【但係⋯⋯】
四個由太子轉場去尖沙咀嘅女仔上車，講完目的地後，坐中間嘅女仔爆出一句：「佢真係正仆街黎架！」我以為已經係結論，但原來只係開始。
絕無歧視嘅意思，但多數四個女性上車，係會比四個男人吵耳，而飲醉左嘅女仔，聲音又格外尖。接下來嘅時間，我就好似比幾把刀輪住插咁。
「係囉，我覺得佢真係好賤呀。」
「我都覺。」
「係男人都衰架啦。」
「April個男朋友都係咁賤。」
「你唔好喊啦。」
坦白講，我真係分唔到邊個打邊個，咁強勁嘅環迴立體聲，仲要各有各講，聲叠聲。逐漸，我發現開始係四個人傾計，但有時係二人交流，有時係一人數臭，但無人理會。好多句子都係講完又無人理，四個人各自發言，完全係兵荒馬亂嘅感覺。救命！
「但係⋯⋯我真係好鍾意佢。」中間個女仔喊住口講呢句，忽然間全場靜一靜，然後焦點又返去佢度。
「吓，但係佢咁賤。」
「咪係，你今次第幾次復合話？你想幾時再散過？」
「醒下啦，你今日25歲喇，仲要拖幾耐。」
「咁始終一齊左咁耐，我習慣左有佢喺度嘛。佢以前對我好好架，唔鬧我果陣又好細心⋯⋯」原來又係一個沉浸喺昔日光輝嘅白痴。
「到喇，44蚊。佢真係對你好佢就應該一齊坐喺度啦。bye，車頭落車睇住唔該。」
落車之後，車箱忽然靜得有d唔自然。車外隱約傳來一句：「佢真係正仆街黎架！」我認為，我相信，呢個仆街好男朋友仆街好男朋友仆街好男朋友仆街好男朋友嘅循環，會不斷咁輪迴，直到永遠。
除非落左車果句其實係話我啦😂
#lazytaxi
#的士
#taxi
環迴立體聲意思 在 音響效果的選定 - Mobile01 的推薦與評價
不同音效設置時stereo ,Dolby, DTS, Pro Logic II , PCM 等... 差異在哪裡?? stereo: 立體聲輸出，僅使用主聲道(若有設定重低音則是主聲道+重低音) ... <看更多>