隨筆
對於現今社會，小朋友究竟係用黎滿足父母炫耀既工具，代替父母完成不了的學業或是職業，定是父母將自己既慾望付諸在仔女身上。
仔女出世時，父母會話我好愛你，我只想你健康快樂成長就得，到左幼稚園，開始要諗小學鋪路，聽到眾家長討論要報呢樣果樣，原本你都仲未動搖，之後大家都話，你咩都唔理，會害左個仔女。 呢句說話俾你好大壓力，因為邊個父母唔愛仔女，旁人一句你咩都唔為佢做，會害左佢，你就會諗究竟係咪。 當大眾人都做緊主流既補習，興趣班其實唔係小朋友想要既興趣班，而係父母一心為佢地好，覺得只要佢去到拎到證書就可以。 因為呢句我係為佢地好，再睇唔到小朋友係度求救，無曬童年兩三四歲應有既快樂應有玩樂親子時間。
小朋友愛父母，離唔開父母，想父母開心，就算唔中意都會跟住做，就算你要佢一至六上興趣班學習班，留返一日所謂既家庭日話輕鬆下，佢都無得揀，因為佢係小朋友，聽父母話就岩。 父母一心都係諗住我係為佢好，但完全睇唔到呢個小朋友應有既成長，應有既親子回憶，應有既朋伴社交圈都無曬，只係一個滿足父母果句第時你就知道我係為你好。等你讀到好大學，好職業你就會感激由你出世以黎呢25-30年我對你既鞭策同安排。 老實講，生完小朋友出黎，為佢安排好曬，照你既安排去行，都成25年先到大學。其實佢最重要建立親情，建立人生觀，建立價值觀最重要既頭1/4人生，呢個一個生命入面最重要既基石，就係花曬係讀書度，花曬係競爭上。 到左入到大學喇出黎社會做野喇，可能小小事就沮喪挫敗，因為社會大學唔係照讀書就識得圓滑識得交際識得用正確既價值觀甚至堅強耐性正面去面對。
以前米媽成日批評，香港既讀書倒轉曬，應該玩既時唔玩，應該做學問既時間就走去玩，咁樣，你想培養到咩人才出黎。幼稚園到中學應該玩應有創意應該大膽創新，反而一開始就灌輸要讀多啲書要先過人，一班小朋友就咁開始補習班，勁多功課既壓力下，頂，終於俾佢地捱到考到入大學。 就好似放監咁，我對父母有交代，有張入場券，就算成績點，我都至少有份有保障既工。 於是，應該擁有曬前提正面樂觀堅強忍耐創新既小朋友去到大學專心做學問時， 佢地唔做，因為佢地做夠喇，由細到大俾父母迫佢地連講野都未講到就迫佢寫字學野，手仔未靈活就彈琴。 到左大學仲讀書？ 仲唔玩到顛？ 咩happy corner 咩日日宿舍打牌喪飲喪玩，呢啲父母見唔到既景象就係以前累積落黎既解放。 最後只要俾到張畢業證書俾父母就可以了，父母係唔知情底下仍然可以同親友炫耀我個仔入左咩咩大學，你點教到個仔入大學，讚你教導有方教到個大學生出黎。 而呢班小朋友，好多時就止於呢度因爲佢地根本唔想再讀，以前應有既時候未玩過，又點會到大學無人管後，唔盡情玩而去做學問呢？呢個係外國同香港教育好大既分別？ 外國係應玩時玩夠佢，到大學時大家都有自己理想自己想法去實行出黎。 香港呢？ poor kid. 好難講係邊個做出黎。
其實有無第條路可以行下，可以balance下？個個都話香港既教育制度玩死大人小朋友，咁除左幼稚園就開始軍訓式既興趣班同補習，三四歲人仔每日返full day， 幾時返到老？ 仲要係一開始就無回頭，老實講父母唔會放過小朋友，因為覺得佢做得到，既然你咁細都做得到，應付到，咁之後只會愈加愈多課業。最重要係父母成日話你第時就會多謝我。 同埋呢班小朋友連禮儀禮貌待人之道咩都唔識。都只係會諗我成績好就得啦，你班我咁多？
大人，可唔可以俾足夠既玩樂時間佢地，等佢地儲夠正面價值觀，儲夠獨立自理能力，儲夠父母對佢既愛，儲夠快樂先去面對呢個社會？ 好多讀完出黎面對社會，受唔起壓力，跌樓既跌樓，連見工都要父母安排，連辭職都要父母代打去，呢啲真係考到入大學就好？名成利就？但連基本既禮貌都無，對家長亦然。但多數家長都可以因爲佢成績好而略過。寶具仔女黎架麻。
米媽都不斷思考緊？但黎到今日，我仍然相信就算米媽唔係主流，米仍然係個成日玩既小朋友，但佢會比一般人快樂，堅強。 第時，就算佢無我係度，佢都可以獨立自理照顧到自己，待人接物，一路培養落黎既價值觀同應有既責任感可以令佢對自己既人生同各樣事負責，對自己作為學生，作為子女，作為職員，負責。 我會好放心佢會面對到。
米媽成日都話，小朋友，你只要培養到佢應有既人生價值觀，道德觀，同理心，責任心，禮貌，儲夠愛俾佢，咁樣佢就自自然然行應行既路。
一個咁既小朋友，佢會行錯去邊？佢會差得去邊？
呢套韓劇係講父母同子女。 只要你有小朋友的，你都應該睇下再思考下，雖然未至於去到咁誇張，但可惜呢個確實係現今社會父母同仔女既現象，只係睇幾時深化到一個不歸路。
原本諗住寫一兩句，叫大家睇下，無諗住評論咁多，最後都係愈寫愈將自己既想法講出黎😂😂米媽既思想其實好多時都好批判同嚴肅，不過人大左就習慣收埋唔表達太多。呢個只係個人意見，無話對錯，始終每個人有每個人的育兒方法，都係愛仔女，大家有興趣可以討論下。歡迎轉發
