《晚安》
♂：早晨
♀：早晨
♂：今日咁早啊，真係估你唔到
♀：比你估到，你就係食神啦
♂：係呢，你最鍾意周星馳邊套戲？
♀：西遊記
♂：我都係，點解你會鍾意呢套戲呢？
♀：因為佢係一套笑之餘，真係會令你睇到喊既戲
♂：的確好多戲係令你笑住離場，但呢套，睇完係會沉默地離場
♀：你覺得至尊寶係鍾意紫霞定白晶晶？
♂：我覺得佢兩個都唔係最愛
♀：嘩，你呢個答案都幾新鮮，請出招，睇下你會唔會驚嘆到我
♂：白晶晶係佢第一個愛既女人，紫霞係第一個愛佢既女人，但當佢遇上白晶晶既時候，白晶晶愛既係孫悟空，而紫霞愛上佢既時候，佢愛既係白晶晶，套戲對我講，係一種時間既錯配，最後失去紫霞既至尊寶變成孫悟空，令白晶晶愛上佢。
你唔覺就好似現實入面，一種大家都追逐緊既循環咩？
♀：但白晶晶係第一集最後都愛上至尊寶，仲因為佢而自殺喎
♂：咁係因為劇情上，佢地無經歷真正既生活姐，一時衝動產生出既愛，總有一日會燃盡，愛亦會隨之而消失，你有冇聽過一個測試，當一對男女係一條好危險既橋上面表白，成功率係特別高咩？因為係危險之中，人係特別容易動情，可能係體內既荷爾蒙影響，而返返去安全既地方時，就會變返正常
♀：咁紫霞呢？至尊寶最後為佢而甘願成為孫悟空，講出愛佢一萬年呢句野喎
♂：紫霞因為緣份而愛上至尊寶，為佢付出一切，由一開始佢既主人，變成對佢千依百順，講真，有邊個男人可以拒絕一個又靚又付出一切比自己既女人呢？
不停付出係可以令人得到錯覺，你覺得至尊寶愛紫霞既咩？其實好少描述，呢段感情係一種單方面既感動衍生出既錯覺，到最後至尊寶係覺得欠左紫霞多過愛紫霞
♀：雖然你講得好似似層層咁，但我硬係覺得好奇怪
♂：呢種係我既睇法，你可以唔同意
♀：我決定今晚就重睇一次，等我睇完再答你
♂：咁你覺得佢愛邊個？
♀：我覺得係紫霞，睇返時間線，當佢變成孫悟空之後，白晶晶愛佢，鐵扇公主都同佢有路，但佢都無愛上佢地，因為佢仲未放得低紫霞
♂：咁只係佢未遇到一個真正愛既人姐，故事就係咁，作者只係寫到結局，但人生唔同故事，人生係「結局」之後，仲有好長時間，會遇到唔同既人，會再愛真係唔出奇，但當然，係無新人出現之前，佢最愛既都係紫霞既
♀：咁你心目中既愛情係點
♂：兩情相悅
♀：有邊個拍拖唔係兩情相悅，就算你上面唔認同愛既兩對，都係兩情相悅喎
♂：係正確既時間，遇上正確既人，發生正確既事
♀：你對於愛情既定義都幾狹窄
♂：對於愛情，我都幾嚴謹，愛有好多種，但真正既愛情，應該係持續既，一生一世既
♀：你有冇睇過Before Sunrise
♂：有
♀：佢地當日唔係一生一世，只係得一日，咁算唔算係愛情
♂：……
♀：你都有睇過鐵達尼，幾日既愛情，又係唔係愛情
♂：……
♀：所以，係你心目中，呢種愛情都唔算係愛情？
♂：可以咁講
♀：如果有日，你遇上一個唔可以去到永遠，限時既愛情，你會唔會用盡所有去對待
♂：我唔知
♀：你個人真係好奇怪，比著平時我對第二個，聽到呢種講法，我真係會開佢波
♂：唔好開我波……
♀：如果我開左你波，你覺得我仲會咁客氣咩
♂：其實……我只係拍過一次拖，呢個算唔算一個好既辯解？
♀：今次到我估你唔到，真唔真啊
♂：呃你做乜
♀：你咁講，又好似合理返你講既野
♂：所以你唔好嬲
♀：我有話我嬲咩
♂：感覺到你嬲
♀：你未見過我真係嬲係點樣，我會唔出聲，唔會再應你囉
♂：咁真係唔好嬲……
♀：我覺得我對你既容忍度好唔正常，本來我想搵機會同你講，我好似有少少鍾意你，但依家我收返
♂：吓
♀：吓咩啊，我收返啊
♂：但我睇到
♀：閱讀理解唔合格？
♂：我唔知講乜好
♀：唔知講乜，就最好唔好講野，唔係只會愈講愈錯
♂：好……我收聲
♀：搵次機會，我地再討論返今日既話題，我希望你諗完之後，會令我覺得有唔同
♂：好，我應承你
♀：喂，唔好成日應承人，講得出就要做得到，你做唔到我唔會講乜，但我真係會記係心入面
♂：知道
♀：呢個時間你都差唔多訓，再傾啦，晚安
♂：好，晚安
♂：其實大部份時間，我都覺得自己好理性，睇野睇得好清楚，但唔知點解，對住你，我好似愈黎愈唔敢講野
♀：睇黎你真係好緊張喎，哈哈，比我睇到你仲回我，又話晚安，晚安之後仲唔訓，你死喇你！
♂：你夠未訓啦
♀：我一向夜訓，點啊，唔捨得我啊
♂：係
♀：難得你咁坦白，我欣賞你，早少少訓啦，唔好死撐，聽日我都仲係度，慢慢傾
♂：好，咁真係晚安……
♀：係喇，晚安，唔好夢見我
♂：我連你咩樣都唔知，點夢見你啊
♀：我唔會比相你，係唔係仲唔訓！
♂：我可能夢見你，但只係得對腳
♀：食屎啦你，唔好抽水，再唔訓我就嬲
♂：真係訓……晚安
♀：晚安，今晚我地講左六次晚安……
——
呢個故事踏入左100like既門檻
如果你喜歡的話，請睇完比個like，到越過300like時
會比一個大家參與故事既獨家體驗
尋日差少少，加油啊大家！
——
長傾·不見@筆友
https://bit.ly/LongchatEP1
長傾·不見@緣份
https://bit.ly/LongchatEP2
長傾·不見@年齡
https://bit.ly/LongchatEP3
長傾·不見@拜金
https://bit.ly/LongchatEP4
長傾·不見@笑話
https://bit.ly/LongchatEP5
長傾·不見@外表
https://bit.ly/LongchatEP6
長傾·不見@等待
https://bit.ly/LongchatEP7
長傾·不見@飲酒
https://bit.ly/LongchatEP8
長傾·不見@奧運
https://bit.ly/LongchatEP9
長傾·不見@人事
https://bit.ly/LongchatEP10
長傾·不見@第一
https://bit.ly/LongchatEP11
