陳煩寫野真係好好睇，唔會悶又有意思，仲要道出我心聲。
－－－－－－
另一個情況係，明明你上網免費睇咗篇文，睇到落尾發現係廣告，就會頭也不回咁撳走，有時仲會花寶貴嘅幾廿秒去打句「超廣告嚟嘅」。其實既然你可以睇到落尾，我諗篇文都唔係咁差，相信睇嘅過程你都被感動過被娛樂過啩？點解會因為見到係廣告就否定作者嘅時間同心機呢？一個Like對讀者嚟講只不過需要動一下手指，但可能係創作人嘅生計，甚至係堅持落去嘅唯一回報。
唔係話乜都要你Like，但係如果享受過人哋嘅付出之後，唔Like唔會殺咗人，但可能會抹殺咗一個創作人。
不過諷刺嘅係，我用呢個故事嚟包裝呢段說話，其實都係Entertain緊大家。
娛樂至死，從來都係我哋所有人嘅共業。
－－－－－－
《出Post唔夠Likes就要被人道毀滅（下）》
上集：https://is.gd/2wtMIR
9：00PM
家明喺屋企焦躁地來回踱步，用牙將指甲咬得格格聲響，佢不斷深呼吸，嘗試令自己冷靜落嚟⋯⋯
電腦話兩小時後就會解除封鎖，即係仲有一個鐘嘅時間去拎283個Likes。
由於畀Like嘅人係可以重覆計算，所以只要有幾個人喺解封後願意不斷畀Like就可以湊夠數。
佢決定硬著頭皮打電話畀朋友求救。
「喂阿強？我係家明。」
「你識唔識禮貌呀？冇Text過問下就打畀人？」
「唔好意思⋯⋯」
話口未完，對方已經收咗線。
家明忘記咗，喺網絡年代，連打電話畀朋友都係一種騷擾。
既然唔可以打電話，佢只好Send訊息畀Contact List上嘅所有人，希望佢哋喺11點之後可以幫手Like晒佢今個月所有嘅Posts，幫佢避過一劫。
11：03PM
時間一分一秒咁過去，當佢將最後一個訊息發出之後，佢嘅個人社交網頁亦都夠鐘解封。
家明金睛火眼咁望住電子環上嘅Like數，但係，數字一直都冇跳動過。
佢以為係電話或網絡問題，令剛剛嘅訊息Send唔到出去，佢慌張地拎起電話打開通訊軟件，唔止發現所有訊息都已經發送，而且大部分都已經Read咗。
家明唔明白，點解會連一個朋友都唔肯幫佢？突然，手機傳嚟一個語音訊息，佢好似一個遇溺嘅人見到浮木一樣，懷住感激同希望，手忙腳亂咁打開個Voice Message：
「家明，唔怕老實同你講，我幫你唔到。
如果我不停幫你like，系統偵測到異常就會Block咗我，咁樣對我嘅Review會有影響。
而且⋯⋯你知道朋友間係會睇到大家Like咗咩嘢㗎？如果畀人見到我不停Like呢啲Post，嗯⋯⋯我意思係，比較悶少少，係囉，你明白㗎可？」
家明望住個電話，佢接受唔到呢番咁可笑而冷血嘅說話，係由同佢拍過五年拖嘅前女友Kelly講出嚟。
11：25PM
家明撳實錄音掣對住電話大嗌：「你以前話我悶所以同我分手，好！我接受。但我就嚟要死喇！你因為我悶而唔肯幫我？」
「你唔止悶，你仲一啲都唔識同人相處，我夠膽講，我係唯一一個仲會覆你嘅人，但你竟然仲用咁嘅語氣同我講嘢？唔講嗰句我都講埋，冇朋友會幫你，因為大家都擔心如果幫咗你，但係你仍然唔夠數嘅話，到時你就係社交危險份子，曾經Like過你啲Posts嘅人話唔定會畀人歧視同秋後算帳。Take Care.」
家明一怒之下將電話砸落地，然後發狂咁扯手腕上嘅電子環，佢將電子環用力撞向檯角，但係除咗手腕因過度用力撕扯而紅腫發痛之外，電子環依然完好無缺，世界依然運行如常。
家明全身痠軟咁伏喺電腦前，螢幕上顯示嘅Like數依然紋風不動，佢喃喃自語咁話：「Kelly鬧得我好啱⋯⋯」
11：45PM
家明又一次更新自己嘅Status：
「我在12時前需要283個讚好，否則就會被人道毀滅，煩請幫忙。」
家明手騰腳震咁按下Enter鍵。
佢唔敢望住屏幕，或者話佢已經冇辦法坐定定喺度，佢不斷喺只有二百幾呎嘅屋企來回踱步，幾分鐘後，Notifications不斷叮叮噹噹咁響，佢一個箭步衝去電腦前，但係「讚好欄」依然維持喺2717呢個如詛咒般嘅數字，通知只係顯示佢剛才嘅Status不斷被Share開去。
家明唔明白發生咩事，佢撳入去睇Share嘅人講咗啲咩：
「有好戲睇！小二，來一斤花生！」
「又一個，早知今日，何必當初？」
「開Live啦！Show me what you got for my LIKE!」
幾百個Shares，當中有朋友，亦有唔認識嘅人，Notifications仍然不停咁響，Shares喺短短十分鐘已經去到四位數字，家明從來未試過畀咁多人討論同關注。
In the future, everybody will be world-famous for 15 minutes.
