《我老細係天后 (The High Note)》#睇戲看世界 #MrBusiness
踏進久違了的戲院，今次欣賞一套輕鬆小品。
戲名已交代主要劇情 — 我老細係天后，仲要係拎過最多次格林美獎嘅國際巨星。身為小助手，同天后有亦師亦友關係，天后有時放低身份，會同自己分享心事，但有時又太后上身，持高高在上地位撻自己，份工非常惡啃。而小助手本身有音樂才華亦有夢想，希望有日天后會幫助自己上位。劇情唔透露太多，不過我寫包單，淨係入去聽歌都值回票價。
咁現實世界裡面，如果老細係名人明星，又會係點呢？我有個朋友，係一位名人嘅私人助理，難聽少少即係做阿四。
雖然佢老細唔係天后，不過都叫做有演藝圈背景，然後嫁咗有錢人上岸嘅闊太。先講下好嗰方面，同老細出入會有名車接送，去活動亦見唔少名人明星，overseas trip更加包食包住包玩。不過講到我朋友最開心嘅，莫過於老細手指罅漏出嚟唔要嘅名牌手袋同化妝品，同埋佢結婚時收到有夠份量嘅人情。作為打工仔，逗住糧踏足到紙醉金迷上流世界，見見世面，份工係幾吸引。
不過做得私人助理，要預咗無晒私人時間，全年無休隨傳隨到。老細心血來潮嫌悶，你要訂機票陪飛外國一轉；老細半夜三更肚餓，你要落沙田買雞粥送外賣。不過呢啲duty都唔算棘手，最棘係要完成高難度任務，例如幫手撲1000盒半島月餅送禮、買韓星演唱會握手位、新iPhone第一日就要買到。你可能以為好小事啫，全部用錢就解決到，但係買月餅，採購完仲要負責埋分派；搶演唱會飛，係要搶到尾場十連位；買新iPhone，仲要將資料由舊機過落新機......所以要賺呢份糧，要有十八般武藝，認真唔簡單。
不過其實每份工作，都係睇當事人自己鍾唔鍾意。就好似私人助理呢份工，人工唔算特別高，外人睇落亦非常難啃，但我朋友就好enjoy其中，全因份工帶到俾佢金錢以外嘅成功感。咁唔怪得之當一份工無咩吸引之處，先會用「人工高」成為唯一力sell賣點了。
圖片來源 : 我老細係天后電影劇照
