《Indie唔係可以被剝削嘅同義詞》陳心遙
《信報》2017年10月25日《視線所及》專欄
有朋友因為寫論文，打電話嚟問我對於Indie Bands同Indie Singers嘅睇法。如果係出於研究或者論述，咁樣劃分冇所謂，但如果身為做音樂嘅人，自稱Indie意義不大。而家無論係製作、宣傳、銷售都比起以前輕易同方便。幾十年前嘅獨立樂隊，喺冇唱片公司嘅支持下，走去錄音、印碟、拍MV、搞演唱會一腳踢，係一件難過登天嘅事。而家多得互聯網同便利嘅電腦器材，自己屋企搞晒錄音混音拍片反而變成最低要求。自家製雖然喺聲音質素上同專業製作有距離，但係對於好多喺社交媒體或者串流軟件聽歌嘅新一代嚟講，其實又分別不大。
有分析指Indie係指Operation上嘅獨立，冇唱片公司嘅財政人力支援。音樂上嘅另類或非主流會用上Alternative一詞，我都同意。只要你肯去搵，唔係靠電台或者新媒體幫你揀歌，其實香港真係有唔同種類嘅本土音樂，由藍調、爵士、嘻哈、金屬搖滾、數字搖滾都有，不過真係屬於少數。喺呢個錢字當頭嘅社會，一般人嘅思維係：「唔紅」等於「唔好」。所以好多音樂人都不自覺會用當下嘅受歡迎程度嚟衡量自己價值，無可厚非。
但係如果真係想為indie下定義，喺而家嘅環境之下，勇於做自己想做但市場唔受嘅音樂更有意義，無論係曲風定係歌詞，「受與唔受」其實係一個片面嘅假象嚟，當中涉及政治同商業利益，同歌本身好唔好聽都冇乜關係。
有好多人，特別係行業中人，都嚮往八十年代星光熠熠，搵大錢嘅年代。我唔否認嗰陣嘅曲詞水準優秀，歌手嘅技藝超班。但我舉個例子，如果你今日去外國交流，每個國家或地區嘅人輪流彈唱一首歌代表自己嘅出生地，你會點揀？你應該會揀Beyond嘅《海闊天空》或者ToNick嘅《長相廝守》，定會揀八十年代街知巷聞嘅日本／歐美改編歌？人哋一聽就有呢個疑問，呢首歌真係屬於香港嘅咩？
咁樣睇，而家嘅樂壇冇錯係冇咗星光，行業又搵唔到錢，但起碼好多主流歌手或獨立音樂人都係我手寫我心，發出屬於呢個時代香港嘅聲音。
Indie喺香港可能仲有多一重意義，就係代表冇經理人，唔識為自己利益爭取。啱啱聽到有個歌手朋友被公關公司邀請出席一個活動，因為個主題同佢最近嘅新歌類似。公司說服咗我朋友為宣傳，唔收錢出席兼要唱歌。朋友綵排都做埋，但係公司最後因為活動時間緊迫取消環節，白白浪費人哋妝、頭、衫同準備演出嘅心血。朋友，Indie唔係可以被剝削嘅同義詞呀！
# Indie唔係可以被剝削嘅同義詞 #獨立樂隊 #獨立歌手 #beyond #海闊天空 #tonick #長相廝守 #信報 #陳心遙
無可厚非同義詞 在 還需要對抗氾濫的作弊行為。 . 青少年網球賽事由於資源有限 的推薦與評價
... 無可厚非」 . "rife of" 為「充斥」，同義詞為"full of"。而"common"、"widespread" 雖然意為「普遍的」，但若語氣符合，也能表現出負面事物氾濫的 ... ... <看更多>