［殘年急景］2019年回顧前的回顧，工作篇
1. 睇返舊文，居然係冇寫過2018回顧。I mean，在medium上冇寫，FB Page冇寫，即係同冇存在過冇乜分別。雖然我在個人FB係有寫的，抄呀 Yickhong Lam 個形式，一個月四張相，每個月回顧。今年都會繼續佢呢個形式貼自己FB，但同時間我亦回歸舊方法，唔依時序咁寫篇，就係神機測字咁，諗到乜就寫乜。
2. 當然以往經歷，發現，其實都係冇乜好寫。特別係人老咗，而我又冇小朋友。有小朋友嘅可以寫下，嘩，佢識屙屎啦，嘩，佢識叫老母啦，嘩，佢搞大女同學個肚呀，包你成日有嘢寫。
3. 年少呢？考試又可以年年寫。而家唔通我寫阿丕嫂幾分？WFC？年少呢，考會考又可以寫，A Level又可以寫，大學畢業又可以寫，轉工又可以寫。係，而家我轉工都可以寫，但的確人老咗轉工頻率低咗的，簡單經濟定律者
4. 仲有，年少，換女又可以寫。咁當然年老換女都可以寫，但我冇嘛。同埋即係，咪話我睇死你，你係年老換女嘅，你都唔敢寫啦。我敢架！我冇之嘛！
5. 咁，咪話，人大咗，咪紅白事多咯。但又，我呢個年紀，朋友又多數結晒婚喎，但又未死。雙親都健在，所以都係冇乜好寫。
6. 我亦唔似啲中二病小朋友咁，將啲細細嘅事寫到驚天地泣鬼神可歌可泣搜神記咁。
7. 剩返仲有乜？咪轉工，去旅行，財富，健康，屋企人，之類。一年睇咗幾多套戲，去咗幾多次日本，食咗幾多粒星，咁咯。都係你股票價格怎麼，你炒過芥菜幾棵嘅天花亂墜（http://bit.ly/2P33S6c），仲有乜？去片。
________________________________________
8. 首先係工作，今年係大改變嘅。上年（2018）九月我半裸辭離開咗星展，事後諗返都其實係必然結局，畢竟我嘅花紅係零雞蛋一隻。呢個唔係侮唔侮辱嘅問題，你畀夠錢你可以盡情侮辱我的。就真係期望管理嘅問題。我當初肯去，中途肯搏（都有搏過下架），就當然唔係price in 零花紅條數啦，中途亦冇人同我提過呢樣嘢。咁既然係零花紅，就唔同你咁落力啦，冇花紅就唔包呢啲服務，只係包我朝九晚六架咋。仲同你年初二返工留夜？卒之hea做到八月我就裸辭（其實係半裸）。留意仲係講緊2018
9. 以上種種，在我舊作，辭職記第四部有提過 （http://bit.ly/2RyeolE）
10. 講過係半裸辭，因為當時有搞start up的朋友請我。人工少一大截，但工作量一樣少一大截，fair enough．又咁啱另一朋友又有另一檔文青嘢搵我幫手，人工就濕星，但做嘅嘢都濕星，也是fair enough。
11. 2018年10月我就開始做呢兩檔嘢，一路去到2019年3月。發生咩事？舊老細call我出山。唔係對我影響最大，我視佢亦師亦友亦父咁滯嘅老馮（老馮種種，舊文有提）（http://bit.ly/2ZhNG1n），但始終舊文（同一篇）寫過，舊老細搵你過檔，證明你都唔係十分非常差，可以自滿一下。
12. 於是乎，我就義無反顧咁，脫離我半年嘅start up文青生涯，又再返到去萬惡嘅金融界，又再返返去中（？）環。都真係義無反顧的，人工不錯，壓力不算太大，露畸唇OK，又有房坐，跟返舊老細。仲要同返舊嘅下屬合作。What can you ask for more?
