【沒有大台．只有平台】
一，尋日，幾個曾經申請「不反對通知書」嘅市民遇襲，其中有個我係都幾熟下。佢畀人打完都同我講咗兩句：「差佬響度，唔講住。」嘿，呢位朋友保釋當中，街上遇襲都只可以硬食，打不還手，冇計。
二，今朝，又聽到黃之鋒周庭忽然被押上警車。真係唔講都唔記得，聽日就係 831 。好似章回小說咁，欲知後事如何，請聽下回分解。
三，不過，近來都有同偏藍陣營理性討論，發現佢哋到今日仍然堅信「背後一定有大台」；講極佢哋都唔明。佢哋認為，資源分配一定係由上而下，即係「誰控制資源分配，誰就是大台」；佢哋呢種思維非常之根深蒂固。
四，即係同一班「藍朋友」相信，其實好多社會現象，包括市場，背後都一定有「大庄」，「大庄」之下有「中庄」「細庄」，層層而下，絕對唔可能係 organic ，唔可能係出於自發秩序。甚至乎，佢哋會覺得，就算係呢場運動嘅文字語境，都係精心策劃，所以先至會咁一致和諧。
五，我都有同佢哋講，其實呢兩個月，抗爭嘅一方偶爾都會犯錯，不過佢哋好快會修正過來。相反，政府同建制派就由上而下，上面嘅指令一錯，又或者冇指令嘅時候，就一錯再錯。有時我都相信，執行嘅，理性上亦都有好多指令唔可行，但都要夾硬去執行，反正有錯唔係自己負責。
六，我更加有解釋，抗爭一方就係因為有平台冇大台，資訊超級透明，所以參與其中嘅自己都要諗過度過；而且因為日防夜防「鬼推送頭」，所以大家好快就演進出一種直覺，又或者可以叫做「共識」嘅意念。
七，舉例講：「搞眾籌，金額可以去到成百萬美金，唔怕有人混水摸魚呃錢咩？」其實都出現過有騙徒乘機抽水，但好快就畀人發現。通常騙徒嘅所謂眾籌，冇經過一班參與者討論，無厘頭咁整個 GoFundMe 又話要做乜做乜，一係就冇人理，一係就好快被踢爆。
八，即係話，兩個月來，每件事透明度都高到不得了，只不過討論散佈社會唔同嘅團子同平台。冇人可以一次個監控，但又好神奇咁，好多人都參與得到。
九，題外話，今次社會運動，令唔少人忽然間覺悟到好多所謂嘅「非政府組織」，咩宣明會呀樂施會之類，原來好偽善。但更大嘅覺悟係原來要貢獻社會，要捐錢，唔駛假手於人，唔需要大台，而係要平台。
十，我更加有同班「藍朋友」講：「二百萬人上街，假設每人平均捐一百，都成兩億，其實真係冇乜陰謀。」
十一，「好，就當你講得通資源籌集，咁分配呢？點分配？邊個話事？」藍朋友問。
十二，其實，係每次募集資源嘅時候，都已經有清晰用途；先籌錢再諗點用，同諗到有乜需要，再籌集資源，係兩個截然不同嘅模式。前者，通常都有人終飽私囊，後者未件件都成大事，但成功機率高好多。其實，同樣道理用來分析資本市場行動，一樣適用。
十三，再講，今次冇大台社會運動，唔應該話係一個好超前嘅模式；因為自發秩序先係人類社會互動最原始最基本嘅模態！可能我哋當中唔少人嘅 formative experience 裡面，有太多由上而下，先獲取資源再思考分配，結果就有先入為主嘅信念，想像唔到冇大台點運作。
十四，假如有人以為，拉晒的搞事嘅人，就可以天下太平；一日未天下太平，係因為未拉到幕後黑手。我恐怕政府最少要拉十幾萬人。
十五，831 呢，我都唔知會發生咩事；大家留意連登同 Telegram 啦。
十六，Telegram 同連登嘅互動，令我發現一個有趣嘅現象：產生資訊同概念嘅人數，相對消費資訊同概念嘅人數，原來有個 Optimal 嘅比例。話說 Telegram 裡頭有「公海谷」亦有「頻道」，連登就更加係 CD-Rom 遠多於有戶口嘅活躍用戶。公海谷由於太多噪音，要發聲嘅人結果要不斷重覆同加強自己嘅聲音，反而不利於 deliberation，反而好似連登咁，雖然無發聲嘅旁觀者先係大眾，但旁觀者同參與者微妙嘅互動令到 deliberation 更加有條理。呢個亦係代議政制理想嘅原型。之前有讀者叫我講下 direct democracy vs representative democracy，呢一點就當交住部份功課先啦。
十七，最後，都係想講多句 831。根據過去兩個幾月觀察，遊行人數越多，過程越和理非，人數越少，最終就越多催淚彈。呢個現象有好多解釋方法：
十七．一，人多，警察更克制，更少警民衝突。
十七．二，人多，入面更多和理非，人少，剩底傾向都係勇武行動派。
十七．三，人多，和理非同時令警察更克制，亦都溝淡勇武行動派。事實上，次次幾十萬人大遊行，我都見到一個現象：每當勇武有少少情緒激動，和理非即刻靜落黎，勇武見身邊嘅人咁冷靜，又冷靜返。
十八，自發秩序裡面嘅群眾，唔一定係亂；有結構嘅權力，又唔一定係有效穩定。香港作為世界最自由經濟體，並唔係浪得虛名。今次運動反映，我哋社會嘅基礎有極強大嘅自發秩序同自行調節機能，阻頭阻勢嘅係乜，大家心照。
完
樂施會黃藍 在 文宣公海- 【偽善慈善機構對警暴冷眼旁觀請立即回應及行動 ... 的推薦與評價
1.宣明會- 香港九龍大角咀晏架街四號麗華中心二樓 · 2.無國界醫生- 香港西環德輔道西410 至418 · 3.樂施會- 香港北角馬寶道28號華匯中心17樓@Oxfam · 4. 奧比 ... ... <看更多>