最近，一間美國嘅商業顧問公司出咗一份「2021年全球最佳城市」報告，當中荷蘭嘅阿姆斯特丹「只係」排全球第17位。
排頭三圍嘅，分別係英國倫敦，美國紐約，同埋法國巴黎。我哋非常熟悉嘅日本東京、星加坡、西班牙巴塞隆拿，等等都係榜上有名。
令筆者比較驚訝嘅係，俄羅斯都有兩個城市比阿姆斯特丹排得前，包括莫斯科同聖彼得堡。雖然筆者去過俄羅斯幾次，亦都好鍾意呢個地方，但係話呢兩個城市比荷蘭好，就真係有少少驚訝。所以就好認真地睇份報告。
呢份報告，主要用咗六個主要元素去評估城市排名，包括Place，Product，Programming，People，Prosperity 同 Promotion。認真睇，發覺呢一啲評估因素都好難量化，或者全面地比較唔同城市。
例如People，報告就話會睇當地嘅移民數字，同埋有幾多人喺外國出世。出咗名係全歐洲其中一個最多國籍集中地嘅阿姆斯特丹，係呢一方面居然只係排第65 ，莫斯科就排12 ，真係「吓？」出嚟。
另一方面，呢份報告亦都冇考慮到唔同地方嘅法律制度、生活品質、社會福利、貧富差距等等。雖然可以用來作一個參考指標，都好難盡信。
咁香港排第幾呢？根據呢份報告，香港只排第42。
倫敦、紐約、巴黎，呢三個城市係咪真係咁好，就見仁見智啦。雖然我自己就幾鍾意倫敦，但屋企就住咗一個打死唔肯搬返倫敦嘅牛津人。身邊亦都有好多喺倫敦長大嘅朋友，唔願意返英國。所以呢，講到尾都係搵到一個適合自己嘅地方最緊要！
參考資料：https://www.bestcities.org/rankings/worlds-best-cities/
#移民 #移民歐洲 #移民荷蘭 #荷蘭 #西歐 #出國 #留學 #歐洲讀書 #歐洲工作 #歐洲生活 #荷蘭公司 #歐洲公司 #荷蘭生活知多啲 #香港人在荷蘭 #香港人在歐洲
