《我的初老症狀》
1）開始接受到畀啲細路叫姨姨。
幾年前真係覺得叫姨姨難聽過粗口
但近呢一年真係開始認命啦，
開始覺得仲叫自己姐姐面皮太厚啦。
（因為有次朋友話佢同女講介紹個姐姐你識
點知見到我大嚇一驚，個女以為姐姐係大兩三歲嗰種）
2）打開IG都係朋友結婚相、BB相。
依家每日睇IG不停碌都係唔同朋友嘅BB。
「阿邊個個仔識爬啦」「阿邊個個女兩歲啦」
好多朋友聚會變成探BB聚會，姨姨很忙。
3）新歌聽極都唔入腦，舊歌一播就唱到。
自從無做電台就更加同新歌愈嚟愈遠，
依家聽派台新歌個playlist，聽整都唔入腦
都係聽番舊歌比較自在舒服，聽個前奏就識唱㖭！
4）啲新晉明星藝人都比自己後生太多。
新人大多數都係細過我都唔出奇，
有啲好似入行好多年嘅藝人原來同自己差唔多
例如：陳凱琳原來同我同年（月份仲細過我）
裕美個Yamete搭錯車明明好細個聽，原來佢大我三年咋。
5）食唔到太飽、太甜、太咸、太濃味。
慢慢覺得甜品太甜，出街食飯太咸。
詳情請參閱舊文《25歲後我的黑洞胃消失了》：
https://bit.ly/36BecYs
6）坐地下腰會好痛啊！
有時去朋友屋企無櫈坐要坐地下
坐完起身條腰真係好痛。
終於明白以前點解要讓啲長輩坐挨pan櫈。
7）出一日街會好攰。
以前喺街hea足一日，由朝玩到晚都無事
依家由中午出街，去到傍晚已經開始攰
係身心都攰，要搵間餐廳坐下。
終於明白點解以前同我媽我姨出街，
行一個鐘就話要搵間cafe坐嘅感覺。
8）買護膚品毫不手軟！
（以下為本人的真人真事）
買個$400嘅袋我諗完都係唔捨得
轉頭見到枝$600嘅精華，個腦無諗過嘢
就行咗去畀錢啦！
9）著衫要以舒適為主！
以前可以著埋啲奇怪質料嘅衫
刮住皮膚、箍住條頸個肚都可以出到街
依家一著上身就想除番落嚟
買衫第一件事睇質料，都係舒服重要啲。
10）開始可以同買菜阿姐搭訕。
以前買衫買野最怕見到售貨員行埋嚟
去買菜都盡量快速買完就閃人，
見到唔知係咩菜咩瓜都唔敢開口問。
依家？有時我會自己問阿姐咩菜靚啲㖭。
此時此刻，有誰共鳴？
如果你都對以上嘅初老症有共鳴或補充，
留言畀我分享下，以下開放 #老人圍爐區
IG：@hkgirlfriend
FB：港女友
