邪惡在樓上（下）
上集：https://bit.ly/3dUekom
冇幾耐，夜晚，我忽然聽到小順淒厲嘅慘叫聲。
我忍唔住同阿治講：「你哋搞乜鬼？會俾鄰居聽到㗎。」
阿治聳聳肩：「小順想逃走，我哋畀少少懲罰佢啫。」
佢已經唔再講「女朋友」嘅大話，但佢唔講大話，比講大話更令我恐懼。
事後我無意中聽到班流氓吹水，先知道所謂嘅「少少懲罰」，係用火點著小順對腳。
我仲知道咗，原來之前佢哋用咗好多方法虐待小順，包括逼佢飲好多酒、唔著衫喺陽台跳舞（依加係冬天）、暈咗就用水淋醒佢……
我毛骨悚然，我意識到，如果我任由小順留喺度，將會發生更可怕嘅事。
所以，趁阿治同班流氓出咗去玩，我連忙趕去二樓，想放走小順。
但令我意外嘅係，我個大仔，最乖巧最勤奮嘅大仔，坐喺房門口。
我連忙問：「你喺度做乜嘢？你唔係應該溫書㗎咩？」
「阿治叫我睇住佢。」大仔指一指房間內嘅小順。
我好焦急：「你唔好理阿治啦，畀小順返屋企。」
「唔可以㗎，小順會報案，我哋都會坐監！」大仔捉住我隻手。
我呆一呆：「你哋？你都有份咩？」
「係阿治逼我……」大仔垂低頭，滿臉愧疚同後悔。
我已經唔想再問，大仔到底參與咗邊個部份，係強姦定虐待定禁錮。
只要大仔參與過呢件事，小順報案，大仔就前途盡毀。
我想同小順傾吓，我放走佢、私下賠償佢，佢可唔可以應承我唔會報案。
但我一行入間房，呢個希望就幻滅咗。
小順瞓喺地下，成腳都係傷口同膿，塊臉被打到腫晒，不似人形。
房間中瀰漫住排洩物、汗味，同傷口腐爛嘅氣息。
小順見到我，輕輕捉住我隻褲腳：「阿姨，我餓……」
我連忙問大仔：「小順點解會餓？我日日都有煮多一個人嘅飯菜，畀阿治拎上嚟㗎。」
「阿治啲朋友成日嚟，食晒啲飯菜。」大仔解釋。
我問：「咁小順幾耐冇食過嘢？」
「又唔係冇，我有畀啲牛奶佢飲。」大仔囁囁嚅嚅咁講。
我頭都痛埋，以小順嘅狀態，一離開我哋屋企，肯定要去醫院，醫院有咩可能會唔報案？
呢個時候，鎖匙聲響起，應該係阿治返嚟。
我連忙離開二樓，扮冇事發生。
之後，我間中都會畀啲面包畀大仔，叫佢餵吓小順。
我開始諗，我老公都知道呢件事，而小順有時叫得咁大聲，鄰居都應該聽到。
所有人都冇報案、冇出聲，咁冇理由要我嚟承擔責任。
我一直相信，大部份人選擇嘅路，就係正確嘅路。
而呢一次，大部份人都選擇沉默。
直到有一晚，阿治同班流氓慌慌張張咁抬住一卷毛氈，從二樓行落去，出咗門口。
我上二樓一睇，小順已經唔見咗。
我長嘆一口氣，默默清理成間房嘅排洩物同血跡。
第二日，阿治突然行入我間房。
呢一次，佢眼裡面嘅唔再係凶狠同輕蔑，而係深深嘅恐懼。
阿治惴惴不安咁問：「阿媽，我哋將佢擺咗入鐵桶度，封埋水泥，應該唔會俾人發現？」
「唔會掛。」因為我都希望唔會。
「咁小順會唔會嬲我？會唔會變鬼返嚟詛咒我？」阿治顛三倒四咁解釋。
原來，小順追緊一部電視劇，佢被禁錮時，曾經講起，好可惜冇睇到大結局。
所以，阿治就將嗰套劇嘅碟，擺埋落個鐵桶度。
阿治問：「我滿足咗佢嘅願望，佢應該會原諒我？」
呢一次，我真係講唔出「佢會原諒你」，因為我都冇辦法原諒自己。
一個月後，參與呢件事嘅某兩個流氓，因為一宗輪姦案而被逮捕。
落口供時，佢哋唔小心透露咗小順嘅事。
於是，成件事就穿晒，小順嘅屍體都被搵埋出嚟。
所有流氓都被捉起嚟，所有人都知道，我個仔係殺人犯。
我同老公只好辭職，搬家，隱姓埋名，唔再擁有以前嘅「幸福生活」。
但我以前，真係有幸福過咩？
揭破邪惡嘅勇氣，唔係個個人都有。
但邪惡，從來唔會因為沉默，而消聲匿跡。
－完－
真人真事改編自日本「女子高中生水泥埋屍案」，
少女被一班未成年人，監禁凌虐長達41天，死亡後再以汽油桶灌水泥的方式，棄置屍體。
禁錮期間，其中一名凶手的家人，曾發現此事，並參與送飯，但畏懼凶手的暴力手段，只叫少女快點回家。
鄰居曾聽見少女的慘叫聲，據說知情者超過百人，但沒有任何人作出行動。
將專頁設定為「搶先看」/ "See first"，最新故仔馬上睇！
我執到一本生死簿：https://goo.gl/ztyQzU
眼淚是珍珠：http://bit.do/eJ6MV
#短故 #短篇 #小說 #陳美濤 #廣東話 #粵語 #tomatochan #邪惡在樓上