家明腦海中又再記起呢句說話，但佢已經唔記得到底係幾時同喺邊度聽到呢句話，係喺大學嘅課堂上？定係同Kelly一齊去藝術館睇展覽嗰時？定抑或只係喺網絡上睇到嘅Content Farm文章？佢真係記唔起喇。
11：56PM
家明坐喺電腦前，應數千人嘅要求開咗一個Live Video。
「喺一年之前，人道毀滅一直用嚟畀嗰啲年紀太大或者有病嘅動物得到解脫，但係而家，就係用嚟懲罰犯咗社交網絡滅罪法嘅人。或者好似我哋呢種人，的確係年紀太大，跟唔上時代嘅步伐，或者我哋真係有病，先至會唔理解大家喺度做緊乜。」
Share嘅數字仍然不斷攀升到過萬，但家明嘅Like數只係輕微上升到2855。
家明環視自己二百幾呎，勉強稱之為家嘅地方：一張梳化床、一部微波爐、一部電視，仲有堆滿一地嘅書⋯⋯佢嘅視線落喺封塵嘅《娛樂至死》上。
「我哋處身所在嘅年代，不論政治、宗教、教育、新聞，都以娛樂嘅方式出現，我哋係社交網絡嘅奴隸，快感係纏喺我哋身上嘅手銬腳鐐。」
網民開始鼓譟，不斷留言叫家明做各種事情，同時睇Live嘅人數亦開始下跌。
家明目光呆滯地端詳手腕上嘅電子環，銀製嘅外殼觸手生涼，倒映出家明枯槁蒼白嘅樣。
「George Orwell曾經擔心我哋深惡痛絕嘅老大哥會摧毀我哋，但Huxley預言，我哋將會毀於自己所熱愛嘅事。
最終，我哋都不過成為一個娛樂至死嘅物種而已。」
12：00AM
－完－
＝＝＝＝＝＝＝＝＝＝＝＝＝＝
其實希望有多啲人睇到呢個故事，本來想講要夠幾多Shares先出下集，但因為我怕冇人睇，怕最後會唔夠數，結果想講嘅說話會胎死腹中，所以等而家出埋下集先講，如果你鍾意呢個故事，請幫我Share一下，多謝。
無錯，故事前設係誇張咗啲，但我哋的確係用社交網絡嚟殺緊人。
只要有花生食，就算一啲好小嘅事，甚至係私人事都會畀人用嚟抽水或者大造文章，完全冇諗過對當事人會造成幾大嘅傷害同影響。
一切都係娛樂至上，嚴肅嘅討論同議題漸漸消失，繁雜嘅訊息唔會嘗試消化，有洞察嘅文章石沉大海，你鍾意食燒賣定魚蛋，想養貓定養狗嘅投票Post一個接一個， 周圍都充斥住語錄同公式文章，對我嚟講，娛樂係一種手段一個過程，而唔係唯一目的（當然有時可以，但唔應該係永遠）。
另一個情況係，明明你上網免費睇咗篇文，睇到落尾發現係廣告，就會頭也不回咁撳走，有時仲會花寶貴嘅幾廿秒去打句「超廣告嚟嘅」。其實既然你可以睇到落尾，我諗篇文都唔係咁差，相信睇嘅過程你都被感動過被娛樂過啩？點解會因為見到係廣告就否定作者嘅時間同心機呢？一個Like對讀者嚟講只不過需要動一下手指，但可能係創作人嘅生計，甚至係堅持落去嘅唯一回報。
唔係話乜都要你Like，但係如果享受過人哋嘅付出之後，唔Like唔會殺咗人，但可能會抹殺咗一個創作人。
不過諷刺嘅係，我用呢個故事嚟包裝呢段說話，其實都係Entertain緊大家。
娛樂至死，從來都係我哋所有人嘅共業。
＝＝＝＝＝＝＝＝＝＝＝＝＝＝
FB：陳煩
IG：annoyingchan
記得畀個手指公讚好 在 [ Q & A ] 你知道用... - Ronnie's English Cafe 3分鐘英文學習 的推薦與評價
Let's make a finger heart when we're taking a picture. 拍照時，我們來比個手指愛心吧。 圖片取自網路 請多多按讚並分享貼文 ... ... <看更多>