【關公吹水系列 - ViuTV個公關炒得】
馮敬恩同王丹拍攝ViuTV嘅《跟著矛盾去旅行2》，原本就係睇中佢兩位政治背景同埋理念(雖然公關仔唔係好明佢地之間有幾矛盾)。或許ViuTV見近日立法會宣誓事宜感到勢色唔對，怕阿爺又嬲嬲豬而「過度反應」。ViuTV的聲明指：「港獨言論不但有辱民族尊嚴，更是自欺欺人，是絕無可能發生的痴人夢話」，表現出對強國的極度淆底態度。(首先，新聞稿笨唔係咁用字同咁寫架，OK?呀高層份野係咪你自己寫架?)
其實依家全港都受到唔同嘅政治打壓，制作組被迫封口或者撤回節目亦都理解。當然，作為一個終於等到有新電視台睇嘅小市民，一定對向中央跪低嘅ViuTV感到失望。但就公關層面而言，明知道呢件事一宣佈，社會就會有好大迴響同埋bad impact，做咩仲要係呢個時候宣佈？
【無理據的反枱】
或許因為剛剛見到馮敬恩同王丹上咗個記者會或者論壇，覺得係一個藉口可以用嚟做原因撤返個節目，從來莫需有嘅罪明都需要一個「係人睇到都知唔對路」嘅原因。
今次ViuTV屈佢兩個開記招宣揚港獨，首先個記招就唔係佢兩個做發起者，佢地都只係接受邀請。請問ViuTV係邀請佢兩個做節目時，有無好似啲明星咁俾埋個代言人費用，係某段期間只可以上ViuTV嘅節目或者唔講得任何野？如果無，佢地兩位出席任何活動，甚至佢地真係攪個記招你都無權干涉啦！唔通你請我食餐飯就係你嘅人？人地唔可以繼續以獨立身份去食飯飲宴甚至結婚？呢個係「有無賣身俾ViuTV」嘅問題，此其一。
第二，王丹同馮敬恩去嘅記招，並唔係為咗要透露ViuTV嘅節目拍攝內容。如果佢地嘅原因係為咗咁，你就話大條道理話因為劇透而唔俾佢地嘅節目出街啫。不過咁，節目預告同埋安排藝人在電影電視劇出街前做宣傳都係咁架啦，所以呢個point都係唔成立。
第三，節目本身想突顯嘅矛盾，就係兩人嘅政見同埋參與學運時嘅態度，兩人嘅背景出身就係咁。政治人物參與政治活動有幾咁奇？
【發緊夢嘅公關】
講來講去，ViuTV嘅理據唯一嘅指向，一句講晒：「無計啦佢兩個講港獨依家阿爺嬲豬費事以後續牌麻鬼煩啦」。呢啲大家梗明白，事情被逼迫到必須要做，但本身講出嚟嘅政治取態，同埋timing就係完全可以將個關公災難嘅傷害性減低。
時間方面，依家香港就住議員宣誓、689試圖出手破壞三權分立、建制派拉布阻議員宣誓，無論係藍絲黃絲定咩絲，全港政治情緒非常繃緊嘅時間下，發佈一個咁嘅消息，民情唔高漲就有鬼啦！或許覺得呢排發生咁多事，多你一單唔多，聽日689攪啲小動作你就無事，但戇居啦，呢個時候講，無疑只會令自己有更多haters，將其他政治情緒都入埋你數咋傻仔。
政治取態方面，ViuTV本身成立就係一個實驗電視台，矛盾呢個節目係其中一個代表作，先有曾鈺成同長毛兩大政治代表，貴台都曾經抽咗政治嘅水；而今次食過翻尋味時又怕自己出事，完全係一個「有事鍾無艷，無事夏迎春」嘅台格。君不見ccTVB嘅乞人憎，除咗係節目本身越做越差，就係無咗台格。傳媒本身就係社會嘅watching dog，對於不公平嘅事要咬實唔放，警醒社會。依家貴台嘅取態，由敢言破格一下子變成搖頭擺尾嘅ccViuTV，將觀眾由對ViuTV嘅希望變成失望，情緒又係會瘋狂反彈。
【關公災難無可避免】
老老豆豆，關公災難係無可避免，有時係無心之失，但有時事情宣佈出嚟前已經知道死梗。今次ViuTV事件好明顯係後者。
公關手段只係可以將個傷害性盡量減低，強調係減低，傷害係無可避免。有咩可能插一刀但無傷呢？公關只係可以幫你擋一擋，係唔會完全無事。好嘅公關除咗要識得點樣行文用字同處理事情，最重要仍然係timing。好多公關災難嘅爆發，都係因為拖得太遲，俾事情發酵得太大；但有時就係衝出嚟柒，明明未係right timing自己攞嚟衰。
今次呢單野，分明就係又要威又要戴頭盔架啦，又想要gimmick但又唔想食政治風險。不過，係咪應該係其他時間宣佈呢？節目都應該未有耐出街，駛唔駛咁快割蓆呢？即使要撤，原因係咪可以搵過第二個呢？又或者咪將個節目剪得支離破碎啲，短啲濃縮啲，然後後面請多幾對民建聯同支持阿爺嘅政治組合補飛，然後大條道理話制作組希望聽到唔同嘅聲音呢？
手法有好多，偏偏係wrong timing衝出嚟柒。ViuTV之前積落嘅觀眾緣，可謂一野斬纜so9sad。
#ViuTV公關麻煩你返去反省下 #如果ViuTV都係咁我地有CCTVB就得啦你可以唔駛續牌啦 #不過咁如果係高層自己衝出嚟柒而無事先知會個公關個公關真係灰到核爆
