事實三套電影都製作嚴謹，非常出色，喺舊年嘅電影頒獎禮各有不少提名同獎項，已經令人注目；今年上畫雖然受到疫情影響，但係都做出成績，最重要嘅係，起碼可以吸引到觀眾入戲院睇戲！！！三套電影亦不約而同令觀眾認識／喜歡一啲新（或舊）嘅演員同導演名字，尤其是演員，有新嘅臉孔，有新嘅號召力，我哋嘅電影先可以繼續行落去，發展落去。
當個個都鍾意喺屋企睇Netflix,即係話，大家睇外國電影或電視劇比起以前多咗好多，又即係話，大家睇高質嘅嘢多咗，眼界闊咗，要求亦會高咗。觀眾唔滿足屎尿屁爛gag, 觀眾追求合理邏輯嘅劇本同人物性格，個個都變身影評人，睇完覺得點可以長篇大論咁討論。咁睇住香港製作，就會出現汰弱留強嘅局面。
所以見到呢三套電影嘅成績係非常欣喜，（同期仲有《死因無可疑》都有相當不錯的票房）證明香港市場其實可以有好多唔同題材同風格嘅電影，唔係只著重「崇尚本土」，而係切切實實喺編劇演員導演同製作上有質素有心機嘅電影。尤其是當一套電影「只係得本土市場」，佢嘅製作成本極有限制，因為票房好難滋潤成本，所以投資方只能將製作費壓至最低。一套六百萬成本嘅戲要收到一千五百萬嘅票房先至可以回本，製作之艱難可想而知。過往幾齣首部劇情電影嘅票房成功，俾人錯覺係三百萬五百萬就可以拍到好戲；情況就好似我哋以前最早自己搞舞台劇，將自己屋企所有嘢拎晒出嚟做佈景道具，叫晒自己屋企人幫手，個個唔計較唔收錢或者收個友情價，萬眾一心做好件事，但呢種製作模式一次（或首次）就好，並唔能夠發展成為行業。（可以有小劇場，但都想睇歌劇院嘅大製作。）
仲繼唔繼續做電影？香港電影仲有冇得做？呢個係我同朋友成日討論嘅問題。（我心諗：「下？我啱啱先入行咋喎，點算呀......」）
難做都要繼續做，難行都要繼續行，唯有同自己講，做有質素嘅作品先至不枉此行。唔係叫觀眾硬撐，但係我哋仍然要相信好戲會有好報。
最鍾意邊套唔係最重要，最重要係繼續有香港「好」電影，越多越好。
#雖然戲院要暫時關閉
#重開之後繼續去睇戲啊
#睇三寶仲要睇死因無可疑同埋睇戲棚
#多啲嚟密啲睇
https://www.hk01.com/%E9%9B%BB%E5%BD%B1/496585/%E7%B6%B2%E4%B8%8A%E7%86%B1%E8%A8%8E-%E9%AB%98%E7%99%BB%E5%85%88%E4%B8%89%E5%AF%B6-%E9%82%8A%E9%83%A8%E6%9C%80%E5%A5%BD-%E9%9B%BB%E5%BD%B1%E4%BA%BA%E6%8A%95%E9%81%B8%E5%91%A2%E9%83%A8%E8%B4%8F%E5%80%8B%E9%A6%AC%E9%BC%BB?utm_source=01appshare&utm_medium=referral
睇三寶仲要睇死因無可疑同埋睇戲棚 在 【《死因無可疑》－ 海報】 「用善意踏平的路 - Facebook 的推薦與評價
《死因無可疑》－ 海報】 「用善意踏平的路，也會通向地獄。 用惡意築的牆，也可作為防波堤。」 –《黑暗之家》貴志祐介日本小說家死因無可疑海報…驚懼登場… ... <看更多>