關於 有人會諧音咗呢句做個廁所閂埋咗 ，我們在網路上蒐集到這些相關的討論、資訊與評價

【JARvel-knowledge・「御馳走様でした」的背後意義】🍜🍲🍚🙏🏼

之前分享過「いただきます」(i-ta-da-ki-ma-su) 嘅意義同用法。除咗「いただきます」之外，同佢一對嘅就係今次想分享嘅「御馳走様でした」(go-chi-sou-sa-ma-de-shi-ta) 喇！

好多人都知食飯前講「いただきます」，而飯後就講呢句「御馳走様でした」。首先講解吓呢句說話嘅最基本字面意思先啦！第一個漢字「御」，係敬語嘅一種，專加喺詞語前面加強禮貌，而當中最大意義嘅「馳走」係解作奔走、騎住馬四處奔馳等意思，最後「様」就係對前者嘅尊重。

至於點解會用「馳走」呢個字？明明解奔走同四處奔馳㗎嘛，用食飯有咩關係呢？因為好耐以前，人要得到食物多數都係靠收割、打獵、釣魚等。為咗得到佳餚招呼客人，廚師要四出奔走準備食材，所以就用上「馳走」一字喇！今時今日，「馳走」除咗有奔走嘅意思之外，仲演變成「盛宴」咁解。而成句「御馳走様」就係人為咗向準備食材嘅人同廚師表達感謝嘅心，多謝佢地用心烹調，同埋四處張羅呢一餐盛宴，亦都解釋咗點解要喺飯後講喇！時至今日，呢一句中文會解作成「多謝款待」嘅「御馳走様でした」，已經成為日本人常用句子，同いただきます一樣咁重要。

講咗咁耐，唔知大家有冇發現，成句野最後嘅「でした」未解釋呢？其實「でした」係存在動詞嘅過去式，即係近似英文「was…」咁解。由於餐飯已經食完，所以喺離開餐廳嘅時候，就會用過去式「でした」(de-shi-ta)。不過除咗飯後之外，都有一啲情況係會用現在式「です」(de-su) 嘅，例如人地送手信或者禮物俾你嘅時候，你收嗰刻因為唔會即場食，所以就可以用「御馳走様です」喇！

都係嗰句，入鄉隨俗呀嘛！下次俾完錢離開餐廳嗰陣不妨試試講，向對方表達你嘅謝意啦～

#JARvelogue
#有人會諧音咗呢句做個廁所閂埋咗
#前半的確係幾啱音嘅
#但謝謝款待同廁所有關連又好似有點那個
#突然有啲掛住孤獨的美食Jar