每次睇《天若有情》，
心中總係有好多嘅不解，
但同時又會覺得好過癮
—
呢套電影之所以會成為經典，
只因佢嘅情節走向，
純為兩個字服務 ——「浪漫」。
—
究竟乜嘢係浪漫？呢回事其實無關於「男人不壞，女人不愛」。竹門對竹門，木門對木門，並唔浪漫，因為同類型嘅人會走埋一齊，好合理，而要浪漫，寫故事嘅人必須要為人物設計難關，增添激情。
—
《天若有情》，其中一個最令觀眾R頭嘅地方，係男女主角華DEE同JOJO點解會相愛，明明佢哋無溝通過，明明佢哋連對方係個咩人都唔知，點解佢哋會愛到死來活來架呢？而後來突然有一幕戲，我叮一聲明白咗成套戲想講咩。
—
開片、走佬、覆啅、開片、走佬、覆啅，基本上已經講曬成套電影嘅脈絡，華DEE係個非法賽車手，仲係個古惑仔，日日活喺腥風血雨當中，正常不過，而有幕戲講佢又得罪襯家，要走佬走到去澳門。為伊消得人憔悴，17歲嘅JOJO飄洋過海搵華DEE，點知兩個人唔係徹夜纏綿，而係去玩滑翔機。
—
點解去到一個無人搵到佢哋嘅天堂，唔係為勢所迫，兩位主角都硬係要玩啲咁危險嘅嘢呢？因為佢哋嘅關係嘅基礎，就同心理學上經常會提及嘅一個概念有密切嘅關係，而佢就係——「吊橋效應」。
—
「吊橋效應」究竟同愛情有咩關係？對一個人心動嘅時候，你會心跳加速，手心冒汗，個人不斷係咁喺度震，坐立不安。而企喺吊橋上嘅你，其實一樣會有以上嘅生理反應，即使你無愛上任何人。總而言之，喺危險、刺激嘅環境之下，我哋會更容易對身邊嘅人動心，因為你唔知呢啲反應係因為你太驚吖，定係你鍾意咗對方，呢樣嘢就叫做「吊橋效應」。
—
亦所以，《天若有情》唔少情節嘅設定，其實都係依循住「吊橋效應」嘅概念去寫，向觀眾解構何謂「浪漫」。JOJO同華DEE喺背景地位性格上嘅差距，包括窮V.S.富、粗獷V.S.溫柔、古惑仔V.S.乖乖女、為大佬報仇V.S.去外國讀書、綁匪V.S.肉參、忠義V.S.愛情、賽車、劈友，全部都係劇情上為呢兩個「缺愛」嘅人設立嘅難關，兩個世界嘅差距，由佢哋嘅激情所填補。而正正係因為難關，先可以愛得轟烈，配合一次又一次嘅生關死劫，飛車、爆炸、比人追殺，唔需要寫佢哋點樣相處，觀眾已經能夠完全代入到「浪漫愛」嘅處境。
—
天若有情天亦老，月若無恨月常圓。極致嘅「浪漫愛」，其實最後一定會走向自毀之路。可能成日會有人問華DEE有無死，JOJO有無等到老公返嚟。但就算今次無死，喺華DEE勇悍玩命嘅性格之下，下次都總會死，死就係最好嘅處理，係命定，最重要嘅係「愛你無悔」。就好似英文戲名話齋，"A MOMENT OF ROMANCE"，一剎那的浪漫，已足教人肝腸寸斷。
—
生命不需要永恆，
但求一刻燦爛，
人生雖短暫，
無悔共你。
天若有情天亦老月若無恨月常圓 在 天若有情天亦老，月如無恨月常圓。談愛情的淒美心靈系列 的推薦與評價
FB 粉專https://www.facebook.com/%E4%BA%BA%E7%94%9F%E7%A6%AA-666676760420475/# 天若有情天亦老 #愛情的淒美#心靈系列解憂站陳老爹. ... <看更多>