有銀行搵我寫廣告，跟住嫌粗口太多同埋有色情成份，名字仲要影射緊公眾人物，問我可唔可以改。我話唔改，唯有下次合作了。但寫咗唔出又好浪費，唯有化名照出。
葉朗深度呈獻自覺是最有 feel 的信用卡廣告，請細心欣賞。
~ ~ ~ ~ ~ ~ ~ ~
水街有棟唐樓，高五層，一梯兩伙，沒有電梯。樓宇裡面單位都陳舊殘破，印證著歲月留下的痕跡。每戶門外放了地主公公，棗紅色的大門外便是一道銹迹班班的鐵閘。住在這裏的，不是底衫穿了個大洞的阿伯，便是繡了滿身龍虎豹的金毛大漢。
羅永聰住的五樓 A 室卻是另一個光景。
那道雅致的深棕色大門滲著一陣京都佛寺的柔和，門外淺灰色石牆雖然有幾道不規則的裂痕，但卻像日本的金缮瓷器一樣，每道裂痕都透出一抹貼地的雍容。這個單位當然沒有老土的鐵閘，用的是密碼鎖。
羅永聰踩著門前那塊米色的小地毯，如常按入密碼，開門，但門後繫上鐵鍊，有家歸不得。
「喂屌，又係咁！」羅永聰大力拍門說。門後傳來急促的呼吸聲，裏面正在發生什麼事，羅永聰當然清楚，但他顯然不當一回事。
給羅永聰在門外這樣大叫，急促的呼吸聲停止了。
屋內的女生慌張地穿上散落在客廳每個角落的衣服，而男生則赤條條大次次的向大門方向走去，在門縫中不耐煩地對著羅永聰說：「喂，打個白鴿轉先返嚟啦。」
「肚痛呀，開門啦！」
「痾遲一陣係咪會死呀，」門後那個赤裸男說。
「嘩屌你個冇人性，」羅永聰快要忍不住，「咁你扑遲一陣係咪會死呀。」
「你又食辣吖？」門後的男生皺起眉頭。
「食乜關你叉事吖，開門啦！」
門後的男生看見女生穿好衣服後，便解開鐵鍊。
羅永聰進來望見頭髮凌亂的女生尷尬地坐在沙發，立時驚叫一聲：「Janette？」
女生不好意思地點了一下頭，輕聲地了 hi 一句。單看容貌，Janette 算不上絕色天香，但身材搭救有餘。
「你唔係有個讀 archi 嘅男朋友㗎咩？」羅永聰忘了肚痛，看著 Janette 卻指著赤裸男說，「點解你要咁作賤自己吖，咁多人唔黐，你黐埋佢度？」
羅永聰說著說著，赤裸男已經在斗大的客廳踱了幾個來回。
「講完未呢肥仔？」赤裸男終於忍不住說。
Janette 此時已經在客廳的一角拾起了她的背包，再拿起一疊放在飯枱的參考書，向赤裸男拋下一句「電聯啦」便急急溜走。羅永聰突然醒起自己有大事要辦，立刻衝了入浴室。
赤裸男點起一根萬寶路，走向浴室，打開門，盤坐在浴室門前的地上，目光凝於正在大便的羅永聰，噴出一縷煙圈。
「頂，你啲煙好臭呀，閂門啦。」
「我都未嫌你臭，你嫌我臭？」
「咁你閂埋門咪大家唔使臭囉，」羅永聰提高聲線。
「做乜今晚咁好火呀？」
羅永聰吐出一口悶氣：「你家姐三日冇返過嚟。」
「好哋哋做乜又嗌交呀。」
「我嗰日擗咗支牙膏落垃圾筒啫，佢就扯晒火咁，話支牙膏仲有剩，鬧我浪費。好，我忍佢，然後間房個冷氣機冇熄到，又投訴我晒電。我避開佢，費事同佢嘈，跟住佢自己走咗去廚房，坐喺地下喊。喂大佬，小小事就發晒脾四咁，好難頂啫。」
赤裸男打開手機，按了兩下，「你自己睇吓。」
「咁似你家姐啲衫同袋嘅？」羅永聰問。
「因為呢個係佢個 account，最鍾意嘅嘢都攞晒出嚟賣。」
完事後，羅永聰還沒穿好褲子，赤裸男便拉了他進廚房，指著麵包，「你自己睇吓。」
「麵包囉，有咩特別？」
「我家姐由細到大最講究就係食麵包，而家竟然買埋晒呢啲垃圾麵包。」
「你到底想講咩呀？」
「你擘大眼望清楚呢度，家姐知你鍾意靚裝修，同你一齊買完層樓返嚟，每件傢俬每塊瓷磚都去幾十間舖頭格到最平最靚先買。你話佢小小事就發脾四，但就係因為佢為你做咗好多小小事，你先可以無後顧之憂咁去創業喳。」
一個月後，超級市場內。
推著購物車的她在一大堆麵包前面駐足良久，正當準備拿起想要的，突然有人從後抓住她的手。
「唔好再食呢隻啦，都唔係你自己鍾意。」
她回頭一看，是羅永聰。
「我鍾意咩關你乜嘢事？」她狠狠鬆開他的手，卻其實又很想念那隻肥手的溫度。
就在這時候，有個男人走過來，目露兇光。「你想點？」
「你邊位呀？」羅永聰盯著這位不速之客。
「我係佢朋友，」兇男說。
「我係佢男朋友呀，」羅永聰理直氣壯。
「我唔識佢，」她說，然後便推著車走到收銀處。
看著她的身影越走越遠，羅永聰大聲說：「你同我企喺度！」
聽見有人這樣高叫，超市內的顧客開始圍圈起來，她也不由自主地停低。
羅永聰慢慢走過去，跟著毫無預兆之下，在她面前跪了下來。
「癡咗線咩你，」她說，典型粵語唱片對白。
「嫁畀我，」他說，典型粵語唱片對白。
「哎唷，戒指都冇隻，係我就唔鬼嫁喇。」有個路人甲大媽這樣說。
羅永聰在自己的西裝袋裏掏出一張卡，說：「我同你一齊咁耐，都冇畀過啲咩你，但如果我真係買隻戒指畀你，可能你又會話我嘥錢。除咗呢張附屬卡，我真係諗唔到畀咩你。」
路人甲大媽眼睛亮起：「呢張咪巴打銀行嘅信用卡？於指定日常消費商戶包括全線超市有現金回贈，仲要不設最低消費額喎。」
「以後我淨係想每日都望住你食你鍾意食嘅麵包，」羅永聰熱淚凝眶，「你可唔可以畀個機會我？」
她控制不住自己的眼淚，哭笑不得地點了兩下頭。
「張卡仲有無限三個月零息分期，畀我都嫁啦。」路人甲大媽在最後關頭，終於講番句人話。
所謂珍惜眼前人，就是要你看重每一件她為你做過的小事；因為，只要是為你做的，對她來說，都是一件大事。
萬寶龍戒指 在 萬寶龍戒指-PTT/DCARD討論與高評價網拍商品-2021年11月 的推薦與評價
萬寶龍戒指 在-PTT/DCARD討論與高評價商品，提供萬寶龍鋼筆、萬寶龍鋼筆系列、萬寶龍皮帶在露天、蝦皮優惠價格，找萬寶龍戒指相關商品就來飛比. ... <看更多>