關於 漠河 冇 聽 ，我們在網路上蒐集到這些相關的討論、資訊與評價

【我最懷念嘅雪景❄️】

Facebook當年今日話我知，兩年前嘅今日，我一個人喺哈爾濱過聖誕。好諷刺，果個係我人生中最有氣氛嘅白色聖誕。本身冇咩朋友，從來喺香港都唔會有咩聖誕氣氛，雖然喺中國冇咩「聖誕節」呢個概念，但四周圍一片白雪、冰封嘅景色，平安夜一個人喺哈爾濱條步行大街上行，竟然何其溫暖－－係凍到病咗，至今依然好難忘當日嘅景色。

有真切體驗過雪、喺雪地生活過嘅人都知道，落雪並唔係你想像中浪漫，仲難頂過落雨，尤其去到哈爾濱甚至漠河，最低試過零下32度，眉毛頭髮都結埋冰、暖包都硬化，絕對唔係好受，又不得不承認，雪後藍天嘅環境係極靚。

問起我睇過最靚正景係邊度，講真喺好多地方落雪都唔係好受－－喺拉脫維亞行行下山遇到暴風雪唔上唔落，真係舉步維艱，最靚都係東北呢次，除咗哈爾濱，吉林霧淞島都係高潮，好好彩俾我睇到霧淞，晨光初現果一刻堅係感動到眼濕濕－－hold住唔好喊呀，會結冰架！😂

至今，呢幕唔止係我睇過最靚雪景，都係我人生睇過最靚嘅景色之一。

冇諗過，事隔兩年，一切都唔同曬。無論係疫情，還是政局。

成日都話，唔講其他，獨論景色，中國奇詭美景處處，要搵靚景絕不比歐美失色。以前成日會返中國玩，事隔兩年後，一切都唔同咗，即使疫情前嘅一年前，都冇聽到身邊有咩人會返中國玩，甚至返深圳，大家連回鄉證都唔續。

再多一年，一個疫情打散曬一切，每年除咗紅葉，都會想搵個地方去睇雪，今年咩都冇曬，你有興趣可以去大棠睇紅葉，我就不了。睇返呢啲兩年前嘅相，曾經會俾美景震撼到嘅我、曾經果刻為著大自然奇觀感動嘅我，仿如隔世，果個真係我嚟嗎？今年好似冇咩做過、冇咩衝擊過咁。

好多人好樂觀咁講，2021年／2022年，我哋一定可以再去旅行嘅。即使真係可以再去返，一切仲會唔會一樣？

睇返呢啲相，都有少少唏噓啦。

預祝各位聖誕快樂。

霧淞島遊記同其他東北遊記可看留言連結。

📣文字工作者也得要吃飯，你的支持是我的原動力。請給點心意，給小弟寫更多好文章，歡迎透過payme課金以作支持🥳：https://payme.hsbc/jackyhei
或使用QR code：https://bit.ly/3a9wOzy
或透過Paypal捐款：paypal.me/jackyhei

🙏感謝各位支持，小弟執筆之原創小說私人貨存已全部售罄，有意者可到此文章內的連結購買：https://bit.ly/3dRuUWu

【IG請follow】www.instagram.com/travelerwithmovie

【Backpacker咩人都有系列 #2：我同房有個七孔流血細路仔😱】

上文講起「廁所垃圾筒叉電」嘅Backpacker，咁講真Backpacker就唔一定係傳統Hostel果隻，搭長途巴士、搭火車都會遇上好多奇人怪事，漠河呢單都算經典。

話說我當年去全國最北、接壤俄羅斯邊境嘅城市漠河，由於機票貴得嚟都唔係咁易俾你買到，搭火車就成為最好選擇－－雖然都一樣唔係咁易買到。漠河冬天天氣太極端，零下三四十度，對於一般遊客、尤其南方嚟嘅遊客，相信冇乜幾多人頂得順，都包括本身氣管唔好嘅小弟，咳到驚哮喘發作，而呢架火車，目測99%都係遊客。

