【爛到有突破】
Brexit裡嘅政治角力，唔係deal唔deal咁簡單
英國嘅政治，從來都充滿陰謀詭計，好睇過任何英美日韓劇（其它地區嗰啲算吧啦）。尤其是响呢個月裡面，仲有幾十日就到所謂嘅脫歐「死線」，可以話係劇集嘅高潮位。點估得到七個工黨，加埋三個保守黨後排議員（Backbencher）退黨，反而令奄悶到癲嘅劇情，忽然扭轉晒呢？
首先緊係交代嘅呢期嘅劇情背景，基本上大部份議員唔想No Deal Brexit，而主要問題就係卡住响愛爾蘭邊界嗰度。其實個Deal本身只係一個大框架，就算過到，將來同EU嘅細節執行都係繼續血肉橫飛。工黨左膠主席從來個立場都係反對同反對，即係好似啲泛民咁（唔知自己想點），亦只係一心提早大選做首相。但係工黨裡面，就有唔少人支持再公投（唔只係脫唔脫，係包埋點脫嘅"People's Final Say），亦頂唔順個主席太左同理想化。
而另一方面，無論May姐點扭計，EU方面亦表明（暫時）唔會改個deal。咁May姐就出咗個毒計，將最終投票日期推到3月12號（死線前兩個星期）。毒响邊？既可以焗到班友驚No Deal投支持，否決嘅話大條道理將脫歐日期推遲時間換空間。留意，法國、德國、意大利右翼係上緊位嘅。
就啲呢個時候有七個工黨議員頂唔順退黨，而保守黨又有三個同路人狗上瓦坑。咁樣嚇一嚇，工黨左膠王即刻話支持第二次公投。高潮位就响呢度喇，咁嗰班強硬脫歐派嘅議員點好呢？繼續反對阿姐個Deal？咁咪益對家，分分鐘歐都脫唔到？支持咩？咪好肉酸？
其實用返福地財經偽人嘅眼界，大家睇下英鎊呢排個對換率，都明突破咗啲乜？錢係從來唔呃人嘅，我估，或者，可能？
#我不討厭英國政治
