨日) 意思：「之前」 晉陶淵明《歸去來辭》：「尋程氏妹喪於武昌」 ．諗意思：「想」 《詩經．小雅》：「豈不懷歸，是用作歌，將母來諗」 嚟（今） ... ... <看更多>