由漠河去哈爾濱火車需時十幾個鐘，我搭通宵車訓一晚就到，有坐過大陸火車，大概都知道環境好極有限，我坐二等有三層果隻，同Cabin嘅另外四個女仔都病到九彩。留喺Cabin入面，唔病都屈到病，再加上火車開咗暖氣（出面講緊玻璃窗都凍到結曬冰），令氣溫好乾燥，本身已經好咳嘅我，更唔舒服。

當你以為自己同同Cabin嘅女仔已經咳到極端時，奇怪事就嚟喇。下層本身就有個男人訓喺度，無啦啦走咗，而好快就有個明顯係Backpacker嘅男人，揹住個大背囊、抱住個細路行過。你知大陸搭車都冇乜人跟位坐，見有空位就放低個細路，而佢就唔知走咗去邊。我哋幾個你眼望我眼，唔知佢想點。大陸總係有好多你估佢唔到奇怪事發生，大家又不以為然。

細路一如我哋咁狂咳，我就坐喺Cabin門口個位，無無聊聊等天黑思考人生，點知個細路愈咳愈勁，面青口唇白，當我覺得唔多妥時，佢竟然一咳，噴到成床血，好快仲流埋鼻血，隻眼又紅曬，完全好似睇戲變喪屍前嘅樣咁，嚇到同Cabin幾個妹妹係咁嗌，我又真係問：「你還好嗎？」

個B好老積咁話：「沒事兒！」抹一抹啲血，又訓返低，其時成張床單、佢件衫都係血，然後好快訓著咗－－我唔知佢訓咗定暈咗定死咗。

佢對面個女仔望住佢：「需要找人過來嗎？還是找剛才的男人...？」

我都唔知點答佢，難得車廂啲人來來回回咁行，大家見到又冇人覺得有問題，而個細路不斷流緊鼻血，唔係好掂咁。

呢個時候，原本床位個男人返返嚟：「他媽的！甚麼事呀？」我唔知係個細路邊個，又唔識佢，呢個畫面我都真係唔知點答佢：「你認識他嗎？」

「他是我兒子！」

吓？咁都得：「剛才是有個背著大背包的男人帶他過來...」

「甚麼男人？只有我跟他兩個人！」

對面個女仔同我一樣反應：「那剛才抱他過來的是誰？」

「我哪知道是誰... 咳！」嘩頂，又咳到噴血，我信佢哋係一家人。

「你沒事嗎？」我又問。

「沒事沒事！」細路聽到又講：「我要睡覺呀！」男人幫佢抹咗成面血：「好喇睡一會吧！」細路好快訓著咗，咁個男人又唔理佢，自己血流披面咁走咗，我同幾個女仔都黑人問號。對面床個女仔想轉房，但全車滿座冇辦法，我依然坐喺出面思考人生，諗緊今晚點樣訓。

個細路訓咗冇十分鐘，背包男又返返嚟，而佢又一路咳一路流鼻血，語帶輕鬆：「哈哈，怎麼你也全身血呀？」再摸摸細路個頭：「你發燒喇！」佢望望我哋，覺得我哋傳染個細路咁：「唉，來，我們快走吧！」仲好好手尾咁拎埋佢張床單。

我唔知咩事：「剛才他爸爸過來看他後就走了...」

背包男：「誰爸爸呀，我就是他爸爸！」

對面床女仔：「你是他爸爸，那你剛才跑去哪？」

背包男：「我我我... 你管我去哪裡！」

對面床女仔：「這個位置是你嗎？」

背包男好嬲咁拎張飛出嚟：「看，是我的！」又真係喎，然後佢就抱走個細路，但證明唔到個細路係佢。

冇耐，原本（呢個情況似係白撞）床位個男人又成身血咁返嚟：「我兒子喇？」我唔想同呢班騎呢人傳話：「剛才他爸爸抱走了。」佢竟然話：「你怎不說我才是他爸爸呀？」對面床女仔：「我們說了，他說他才是小孩爸爸！」