13. 少少可惜嘅係另一以前得力下屬，我決定加入時佢就走。希望唔係因為我去佢走，係喎，佢兩個都齊齊去我舊老細嘅公司，早過我添，嚟嚟去去都係嗰班人，馬房嘛，識人好過識字。我當然有啲婉惜，有想留佢（咁梗係$啦，唔通講心咩）。但正如當年老馮搵我回巢我婉拒。雖然以前跟住佢係好舒服的，啲麻煩政治嘢佢擋晒，但我都係寧願出去做小頭目，因為鄧不利多嘛，舊文寫過（http://bit.ly/2RuYicf），覺得不能永遠活在佢陰影之下，要自己楝支旗出嚟，直接去食嗰啲麻煩政治嘢。咁我嘅得力下屬都半行上呢條路（雖然佢唔係做小頭目），都明嘅。人各有志，不出惡言。
14. 加入呢間公司大半年，好難話完美，但根本就冇完美。我只能講句我絶對滿意，冇乜好投訴，佢冇虧待我。當然同以前星展年代，真係出個報告就幾十人打嚟問，call 個press con就幾十間報紙嚟，兩回事。但舊文講過了，我由耆英去到台灣佬，就係唔習慣。以前耆英唔勁但有人識，太古廣場三期，廁所乾凈到可以訓覺（我試過），出入都靚女，拎張卡片出嚟都有人識。後來東盛，灣仔中國海外大廈，廁所就恐倫布，樓下啲阿姐一樣，拎張卡片出嚟仲要解釋係乜東東。嗰時咪因為呢種心態去咗星展。舊文有講過。（http://bit.ly/2GEyyUG）
15. 然後呢？見山是山，見水是水，望盡天涯路了。講威？星展夠威啦掛，真係出報告第二日上晒報紙，press con 人人嚟聽你鳩up，仲做到我由細到大夢想嘅嘢
16. 登登登凳，係乜？就係轉工上報紙！嘩哈（http://bit.ly/2P2LQiz）
17. 我得承認，係十分幼稚嘅一樣嘢，但我甚至將呢段新聞，發返畀啲陳年冇聯絡嘅舊情人。用意好明顯，「我而家巴撚閉啦，你後悔啦」。幸好我啲舊情人都好厚道，除咗恭喜我，一般都係唔回我，仲有個話「餵緊奶，遲下傾」。係咪另類嘅反擊，話畀我舖，佢更加巴撚閉？冇人叫我「呀大佬你唔好咁幼稚啦」，應該因為明白「愛的反面不是恨而是漠不關心」。
18. 但，成件事最幼稚在，轉工上報紙，「其實唔難」。主要係天時地利人和，你同記者熟，咁啱嗰期又冇新聞，咪有機會。我細細個睇鬼報，見人地啲appointment，嘩，做乜呀邊個轉咗去邊會見報咁威嘅？雖然我唔係鬼報，但都可以十分自豪地同老豆講，嘩哈，那天我會，含淚說聲，我做到 （http://bit.ly/2P6G9lA）
19. 而對上一次，我諗起李克勤嘅呢句「那天我會，含淚說聲，我做到」，就係唔記得幾多年前（未結婚啦下），有次在九龍站Ritz Carlton（少年唔知以前在港島呀可？）爆房，自覺已經超越咗風流成性但周身冇蚊嘅老豆（http://bit.ly/2RweD0r），好想影返張相，問下佢，「你成日講你後生時幾咁多女，咁你爆過Ritz Carlton未？」，可惜我唔係同佢住，「否則可以掟條女個胸圍上佢塊面」
（唔知出處嘅，呢度（http://bit.ly/2sXPaCU）。謝霆鋒真係型，好撚型，好撚好撚型。趕時間嘅2:30分開始睇）
20. 講咗咁多，都係嗰句，見山是山，見水是水。做過星展，喂，東南亞最大市值企業喎，真係算一線尾。又如何？係呀巴閉呀廁所靚（其實唔靚）開press con幾廿人嚟人人識你，又如何？係呀去到新加坡淡馬錫都畀面見你呀。但撫心自問，係咪開心？唔係。
