喺書展天窗攤檔，有個高高瘦瘦靚女截住我。
「請問你係咪渾水，我係天窗嘅同事。我想送本書俾你，係好青年嘅《人生種種》。之前電話同你聯絡過，但係你冇覆我……」
由於大家戴住口罩，其實佢係咪一個靚女我都唔知，但係眼大大，高高瘦瘦。天殺的，我怎會忙到唔覆人message
「真的很抱歉，有時我太忙會忘記回覆別人的message。好青年是我的老師，有幾位教過我，經常追我交功課。我喺你哋度寫咗兩本書，《殻股財技》同《暗黑金融學》推銷到牙血都出埋先至印到第三版、第二版。呢班攔坦，第一本書已經出到第五版，我好葡萄……」
「係呀係呀，佢哋寫嘅書我自己都覺得好好睇，不如送一本俾你啦。」
「咁又唔使，我老師嘅書我自己俾返錢是合理的，何況我都係一個作家，真金白銀支持先至有誠意」
「好啦，咁你幫我影張相」
每一個人都會喺人生面對好多古怪嘅問題，當呢啲問題累積到一個程度，佢哋就會幻想讀哲學可以解決到呢啲問題。呢種心路歷程我當然都經歷過，但係結果就係你越鑽研呢啲問題，你發現呢啲問題越難搵到答案。前人嘅想法可以比到指引你，但人生咁多問題……好似我咁，我要面對其中一個人生問題，就係當靚女WhatsApp我嘅時候，一定要回覆
