關於 曼聯 作客 波 衫 ，我們在網路上蒐集到這些相關的討論、資訊與評價

自從去到某個年齡，自己又鍾意著返啲陳年波衫。除咗波衫帶來回憶之外，亦會喜歡舊波衫帶來嘅Vintage味道。望返舊時嘅波衫，闊袍大袖曾經係一代主流，當年Umbro更加响足球界相當知名，為唔少球隊提供比賽球衣。作為一個支持曼聯接近廿年嘅球迷，除咗Sharp嘅廣告字樣最深刻，當年嘅設計，用色，或者係細微位置，會較為大膽，亦成為了經典。
.
阿靴儲落嘅波衫唔可以話好多，但係96至97年嘅曼聯第二作客波衫，自己就相當喜歡。主場球衣自己會較少留意，始終年年主場都係紅色，而且款式又差唔多咁；反而，於作客球衣上，用色同設計會較多驚喜。於呢件96至97嘅作客球衣上，自己就最喜歡佢Classic Polo領嘅設計，藍黑色Classic嘅配搭，以及舊時先有嘅絨字和章。
.
又諗番當年，自己仍未係曼聯球迷（當時嘅阿靴一直游走於曼聯同車路士之間），認識曼聯亦只係透過父親逢星期日買嘅報紙報導，當時開始接觸到簡東拿，史高斯，碧咸等嘅名宿名字。當年嘅Class of 92，由青訓開始，去到後期嘅歐洲賽事，的確令人回味。畢竟，於現實社會上，能夠一班隊友踢咁多年，一齊進步，又一齊挑戰列強，係一件幾咁難能可貴嘅事情。
.
--------------------------------------------------
【屎波裝備多Instagram】Follow: instagram.com/hkfootballreview
【波Boot實測】Adidas X Ghosted.1 Indoor: https://youtu.be/LGFc_QJVnQ0
【波Boot實測】白飯魚: https://youtu.be/-dbvs0_YgiY
【波Boot比較】五對驚喜釘Boot: https://youtu.be/vzDRe25kkrM

有啲球隊，無論高峰定低潮，都會不離不棄地支持。
.
隱約記得，對上一次印曼聯波衫，我諗應該已經係六年前，印嘅球員係阿靴非常喜歡嘅靴里拉。太耐無印，最近心血來潮，又諗咗自己一段時間。最後揀咗Van De Beek，阿積士青訓，實而不華，視野廣闊，組織力強，而且具創造性。
.
或者，印一件波衫，代表住一個人喜歡嘅踢法，又或者，代表住對某個球員嘅Respect。
.
下件整邊個好？呢幾年印曼聯波衫真係有啲難諗。遲下認真整埋件斑馬第二作客先。
.
--------------------------------------------------
【屎波裝備多Instagram】Follow: instagram.com/hkfootballreview
【波Boot實測】Adidas Top Sala Lux: https://youtu.be/R7Win_I5PQw
【波Boot實測】白飯魚: https://youtu.be/-dbvs0_YgiY
【波Boot比較】五對驚喜平底波Boot: https://youtu.be/H552mIuJYJc

【曼聯2001/2002：百週年紀念球衣】
.
有時候波衫係一種潮流，同時亦代表住一些故事，一些回憶。就如之前講阿根廷波衫那個Post咁講，阿靴遇到設計獨特嘅波衫，不論球會或國家，都會儲低，啱心情嘅時候亦會着出街，畢竟阿靴相信波衫亦有屬於佢自己嘅潮流味道。不過，遇到自己喜愛球隊的球衣，阿靴更加會珍而重之，因為佢正正代表著球會於那年發生嘅事情。
.
今次阿靴就同大家講吓一件自己非常喜歡嘅波衫：曼聯2001至2002年度嘅百週年紀念球衣。呢件波衫相當之獨特，好少波衫會好似佢咁，可以兩面反轉嚟著，波一面係金色第三作客顏色球衣，另外一面就係第二作客白色嘅選擇，可以話一個價錢，著晒兩件波衫。
.
先講金色個邊先，金色係自己較喜歡嘅一面，因為整個設計較復古，波衫亦用上「令」面易起毛粒嘅質料。可惜嘅係Umbro標誌，100週年標誌，會徽及贊助商Vodafone標誌係印上去，要保存得好啲確要落足功夫。例如阿靴呢件咁，已經有輕微甩色嘅狀況。不過，波衫亦用上傳統反領設計，領邊亦有金色嘅細緻布料設計，呢點係阿靴非常喜歡嘅地方。
.
白色個邊用料會較易保存，波衫用上網面質料。Umbro標誌，100週年標誌及會徽均是繡上。而100週年標誌及會徽均用上金色同黑色，非常細緻及高貴。於100週年標誌上，佢更加寫了曼聯成立及波衫當年嘅年份(1902-2002)，代表球會整整經歷100年嘅意思。望翻過往曼聯嘅歷史，曼聯前身叫Newton Heath LYR Football Club，並於1878年成立，而佢嘅第一個百週年年份(1878-1978)亦繡於100週年標誌上。至於贊助商Vodafone嘅用料，白色嚟面係用上較高貴嘅絨布質料，亦會微微突出。
.
2001至2002年度曼聯發生咗啲咩事？阿靴大約記得當時曼聯經歷99年嘅高峰期後，經歷過一個小低潮。2001至2002年曼聯並無拿下任何錦標，英超只能以第三名完成賽事，至於歐聯於四強因得失球差不敵利華古遜，因此未能進入決賽。不過當年亦有兩個具份量嘅收購：荷蘭射手雲尼斯達萊及阿根廷中場華朗，不過兩者發揮各異。前者於第一季極速融入，於各項賽事射入36個進球，並奪得當年英格蘭球員先生；後者則經歷咗失望嘅一季，外間亦批評華朗未能適應快上快落嘅英超節奏。
.
雖然現時曼聯成績不如之前，回望翻的確有點感慨，不過正正係真心鍾意一隊波，才會學懂忠誠。無論一場比賽贏定輸，也會無限支持。
----------------------------------------------------
【屎波裝備多Instagram】Follow: instagram.com/hkfootballreview
【波Boot實測】Predator 19+ IN: https://youtu.be/G5tJpVIQHa8
【波Boot實測】白飯魚: https://youtu.be/-dbvs0_YgiY
【靴分享】六個射門要訣！: https://youtu.be/LaVsmSvFoFQ