感謝 Gary 朋友 Judy 分享昨天的探訪後感，並鼓勵大家將網上有趣資訊及新聞寄給Gary :
------------------------------------------------------------
今日多人到爆，locker用爆左要等，入物資條隊又打晒蛇餅，但我地由到達至離開只用了約兩個鐘頭，超乎俾想像嘅快。
Gary一見到我地好雀躍，佢睇落好精神，同之前最大嘅分別只係冇擸頭！大家都交換下近况，佢亦好關心出面嘅士氣。我話佢知仲有好多旁聽師、送車師、好多關心嘅人，佢知道後表現安慰。
同行M話自己血糖有Ｄ高時，Gary竟然讚賞裡面有營養師睇住飲食，所以一定冇問題又夠營養，雖然餸菜偏淡，但Gary覺得都ok。之但係雞翼飯得一隻雞翼…真係唔敢想像Gary嘅positive thinking有幾强！
Gary show俾我地睇佢畫緊嘅母親節咭，好似係上緊色既階段，係粉色系，好sweet嘅感覺！佢話希望趕得切寄出。
一睇到畫，我即刻話左佢聽Facebook page Like Japan shared左佢幅《機動戰士》水彩畫，有好大迴響；我仲講佢知有人話好有安彥良和嘅風格，佢聽到好開心！（不過佢唔知Like Japan呢個page，而家終於知喇！）Gary話佢畫高達紅彗星嗰幅畫係因為有得睇《機動戰士》，（佢仲有睇《東京喰種》），但就冇《進擊的巨人》睇。
Gary畫畫咁了得，佢透露左係佢細個時，父母幫佢報名參加繪畫比賽仲攞到獎，好鼓勵到佢向呢方面發展。佢最近用水彩筆寫書法，獄中雖然冇文房四寶，但就完全無阻佢練字！
有單唔知算唔算笑料：Gary試過叫太太幫佢入Ｄ美術書，點知懲教處話有祼體唔批！除左色情，佢話暴力嘅書都唔得。
我話咁點解高達又得？打仗好暴力喎! (其實東京喰種更暴力，打到七彩）佢話可能文字同畫唔同！？
講返生活，佢話有一個鐘頭放風，可以拉筋、跑步、踢下毽同吹水。不過Gary話夜晚唔敢睇Ｄ咁沉重嘅書，會頂唔順，瞓唔着，只會睇Ｄ輕鬆Ｄ嘅散文之類，係以前唔會做嘅。
Gary而家有得睇報紙聽收音機，都算有update嘅大路新聞，惟欠缺網絡上嘅資訊，寫信同探訪Gary的大家可以考慮將網上有趣／最新嘅資訊同Gary分享。
(相片來源自網上)
