人生倒轉行（下）
上集：https://bit.ly/3qfee0U
只不過，去到四十五歲，我愈嚟愈迷茫。
嗰年我被「降職」，準確啲講，我係四十六歲先升職升到最高Grade，當我倒帶返到去四十五歲，我嘅職位自然低咗。
最令我痛苦嘅係，我嘅人生軌跡早已喺「前一世」注定，無論我做乜嘢，都改變唔到「未來」。
以前我會進修，但依加我根本唔會得到學位。
我有時寫篇文感慨吓人生，第二日，篇文就消失咗。
我今日送咗花畀老婆，甜言蜜語哄佢開心，第二日佢就唔會有印象，仲會發我脾氣，話我好耐冇哄佢。
一切嘅努力，唔止會化為烏有，仲會「倒退」。
相熟嘅朋友，逐漸倒退番去未混熟、未相識嗰一日。
成就、感情、人哋對我嘅了解，都一步步往後退。
我知道每一個朋友嘅結局，但我唔可以講，講咗都冇人信，有人信都冇意義。
有一次，我實在忍唔住，向老婆講出真相。
講咗半日，老婆都信咗我嘅說話，但第二日，佢又唔記得咗。
或者，我唔應該話老婆「唔記得」，應該話，今日嘅佢，根本冇聽過我喺「未來」講嘅真相。
三十五歲，我決定唔再返工。
工作無法帶畀我滿足感，我又唔需要賺錢，我返工都冇意義。
而我連「辭職」呢個基本動作都做唔到，我只可以每日起身，熄咗部公事電話，然後曠工。
我嘅生活愈嚟愈hea，日日喺屋企打機，就連打機都只可以打即時對戰，唔好話online game，玩單機game都冇得存檔。
老婆有時會鬧我，我有時會哄吓老婆，有時直情懶得理佢。
因為我知道，無論佢有幾嬲，就算佢嬲到同我鬧離婚，只要一過咗十二點，佢都會變番「正常」。
對於唔會失去嘅嘢，我漸漸冇咗抓緊嘅動力。
三十歲、廿九歲、廿八歲……我老婆由「老婆」變成「女友」，再由「女友」變成「我嘅追求對象」。
呢一刻，我先開始恐慌。
原來呢個陪伴咗我一百年嘅女人，係會變到唔愛我。
而我根本冇辦法挽回頹勢，無論我點努力討好佢，佢對我只會一日比一日更陌生，最後變成完完全全嘅陌生人。
廿五歲，我同老婆相識嘅日子。
「你好，我叫Selina。」老婆笑意盈盈咁向我伸出手。
我捉住佢隻手，佢隻手好嫩滑，完全冇嫁畀我之後嘅老繭同皺紋。
嗰一刻，我所有嘅風度瞬間崩潰，淚如雨下。
老婆以為我係變態，好似受驚嘅小鹿咁縮番隻手。
我有啲慌張，我畀佢嘅第一印象咁差，佢會唔會唔鍾意我……但轉念一想，無論佢對我印象係點，聽日我都會變成佢眼中嘅陌生人。
諗到呢度，我好似癲咗咁，我一手攬住老婆，狠狠錫落去。
佢打咗我一巴，其他人拉開我，報咗警告非禮。
當然，第二日就冇咗呢個麻煩，連我臉上嘅巴掌印都消失得無影無蹤。
我愈嚟愈後生，愈嚟愈頹。
去到最後，我變番一個小學生，老師問我有咩夢想。
「我想死。」我下意識答。
所有人都用驚訝嘅目光望住我，但我已經冇動力去回應。
反正，我就算得罪晒成間學校嘅人，聽日都會回復正常。
我愈嚟愈細個，漸漸失去思考嘅能力，我居然有啲慶幸，我即將「死亡」。
我曾經以為，衰老同死亡係人生最痛苦嘅事。
但原來人生最痛，係「無能為力」。
人控制唔到衰老同死亡，所以難過，但如果所有嘢都無力改變，就終將崩潰。
—完—
將專頁設定為「搶先看」/ "See first"，最新故仔馬上睇！
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #人生倒轉行
