以下是Sky Sir 友好：棋亮撰文
中國限制18歲以下唔准打機，對手遊影響都有數計，但同2018年初一樣，唔批新遊戲上市，咁就連成人市場都影響埋，令手遊股又跌過。市場報道傳要到十一後，先會有新遊戲獲批，而且新遊戲不得以打機者科金為目標，或者令人沉迷，咁唔知可以點做，等十一國家發落。
恆大之火，愈燒愈旺，雖然債價跌到兩成，但都未停牌，供投資者買賣，都算少有。其實坊間少有重倉恆大股票嘅投資者，而且現時個價都反應哂，所以影響唔大。最難估計係，一大堆債權人，包括收左商業票據的供應商，邊個收得返，幾時收得返，邊個收唔返，非常唔透明。另一邊廂，就發生緊三四線城市，限降價售房，即房企唔可以要錢唔要貨。係中國，樓市帶動的需求非常多，由承建商、材料供應商、電器產品到金融產品，都牽涉其中，所以早兩日最後都係無博水泥，淨係加咗少少荼就算，持股五成左右加put咁。
中國政府遲遲未出手救內房，可能係因為當年2016年放水，比啲內房去減債，點知班內房又借到大一大去賭，去到2017年可以話係，邊個借得多就係大贏家，今次佢借機會收哂班唔聽話的老闆，如果係咁既話，唔會係得恆大一家要解體。
話說市場傳，今日收市後，政府會宣佈理財通，即係同股票市場一樣，香港投資者可以買內地理財產品，同時內地投資者可以買香港理財產品，幾家龍頭行請哂人，準備網上銷售，唔知最後成唔成到事。同埋，暫時未計到數，對本地銀行的貢獻初應該有限，所以無乜值得炒。另外值得一提，早前金管局指，港銀對內地貸款佔四成，當中唔知幾多落咗內地樓市，所以內房死死下之際，港銀都係唔好買住。
棋亮執筆
(持牌人士，沒有持有上述個股)
