［上網學中史之三夫］後知後覺，我覺得Facebook Page 呢個top fan嘅功能好偉大，同時滿足咗讀者同作者嘅需要。
Facebook真係大把心理學家，完全利用晒人性，由最初堅持唔收錢冇廣告（斷估你唔會睇書，詳情可以睇戲，大衞芬查嘅The Social Network，去到而家見到 Jesse Eisenberg 我都只係會諗到朱生。），到發明like button，到後來堅持唔推unlike等等。
對讀者嚟講，好易理解。就梗係好似後宮佳麗咁爭寵啦，或者好似大陸K場啲女咁爭住拋媚眼揀我啦揀我啦（亦有啲特登西口西面，因為有啲富豪就係平時已經個個見到佢都腿張開，玩無可玩鍾意玩有性格嘅女，呢啲就叫marketing of de-marketing）。我係top fans 喎幾巴閉。
仲要毒在，個top fan榜呢，個個星期更新。等你咪撚旨意三分顏色上大紅一變四，四變十二，來到這禮拜 更加諷刺。今個星期你得寵，下個星期人地有新玩法你就入冷宮。包你看到律勤雙腳已在震（侓勤係假名，都係本頁嘅粉絲，但唔係top住）
但對作者（版主）又點呢？嘿，就真係要自己run page先知。我碌個top fan list，亦即係好似K場揀歌，呀，揀女咁。望落去燕瘦環肥，鬼妹賓記南韓亞太各國統統有我份。完全就皇帝一樣咁心情。丫今個星期呢個咁生面口嘅？做乜上咗榜？望望乜水先。丫呀律勤曳曳喎，呢個星期落咗榜，要努力啲喎知冇？
解下張圖，成語故事，羊車望幸（我明明記得個故事叫羊車行淫！但Google冇即不存在）。晉朝開國皇帝司馬炎（即係司馬昭個仔）嘅故事。因為太多女，後官太多，好苦惱，賓周得一條，後宮佳麗咁多，點揀？其實都係同擲骰仔或者俄羅斯輪盤差不多，不過浪漫啲，開住架羊車。架車停去邊佢就去搞邊個。爽
更絶係啲後宫嘅反應。你諗都諗到啦，司馬炎要出到呢招，就梗係大把女，根本好多任你點靚點鑲金都好，畀皇帝望一眼都未有機會。正如我地當年學校請人，啲CV係幾箱幾箱咁，咁真係拆晒佢咩？所以任你孔子再世都可能掉落垃圾桶，唔好怪自己（而拆解方法係，寄多幾間，或者寄多幾封）。
講返後宮，佢地嘅反應，就係在自己門口撒鹽，甚至倒鹽水。因為羊鍾意呢啲味，自然就會停低。為求上位做top fan，梗係無所不用其極啦，嘿。
咁關三夫乜事？其實係自嘲（我有時幾憎要打埋呢句出嚟）。你見我寫咁多講到自己皇帝，讀者宮女咁。但，真係咁？你睇三夫都知，或者睇簡介都知。表面上係三個佬推弱智大陸妹出嚟賣淫操控佢。但你諗真啲，其實邊個操控邊個？邊個去滿足邊個？都唔係咁單向。
我就食住食碌top fan list當自己皇帝。但返到屋企咪又係寫文回報啲讀者！即係去唱K你都要科水先有人畀你揀啦，真係當自己福田華倫天奴貪你靚仔咩
