【清淨無穢】
塞車，然後又係塞車。
下雨天，車速本已緩慢，撞車嘅白痴就更多。眼見都係互不相讓或跟車太貼做成，對於呢D白痴，我實在無話可說，只可以怪自己運氣不佳。
衰開，一定有條路，諗住去完廁所可以轉運啦，點知一上車就有兩個壯男，抬住條死屍睇住我上車着車，欲拒無從。心諗：至少都有兩個清醒嘅陪住。可惜，我太年輕了，佢地搬左條屍上車之後，就塞錢畀我同我講去梨木樹邨。
孤身上路嘅我，感覺就好似做左湘西趕屍人，要喺天光之前，負責將身後毫無知覺嘅死屍送返家鄉。鈴鈴鈴，上路喇。未幾，一陣急促嘅鈴聲響起，頂！唔好破法呀！
「喂，老婆⋯⋯返緊黎喇⋯⋯」死，佢醒左，呢鋪大鑊喇，仲有幾公里路，點解唔比我捱埋⋯⋯拍，嘩，做咩遞個電話畀我？「係，師傅，唔該送佢去⋯⋯⋯⋯我喺度接佢架喇。」一把甜美嘅聲音傳來，收線之後，條屍又回復沈寂，頭頂倚背，低頭入定，希望繼續太平啦。
一路竭力保持平穩，務求唔畀佢屍變，但⋯⋯一陣嘔吐聲同嘔吐味，同時進攻我嘅鼻同耳，無喇無喇，屍變喇。即時熄冷氣落玻璃，將新鮮空氣捲入車箱，力抗屍氣嘅入侵。但接二連三嘅噴發聲，令我明白到，我已經徹底中毒。呢個時候，得返早更留低嘅獨門解藥——純薄荷萬寶路——可以解救，但我已經無點火嘅餘力。
千辛萬苦，目的地在望。一個年少嘅婦人，推住部BB車向我揮手。有人接貨，終於落葉歸根，任務完成。問題係，抬屍落車係好深奧嘅學問，嬌小嘅婦人顯然無法獨力完成。我承認，我完全無幫佢嘅心，試想像，一條成身嘔吐物嘅死屍，半臥喺車箱入面，你有無勇氣同能力抬佢出黎？
施力不成，唯有採用傳統方法——招魂。不過喺死得咁徹底嘅死屍身上，我實在無把握成功。「返黎喇，到喇到喇，起身喇~」「老公，返來喇，你返到屋企喇~」逐漸，佢手指開始有反應，就快成功招到魂！
做乜身邊有嘢郁嘅？眼角餘光見到嘅影像，嚇到我自己魂飛魄散。部BB車流緊出路中心！潛意識驅使我飛身拉返部車埋路邊，再鎖住個碌。呢一下，將我僅存嘅耐性都用完，我出力大喝：「起身！起身！到喇！」終於，魂魄歸位，成功落車，趴喺欄桿不停喘氣。「睇住佢地呀！佢搞成咁，我要收返清潔費wo。」好在，個媽媽都明白事理，喺死屍身上掏D錢畀我。
透過後鏡，望住個媽媽，要睇住個唔識講嘢嘅女，同睇住個講唔到嘢嘅老公，望住對面馬路嘅屋企，這麼近，那麼遠，唉。「畀枝水你，你淋醒佢再上樓啦。」尾箱常備嘅聖水，就咁就犧牲左一枝。
再一次回頭望，唔係望人地老婆，而係望住一片狼藉嘅車箱，嘆一口氣，駛向荒蕪嘅山邊，進行潔淨嘅儀式。新界西，果然唔係D咩福地，究竟點先可以改變黑暗嘅命運？
#lazytaxi
#的士
#taxi
