*嚴禁劇透*
*粗口自行過濾*
*可瘋狂話戲屎但免外表批評人身攻擊*
[1230隔夜超短劇評][TVB][包青天再起風雲 EP04]
[讚] 我好鍾意Kelly Fu 做呢啲傻傻哋嘅角色，唔知點解好夾，上次《愛我請留言》做姣妃都好好睇。令次湯曉晨同展昭喺茶樓食飯嗰段係幾好睇。
另外拍包公返到書房話自己張枱畀人郁過嗰段，我都鍾意喎，可以見到包公係幾咁有陰謀論/小心，呢個係查案乜方向都唔放過嘅演繹之一。
[彈] 不過可惜包公呢個急躁性格寫得唔多，暫時只係喺公孫策兩個人相處時，仲有審案時鬧雲中流份《萬報》垃圾時出現。如果有一啲係喺外人面前展現，而公孫策係㩒住佢，咁又好似會好睇啲。希望可以寫包拯點樣由急躁變咗做我哋熟悉嘅穩重。暫時我當咗呢套劇係前傳咁睇，到底佢哋係點樣變成「傳統」我哋見慣嗰個形象呢，寫得到都應該幾好睇。如果唔係玩呢樣，一係就將啲經典案情扭轉佢，都會好睇。若然兩樣都唔係，咁用包青天呢個經典故事就真係冇意義喇，仲會礙住觀眾投入。已經有唔少觀眾留言話接受唔到包展公孫係咁嘅人設。（如果真係接受唔到，或者當唔到佢哋係新角色咁睇，咁放棄啦，因為應該睇得勁痛苦。）
龐太師呢個咁重要嘅角色出場，一啲氣勢都冇……
王員外一案，搞咗一集，雲中流喺獄中咁多嘢講，最後出動埋狗頭鍘，嘩咁我諗住等雲千羽出場解圍啦，點知只係攞住雲中流之前喺小報寫包公係黑奴又嚐糞件事，話佢係公報私仇。但係明明寫咗包公嗰時已經出名係公正嚴明，諗住用呢點砌低佢而全部民眾都受到唆擺起哄？呢度夾硬咗啲。本來話係雲千羽自己諗出嚟都合理，但條橋係公孫先生諗出嚟喎，點搞呀？我有諗過公孫先生係為咗挫吓包公銳氣而利用雲千羽，但失敗收場，對塑造公孫先生同埋雲千羽角色意義不大。（定係一切都係包拯公孫夾計呢？）
[以下可能劇透]
不過最反高潮，係柳如嫣無啦啦衝入嚟話係自已殺咗王員外。可唔可以畀多少少段落去寫吓柳如嫣雲中流嘅感情呀？依家我估水老闆先係幕後黑手，同雲中流夾計，但都可以做多少少去迷惑吓啲觀眾，等人睇嘅時候投入啲啩？推理查案如果唔擾亂觀眾真心好難好睇，因為觀眾會一路睇一路諗邊個係兇手，咁多過癮。不過今集算係幾集裡面最多查案伏線嘅一集嚟，如果第5集推進得好，咁就可以睇落去。如果唔係隔咗個星期六日唔知仲有幾多觀眾留低。
btw，衙門裡面包大人升堂開審張枱似係高得濟，搞到譚俊彥個氣勢大減……
[演員表] 譚俊彥 飾 包拯 / 張振朗 飾 展昭 / 曹永廉 飾 公孫策 / 胡定欣 飾 雲千羽 / 姚子羚 飾 紀念念 / 李嘉 飾 王朝 / 譚坤倫 飾 馬漢 / 李日昇 飾 張龍 / 黃耀英 飾 趙虎 / 張國強 飾 雲中流 / 傅嘉莉 飾 湯曉晨 / 蔡國威 飾 姜耿 / 陳自瑤 飾 水玲瓏 / 李美慧 飾 柳如嫣 / 魯振順 飾 朱家慶 / 李成昌 飾 龐太師 / 楊玉梅 飾 龐太師夫人
#1230隔夜超短劇評 #TVB #包青天再起風雲 #譚俊彥 #張振朗 #曹永廉 #胡定欣 #姚子羚 #李嘉 #譚坤倫 #李日昇 #黃耀英 #張國強 #傅嘉莉 #蔡國威 #陳自瑤 #李美慧 #魯振順 #李成昌 #楊玉梅
愛我請留言 姚子羚 在 TVB - 《愛我請留言》黃浩然、姚子羚 的推薦與評價
《愛我請留言》黃浩然、姚子羚. Ruth Cheung and 10 others. 11. . . Related Pages. TVB 綜藝. . Follow. Tvb粉絲團. . Follow. G.E.M. ... ... <看更多>