#在日落前交換日記
星期一至五 5-6 叱咤903
阿檸 - 毒檸王國
【為《銀魂》乾一杯】
會長 檸,
講起《銀魂》，到今時今日仲係有好多人唔明白佢究竟有咩好睇既地方。
有啲人喺電視間唔中睇咗幾集，覺得都幾好笑丫，不過有啲無厘頭，純粹係好笑囉，未至於係神作囉；有啲人嘗試由頭開始睇漫畫，睇咗個開頭無耐性睇落去，覺得太無聊太唔知噏乜；我好明白呢兩種感覺，但係我敢講，如果我喺好多年前無認認真真開始睇過《銀魂》，會係我人生嘅遺憾，我更加唔會係依家嘅我！
喺我心目中，動漫嘅神作有好多，漫畫家之中嘅鬼才都有好多，但係統統都比唔上銀魂，比唔上空知英秋先生。
例如劇情充滿智慧同人生哲理嘅《全職獵人》，佢比起《銀魂》少咗一份濃厚嘅人情味；
例如非常熱血，睇到人瘋狂又笑又喊嘅《One piece》，佢比起《銀魂》少咗一份人類社會嘅真實感；
例如有型有款，角色突出嘅《死神》，佢比起《銀魂》少咗一份對人與人之間關係嘅細膩描寫；
至於講到好笑，同《愛生事家庭》，《稻中兵團》等等作品比較，佢嘅瘋狂程度有過之而無不及，而且仲能夠將搞笑完美融入認真或者感人嘅橋段；
每一套作品突出嘅地方，你都可以喺《銀魂》入面搵到，透過不同處境式嘅小短篇同認真戰鬥嘅大長篇，你同角色能夠建立嘅朋友關係亦都比起任何漫畫深厚。
睇過《銀魂》，你望住你每一個朋友，無論係唔認真嘅萬事屋，奇形怪狀嘅真選組，充滿傳奇嘅吉原，定係波譎雲詭嘅春雨，你都會見到每個人背後嘅故事。
當你知道喺你嘅人生，又或者佢哋嘅人生入面，每一個人都係披荊斬棘，跨過各自嘅高高低低，喺喊同笑之間搵到自己嘅生存之道，踏上自己嘅康莊大道嘅時候，你就會學得識喺任何時候都要堅強，唔係要堅強俾人睇，而係喺心入面要堅強 － 只要重要嘅人喺身邊，雖然大家嘅艱難道路都有所不同，雖然無人幫到你行你嘅路，但係只要喺埋一齊，有相濡以沫嘅豬朋狗友同你分擔痛苦，就有坐低瘋瘋癲癲乾一杯嘅理由。
萬事屋 Oscar
萬事屋903 在 漫事屋 的推薦與評價
少年ジャンプ《漫事屋》主題曲（少年JUMP） 曲、編、唱： 黃瑋中Herman Wong 詞： 阿檸 叱咤903《漫事屋》主持：阿檸、HERMAN、黎特、綿 羊 星期六晚22:00 - 23:00. ... <看更多>