【明日大嶼會重蹈三跑覆轍？】
近日林鄭月娥大肆吹噓赤鱲角機場三跑填海工程技術，將會喺「明日大嶼大派用場」（註1）。林鄭不斷聲稱技術好先進，好環保，但就無視上年三跑工程先鬧過「海砂荒」。言下之意係咪明示明日大嶼都會面對三跑工程嘅各種問題？
▌技術成功，但海豚無晒
林鄭大讚現時運用嘅「深層水泥拌合法」聲稱對於海洋生態影響好低，不過上個月公佈嘅官方報告指香港海域棲息嘅中華白海豚數字持續下跌，直至上年喺大嶼山一帶整體數目估計只餘下37 條中華白海豚，近一半幼豚過唔到兩歲，真係好無陰公（註2）。即係工程好環保，但係生物無晒，咁都得?
▌哪有沙？
除咗海豚被趕盡殺絕，回顧三跑填海工程進口砂粒嘅高峰期，2019年同2020年兩年分別為工程進口5百萬公噸及4.5百萬公噸嘅砂粒，從中國大陸佔整體進口砂粒來源嘅比例分別係約20%及85%（註3），所以三跑填海工程仍然可以話係對大陸進口砂高度依賴。因此，先會爆出因為海砂採購困難，三跑「主要填海工程」嘅承建商攤大手板要求機管局，喺原價153億合約之上額外增加168億，否則工程就會延誤兩年（註4）。最後，事件夾硬要立法會增加撥款畀承建商80億埋單，令填海工程嚴重超支。
大陸近年海砂同河砂供應緊張，最新嘅「十四五規劃」喺海洋保育嘅段落更提出「海碧生多、岸美灘淨、河清海晏」等六大目標（註5）。可以預期近期重視保護海岸線同河岸生態嘅國策之下，填海以及沿海地方浚挖海砂對生態嘅影響備受關注，地方政府推動嘅填海項目好多都被剎停，明日大嶼如果想由大陸進口海砂同河砂將會愈嚟愈艱難。
▌港人埋單16年
我哋上年已經發現砂價(當中包括海砂、河砂及碎石) 升幅仲勁過金價，有紀錄以來(2003-2020年) 已升近10倍，由過往每噸$26大幅升至今天$259元（見廷伸閱讀）。成本上漲自然要搵收入填數，由2016年8月開始，每名香港人坐飛機離開香港，都需要繳交90-180元不等嘅「機場建設費」直至2031/32年，每次出境都要為三跑填海工程填數，還款期前後長達16年（註6）。而明日大嶼工程規模更大，不論以邊種形式融資，必然會進一步喺港人身上榨取。推崇基建技術幾成功，林鄭係咪認為可以淡化呢啲大型基建所帶來的財政負擔？
▌三跑一鑊粥 明日大嶼凍過水？
如果三跑作為政績工程恐怕真係完全唔收貨，超支超時之餘又諸多工程問題，仲要有違國策。喺特首選戰前夕當係政綱賣點，似係毒藥多過救命仙丹。而明日大嶼一向都係林鄭力推嘅大白象願景，呢鋪似乎係有辦你睇，捉錯蟲！
▌延伸閱讀：【明日大嶼 隱藏海砂大騙局】：https://bit.ly/3ncx75Q
#今日三跑明日大嶼
#三跑騙案回顧
#大敗象工程
#土地研究
註1﹕〈機場三跑鋪設竣工 填海技術將在明日大嶼「大派用場」〉，《眾新聞》，2021年9月7日 - https://bit.ly/3tpkp4K
註2﹕漁護署報告：過去 17 年中華白海豚跌逾八成 近半幼豚活不過兩歲: https://bit.ly/3l9sMxX
註3﹕〈2021-2022年度財政預算案〉，立法會財委會問題，答覆編號DEVB(W)052 - https://bit.ly/38NZ9MP
註4﹕〈承建追索 三跑填海超支80億〉，《明報》，2020年5月18日 - https://bit.ly/2VpVOAl
註5﹕〈國家海洋生態環境保護「十四五」戰略路線圖分析〉，中華人民共和國生態環境部環境規劃院，2020年5月26日
註6﹕〈機場三跑工程進度延遲八周 維持明年啟用〉，《NowTV》，2021年4月26日 - https://bit.ly/3zUCAlf
明日大嶼進度 在 【財委會進度 距離審議「明日大嶼」前期研究撥款 ... - Facebook 的推薦與評價
財委會進度 距離審議「明日大嶼」前期研究撥款尚餘4項議程】... ... 「明日大嶼」填海計劃勢將威脅香港嘅未來，我哋會持續監察，並竭力堅守大嶼嘅生態環境 一同促請 ... ... <看更多>