好心啦，乖乖地做港豬去日本飲飲食食，咁大個人仲學人玩火。做戲都做全套啊，你放火發洩愛國情緒之前，咪又吃喝玩樂。
萬一玩大左，搞到香港無得免簽去日本，呢個共業係咪由你地承擔先？港豬（包括我）最鐘意去日本，到時全世界一定唔比票你。
工黨兼保釣行動成員郭紹傑去靖國神社燒東條英機的道具神主牌，首先唔好問點解保釣行動會關南京大屠殺事、亦唔好問明明靖國神社都冇供奉東條英機，但都要走去佢個場度燒、更加唔好問明明係用會費去示威，但點解仲可以有Day1的飲飲食食最開心，因為民主派做野，真係唔駛你教。
首先，對唔住，前職工盟副主席、現任工黨執委郭先生，今鋪又係我、又係查．數．簿．的時間啦！
介唔介意我問一條問題：今次保釣委員會話派你地去日本，咁我當然可以假定佢會包埋你的開銷，介唔介意同大家分享一下你的原定日程？我比較有興趣知道嘅係，如果你去日本嘅工作，只係去靖國神社燒一燒個神主牌，咁你在東京Day1係做緊乜呢？睇左你啲facebook post，除左 #飲飲食食最開心，我睇唔到你有幾國仇家恨、又有幾討厭日本。咁我想問，如果第一日係完全同示威無關痛癢，咁點解可以出公數？我唔係有心留難你，而係就算公司要出trip都要寫business case，解釋清楚點解要去咁多日、有咩行程會做啲咩、有咩預期效果，畢竟依家經濟唔好，大家能省則省。作為一個收取民間捐款的組織，我諗你有錢唔過啲大公司，咁點解你地可以用公眾籌募的款項花一日的資源去做呢啲無關痛癢的事情？示威兼燒個神主牌，即日來回都得架，反正你係搭早機去嘛，岩啦，一落機燒完再上機，晚飯同酒店都慳返。拿，我無話你呃人錢，麻煩唔好又出動你啲黨媒黎貼我江湖追殺令，我問下你啲日程之嘛，唔係問下都唔得呀嘛？
另外，正所謂臨時演員都係演員啊，你用得保釣行動的開銷，係咪要用返保釣行動的樣子去日本？作為一個中二病大中華膠，係咪起碼都應該去返幫趁中國人開的中國餐廳，甚至係去支持保釣的中餐廳食飯？你做咩事走去食日本菜？你有冇問過人地收錢嗰個支唔支持釣魚台係日本架？唯一叻豬嘅，就係路過啲夜總會，影左啲女女相，職工盟支持性工作者，呢點你終於企岩位，所以係抵讚嘅，如果可以好似某姓黃社運人仕所言「搵條日本妹宣洩主權」，就更加錦上添花。不過一定要留意對方歲數，不然要請經驗豐富的湯大狀黎保釋你就麻煩了。好啦，唔講飲食講下其他，我都出晒名崇洋兼鍾意洋腸，但我都未致於崇洋崇到想要搬埋人地個屎塔返屋企呀嘛？你係咪飲日本啤酒飲大左，連個日本屎塔都要讚嘆一返？我心諗咩料啊…
最後，俾人拉唔緊要，做咩事又搵香港政府幫手？雨傘革命、平時社運唔係同政府打邊爐打到頭破血流的嗎？做咩事一出事又搵政府？我話你知，今次政府如果冷血唔救你，你個黨總算執返身彩，你亦可以上神檯做第二個保釣烈士。但如果林鄭真係唔放過你，佢一定會好高調咁去營救你，甚至包埋專機黎接你，仲等埋你落機一齊影相 hashtag #大和解 #血濃於水 #點都係一家人 #雖遠必誅 ，到時你點止用洗菊神器，就算用埋爆菊洗衣粉，你都水洗唔清。真係去一次「大和」，你個會就「解」散了。
我一直以為裝睡的人叫不醒，原來飲醉了的人才是真的叫不醒。
#留名又等被通緝
#你通緝我之前麻煩講一下貴黨對日本的立場
#我相信好多選民想知道你地當選後會點對日本
#係囉香港人最憎日本
#你搞佢就大把人支持你
#再搞連飲飲食食都唔開心了
#日本備長碳都無得你用
#仲話焦土
#阻人去日本係違反普世價值
#你問下啲左膠呢鋪包唔包容你
