［一蚊雞］呢位分析員，話美國航空目標價係1蚊，即係跌9成
1. 一路都話，做大行分析員係娛樂事業（我而家唔算係分析員，以前係）。舊文寫過（https://bit.ly/3d9clvM），基金經理一日收幾千個電郵幾千份報告，你點stand out？一係人人話買你話沽，人人話跌一半你就話跌九成。至少人地會開嚟睇。分析員嘅嘢，一將功成萬骨枯，不成功變成仁。萬一你中咗嘅咪神仙！唔中嘅，自然有方法去開脫。中間嗰啲，係永世冇人理嘅。你係唔會點大錯，但冇人記得你。所以成個機制都係鼓勵人嘩眾取寵的。冇料固然要嘩眾取寵，但有料都要
2. 所以你耐唔耐見到有啲好爆嘅報告，因為爆先上到頭條。同你講下年恒指升一成冇人理你，跌一成都冇。但你話下年10萬點，或者下年10000點，就有人訪問你。同一道理
3. 爆嘅報告，睇好嘅有神華（1088）100蚊目標價（https://bit.ly/35qACed），睇淡嘅有通用汽車0蚊目標價（https://abcn.ws/2VYvJWz）。留意前者係UBS分析員，唔係普通嘍囉。後者係德意志，並唔係沽空報告。近年少少嘅，當然有工銀國際國泰目標價6蚊（https://bit.ly/3flqNTx）
4. 首先想講嘅係，其實呢，大大話話做咗十五年分析員，獎都拎過（新城豬肉獎都係獎），但我到而家都唔知咩係「目標價」。當然一般目標價都係有時限嘅，多數係12個月，咁會好啲。但都仲係解答唔到我嘅問題。
5. 即係，當而家有人話2021年恒指「目標價」係30,000點，咁即係點？同情地理解，即係呢個係fair value．咁如果升突咗咁點？係咪沽空？分析員又好似話唔係架喎，九成到時又會調高—但又即係，如果未夠12個月就調高嘅，咁有何意義？
6. 另外，如果而家20000點，有兩個分析員，阿牛同阿熊。阿牛話下年恒指目標價30000點，阿熊話10000點。結果恒指下年先見30000點再跌到10000點，咁阿熊出嚟鳩威就梗啦，但你跟佢沽空，應該好早輸仆街投降。但同時地，阿牛一樣可以話自己料事如神喎，咪話30000點，到咗啦！咁即係佢兩個邊個醒啲？如果先見10000再見30000又點？
7. 實不相瞞，本人都拎過呢啲獎，唔係買獎的，亦唔係基金經理投票。係彭博之類，真係睇啲分析員目標價，然係睇股價表現。本人拎過香港十大是篤癖架。但即係，不過因為當年隻光大（165）升到癲咁解。
8. 講咗咁多，目標價呢啲嘢，近乎係廢嘅。講真的。你問分析員都會知，你問基金經理都知，佢地著眼係入面估嘅數，同埋講嘅嘢。但媒體當然鍾意睇個目標價，因為讀者鍾意。
9. 講返份報告（https://bit.ly/2Sw0yjs），出嗰時12蚊，目標價1蚊，即係跌92%。你話點解唔寫爆煲？又唔係喎。作者認為，公司唔會死，不過股東會死！即係，最後政府救，但當然係低價入股，然後將原本嘅股東全部dilute晒。政府救好多時都係咁架啦，唔通高價買仲要畀你賺錢？所以你見侵侵雖然打晒開口牌話波音不能倒，但波音死都唔肯畀政府救，寧願自己嚟（得閒再寫）。因為畀得政府入嚟，啲高層花紅呀之類一定泡湯。
10. 拿，寫嘅分析員，我望過下（https://bit.ly/2zRI1HD），廿年經驗，CFA（扯，而家炒栗子嘅都CFA啦），睇航空公司都十年經驗，唔係工銀嗰位咁客串啦（https://bit.ly/2yn2SSQ）。
11. 最後舉多個例子．工行份報告，普遍都畀人覺得政治動機，講得就講。但你咪撚理，佢8月寫因航目標價係6蚊，全城最低最淡 — 之後今年因航真係跌到7.5喎！未到佢目標價，但佢應該算最準。咁你話佢唔識嘢定其他一大堆call buy嘅唔識嘢？
12. 咁你話，喂，個市跌啫。係丫。但成班call buy嘅，升嗰時又唔會話「個市升啫唔係我本人叻唔使加人工出花紅」。亦所以有啲行唔用BUY SELL HOLD（＊），用outperform underperform，相對於指數嘅表現。但，咁你個分析員咪要估埋個市升跌跌先整到目標價？又或者，你跟個吼時view，有條叫策略師嘅茂利（正係我在星展做嘅嘢），明明乜都唔識但又要play the orchestra，佢咪會整個指數目標價—不過佢郁之前又唔會話你知。所以都係把托。
（＊）又記住金句，是真的，行家必知。BUY即是HOLD，HOLD即是SELL，SELL即使爆煲。
———————
版務：收費專欄已推出，支持埃汾高質文章。幾舊水睇三個月，一星期三篇
請去呢度訂：bit.ly/2wVXndj
課程編號填: CC01
科咗水後後有Login及Password畀你
逢一三五入去 homebloggerhk.com （見到就睇到《事先張揚》），亦睇得返以前嘅文。一般我都係會黃昏出文嘅。
美國航空目標價 在 哪隻航空股最值得購買？財務發展最穩健的航空公司就是它！ 的推薦與評價
隨著疫情的發展所有 航空 類股票的股價都被重創今天主要影片會帶著分析幾家 ... 最值得購買的以及我想會購買這隻 航空 個股的原因準備好護照就能投資 美國 ... ... <看更多>