【何麒的生活隨筆】
Hoki the Kongner：Podcast 新手入門
之前嗰兩個星期我分享咗啲有關外國EDC嘅野，今個星期我想轉下話題。我係果種出街唔聽野會死人嘅人嚟，所以我平時出街個袋入面，一定會有對耳機，坐車個時隔下啲雜音都好啊。不過搭車嗰時唔一定係聽歌或者收音機，聽吓Podcast都係一個好嘅選擇。
我人生第一部智能手機係元祖iPhone，姐係最舊最舊行2G嗰款。嗰時係2012年，人人都用緊iPhone 5 行緊 iOS 6，而我就拎住部iPhone 2G咩App都裝唔到，所以嗰時我唯一可以做嘅就係打開個Apple Podcast 睇下有咩Podcast聽。去到而家，我每日搭車番工果陣，都會聽下Podcast攝下時間，聽下啲英文節目當係練習英文聆聽同埋說話，重會聽下啲法文Podcast嚟學法文。
咁大家可能會問，究竟Podcast 係咩黎呢？其實Podcast呢個字就係係“iPod+Broadcasting”混合出嘅新字嚟嘅。成個概念大概好似電台節目咁，不過Podcast比電台節目更方便嘅地方在於，電台節目係需要定時定候咁準時去聽，如果唔係就會Miss咗，不過Podcast就唔同，你可以下載唔同嘅Podcast節目落你手機度，當你想聽嘅時候先開黎聽都無問題，而你重可以訂閱唔同嘅Podcast節目，只要你喺你嘅Podcast App 入面訂閱咗嘅嗰嗰節目嘅話，喺節目出新一集嘅時候就會自動下載。不過Podcast 節目同電台節目有少少唔同，電台節目主要係比較多元化同大包圍，咩都講下咁樣，但Podcast 節目通常比較專門，可能專門講某啲興趣，例如我成日聽嘅講文具同埋講F1嘅節目咁。喺Podcast節目入面有時連啲清談嘅節目都可以傾成兩個鐘，而呢啲節目大多都只會喺同一個話題上進行深入探討。
講咗咁多開場白，咁到底Podcast 要去邊度聽呢？近呢幾年外國越嚟越多獨立Podcast，連聽Podcast 嘅平台都越嚟越多。如果你係用蘋果手機嘅話就可以去原生嘅Apple Podcast App度聽；而如果你用嘅係Andriod系統嘅智能電話，你就可以去Google Podcast 度聽。除咗呢兩個平台之外，有啲第三方嘅程式上面都會有Podcast嫁，例如由上年起Spotify 就開始有Podcast可以聽，Podcaster 亦都可以擺自己嘅節目上去播。重有另一個平台就係我經常用嘅Overcast，呢個平台既有手機版又有web版可以俾大家用嘅。
當你打開咗個平台之後，可以搵啱自己嘅節目黎聽，亦都可以用RSS feed連結去搵節目聽。我聽開某啲外國嘅節目都係比較少眾，都係講某啲興趣嘅，係比較專門而深入。而近呢幾年逐漸有啲大嘅媒體公司開始做埋Podcast賺埋廣告費。而喺我寫呢篇文嘅時候，我亦都發現原來香港都有人做Podcast，有啲仲做到四百幾集，重長壽過外國添。
最後喺度介紹幾個我長期追開嘅節目啦：
1. Bandrew says podcast
呢個節目除咗有聲音版之外仲有Youtube版，通常星期一會更新。你當佢係一個網絡界嘅一週新聞回顧同埋教人點樣錄音。另外佢有一個Youtube頻道係做錄音產品開箱。
2. F1:Beyond the grid
呢個係F1官方整嘅節目，每個星期都會訪問一個同F1有關嘅人，有時係名宿，有時係現役車手，有時係車隊領隊。佢地會講番自己成長嘅經歷同埋一啲趣事，而呢啲野你係賽場上係唔會睇到，係呢個Podcast 你會睇到個啲業界人士鮮為人知嘅一面。
3. The Nib Section
呢知節目係澳洲一個玩鋼筆嘅社群整嘅節目，每隔一個星期左右就會更新。每一集佢地會探討一個文具嘅話題，有時會講下唔同紙質，有時會講唔同筆尖嘅材質，有時會講點樣調校筆尖，同埋佢地會係筆展度做一個Live嘅節目同筆展嘅參加者互動。
4. Brexitcast
英國脫歐就越演越烈啦，10月31號嘅限期都就黎到。呢個節目係由BBC制作，不斷緊貼關於脫歐嘅新聞，講番發生緊咩事，同埋有時會請啲嘉賓上去討論下會點樣發展。不過呢個節目個門檻都有點高，你首先要明白英國個政制係點樣，有上下議院，有邊啲黨派同有咩人物，同埋歐盟嘅代表人物都要識先聽得明。
（本欄逢周三更新。敬希讀者垂注）
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-
HappyKongner 招稿喇！！！
我哋嚟緊會喺逢星期五加設 【Kongner投稿天地】 ，俾廣大Kongner 弟兄姊妹能夠有發表佢哋意見嘅地方，亦都可以鼓勵大家多啲運用自己嘅闡述能力。
有興趣嘅朋友歡迎直接Facebook Send Message 俾我哋，又或者Email 去 happykongner@gmail.com 同我哋傾都得。
期待收到大家嘅鴻文大作！
納稿標準：合乎邏輯，文句通順，言之成理即可，不過編輯部同事比較嚴謹，大家自己小心。
第一部智能手機 在 GadgetC - iPhone 12從Google Pixel手機竊取了下一個重大 ... 的推薦與評價
關於蘋果智能手機功能的傳言得到了蘋果已申請的各種專利的支持， ... 我們期望高端iPhone機型在後部配備LiDAR傳感器，但這是我們第一次聽說在其前部裝有類似技術。 ... <看更多>