21. 我諗，我嘅職場生涯，so far，可能同啲女仔嘅心路歷程差不多。最初教書，誤打誤撞，胡裏胡塗就初夜畀咗個MK仔，但人地冇迫你，我都係快樂的。後來偶爾去咗金融界，去到蕉行，先知道世界唔止MK仔。跳得下草裙舞後，喂，原來咁都得架喎，原來自己都有啲吸引力喎，原來之前自己太冇自信。於是去到耆英，開始囂啦，開始老撚奉，我十八廿二青春無敵副架生咁正（加上雷曼爆煲前十分好景），你畀面色我睇？最後咪畀人中出即飛，豉椒炒魷。
22. 跌倒過後，仍要生存，搵過頭住家。其實唔差，「之後，我以為我已經接受了，尤其是遇到你，我以為我可以做一個踏踏實實，平平凡凡的快樂人。我跟自己說，眼前的東西已經是上天再給我的恩賜，是我再一次的機會學會珍惜。」（http://bit.ly/2YqV7E4）
23. 對，離開耆英後，其實新東家也不錯，冇乜壓力，但我總係諗住以前嘅榮華富貴聲色犬馬，總係想去返嗰個世界。「事實是我不甘心，我也不能夠忘記，我不能夠無聲無息踏入黑夜。於是，玉蓮，我走了，去找回我上半生失去的東西」。結果真係有機會。但去到之後，發現自己都唔再係十年前嘅自己。況且，呢啲浮華，仲係咪我想要嘅嘢？又或者，我係咪要佢畀我我先搵到？（呢句嗒真啲啦，送畀讀者的，記住支持埃汾）
24. 於是乎，見山是山，洗盡元華（元秋都洗埋），去到而家咁。其實真係滿足的。我都唔係十年前嘅我，仲有人肯埋我張單，不介意我以往亂七八糟嘅過去（話說回頭，我歷年辭職都算愉快的，唔信你問返歷年老細），仲肯畀頭好住家我，what can i ask for more？
25. 所以今年呢，我係滿意嘅。至少在工作上．因為最重要係，唔敢講每一日，但一般嚟講，我都搵到，最難搵嘅嘢：「心中嘅平靜」（http://bit.ly/2PdYRYm）。你搵唔搵到？定係要靠吸毒先搵到？靠畀錢先搵到？
26. 而你見我寫一大篇講工作，不能否認，工作似乎都仲係最重要嘅嘢。留意，呢個「工作重要定乜乜重要」之類嘅問題，唔係咁易答的。甚至根本冇可比性。除非迫到埋身咯。結果迫到埋身寫文，我第一樣就寫工作，仲寫咗一大篇。其他嘢夾埋都未必寫到咁大篇
27. 因為工作就帶來$嘛，有錢就解決到好多好多嘅問題。就係咁簡單。你畀我中幾千萬六合彩？我即時啤件小熊都仲得。
28. 我一直認為，冇年少輕狂嘅年代（其實而家可能都輕狂，不過唔年少），就冇今日嘅我。我其中一個核心信念就係，been there, no thanks。你唔使好波過美斯先可以批評佢，但，我認為你玩得贏個制度，做到學霸（又嚟了），就可以講，都係不外如是，其實唔難。你真係有過好多女，你就可以講，「其實都係好煩」。否則只會淪為「我選擇唔泡李佳芯」嘅笑話。太監話性生活傷身咁咯。
我真係恭喜你呀出處 在 李嘉欣勁爆粗口實錄- 字幕版 - YouTube 的推薦與評價
「最美港姐」與富商通話錄音流出，對話內容成萬年梗圖｜我真係恭喜你呀｜ ... 大美人李嘉欣：我入行以嚟都好純㗎大談多段情史澄清黎明曾送99枝玫瑰憶 ... ... <看更多>