「那個... 那我去找找他... 咳！」又噴血。

我唔知呢段咁混亂親子關係咩玩法，但噴血男同背包男同細路都冇再返過嚟，淨低一個仲有血漬嘅枕頭。

本身已經咳緊，加埋同房幾個女仔又咳，或者講成架車幾乎人人都咳緊，再加埋臨訓前呢三位人兄咳到成地血，我完全訓唔著。搭得長途火車，其實夜晚大家就算唔訓，都係留喺Cabin度hea，但呢個Cabin太過窄，咳住唔坐直根本冇可能訓得到，我半夜訓唔著打算出走廊坐，最壯觀嘅係，竟然全部走廊位full曬，個個係咁咳。

去個廁所成地都係血，相信係個細路同兩位唔知邊個先係爸爸嘅男人留低。如果呢件事發生喺今日、人人自危下，應該超恐怖。

直至我落車，都冇再見過呢家人，既想知道邊個先係真正生父，更想知道個細路最後有冇事，感覺上呢兩位人兄都係拐子佬...

漠河相關遊記可看留言連結。

📣文字工作者也得要吃飯，你的支持是我的原動力。請給點心意，給小弟寫更多好文章，歡迎透過payme課金以作支持🥳：https://payme.hsbc/jackyhei
或使用QR code：https://bit.ly/3a9wOzy
或透過Paypal捐款：paypal.me/jackyhei

🙏感謝各位支持，小弟執筆之原創小說私人貨存已全部售罄，有意者可到此文章內的連結購買：https://bit.ly/3dRuUWu

【IG請follow】www.instagram.com/travelerwithmovie

【全中國最北嘅漠河到底可以有幾凍？】

事前聽講漠河有幾凍幾凍，但親身去到果吓，係就係凍，又冇想像中咁極端。

先前同大家介紹過漠河周邊嘅環境，咁漠河嘅市中心又係點、係咪真係咁凍？我又覺得同哈爾濱唔差太遠。

始終，哈爾濱大風，呢度冇風，即使-32度都不如-20度咁凍。當我喺松花江上面行，啲寒風兜頭吹埋嚟，真係凍到唔夠訓都醒曬然後極速又想訓、而去到睇冰雕又大風又俾冰包圍，隻腳就凍到冇咩知覺。試過真正嘅凍之後，我深明只要腳保暖，個身著夠衫凍極有限；隻腳唔暖，你著乜都冇用。

喺呢度體感分別不大，但物理上嚟講，又真係凍好多，例如濕紙巾我放最出果格即結冰，都如之前同大家分享，呼出水氣掂到帽同眼鏡都即結冰。

如果唔想太Chur來回都坐火車，去程嘅飛機係下午到（其實當地已經係夜晚）。因為Local tour第朝出發，所以有一晚時間喺當地。為咗試吓自己頂唔頂得順，夜晚出去行個圈。城市唔大，十零廿分鐘都行完，都冇乜好俾你行，感覺係幾蕭瑟（唔通夜晚零下三十幾度又冇人仲同你開鋪），完全係遊客中轉站死城，一如Alice Springs，一如Uyuni，呢度夜晚地面結曬冰，行路要好小心。都一如Alice Springs，一如Uyuni，你好明顯睇到遊客多過當地人，個個都係凍到縮下縮下，又想體驗下自己頂唔頂得順。

漠河自己都有個冰雕展，規模細好多，甚至有少少山寨，唔駛好似哈爾濱咁排兩個鐘玩一條滑梯，而且人跡罕見，滑梯任你玩。觀乎呢度朝早或夜晚都係咩都冇，加上天氣咁凍，我好奇，啲人喺呢度到底點生活？

就算我住嘅旅館，都係得老板爸爸媽媽兩個老人家留喺度，話後生唔出去北京、上海，最少都走去哈爾濱呢啲大城市，邊有人會「留守邊疆」？唔似Alice Springs或Uyuni天氣都仲頂得住，呢個一年有大半時間都係冰天雪地、零下三四十度嘅地方，去幾日感受下就得，叫你長住我諗都幾難頂得順。

人一世物一世，都值得體驗嘅。

【原創小說】
香港正式上架，各大書局均有代售，海外讀者亦可於網上書店購買，詳情請看：goo.gl/3g4Hk8

－

【自製南美明信片】
正式開售，購買全套可以向你寫點心意：goo.gl/Dfmpbc

－

【IG請follow】www.instagram.com/travelerwithmovie