【你有Freestyle嗎】
有一次，小弟去跟一個出名講野極速嘅外科醫生睇門診。
婆婆：「醫生，我…」
醫生：「睇返轉介信話你痾黑屎驗左幾次都話有血係咪呀？」
婆婆：「係呀，我…」
醫生：「咁最近有無肚痛肚痾痾唔出痾爛屎痾血痾黏液體重下跌唔開胃咁呀？」
婆婆：「好似無…」
醫生：「咁你訓上床幫你睇下個肚。」
上左床十秒後。
醫生：「好落返床啦。檢查無痛無剩咁我地都可能要做多些少檢查啦見你對上一次做腸鏡都幾年前想唔想做多次腸鏡胃鏡睇清楚？」
婆婆：「下，又督…」
醫生：「係呀要睇清楚就要辛苦些少啦如果你話年紀太大唔想做都得但係如果有事我地就搵唔到出黎架啦。」
婆婆：「都好，幾廿歲都…」
醫生：「咁可以用電腦掃描睇既但唔係咁準確如果你唔介意比幾千蚊都可以吞粒鏡頭藥丸咁就睇得清楚些少如果可以我就轉介你去內科安排。」
婆婆：「錢唔係問題，係唔想…」
醫生：「我都知做鏡辛苦咁係咪即係唔做鏡比幾千去食藥丸呀？」
婆婆：「嗯，好…」
醫生：「咁我寫返封轉介信你去內科排期陣間出返門口去個邊預約個期呢到係藥紙下次一年後黎搵返我啦咁有無問題嗯好啦無就走得架啦拜拜。」
其實，呢個故事唔好笑。
醫生天生唔識Rap，但每日都要做MC Jin去freestyle。兩個鐘要睇幾十個病人，計返平均，醫生已經「用多左兩分鐘」係呢個病人身上，排後面嘅病人開始唔耐煩，膠層開始話唔夠效率，報紙雜誌開始寫封面故事。
呢個就係醫生角度嘅「基層醫療問題」，望特首大人明鑒。
