《第一個早餐》
♂：早晨
♀：早晨
♂：你好返D未啊？
♀：都差唔多喇，仲有少少怪咁囉
♂：我又有個新諗法，不如今個月我地每日都搵d未做過既野做下
♀：你條友……又抽我水！
♂：唔係啊我認真，其實一日做一樣新野，一世人都未必做到好多新野，大部份人都會每日重覆又重覆咁做同一樣野，例如食一樣既早餐，返工做重覆既事，聽同一首歌，玩同一隻遊戲咁
♀：你個人馬座，人生就係不斷尋找新奇刺激既野做
♂：我要強調多次，係我地
♀：好，咁你今日打算做乜新野
♂：我發現我地係未一齊食過早餐既，你起身到出門要幾耐？
♀：半個鐘啦最快
♂：咁我等你半個鐘啦
♀：你係邊
♂：係你樓下喇，你再唔起身我就要係你樓下大叫喇
♀：你個痴線仔
♂：記得要快啊！
♀：多謝你，You really make me day
♂：食左我既秘製早餐，今日做野應該會特別有動力啦
♀：我欣賞你仲扮到好似外賣咁，一開始我真係比你呃到
♂：做戲要做全套嘛！我尋日特登食外賣留低個盒洗乾淨今日用嫁！
♀：咁你今朝幾點起身
♂：六點起左身喇……
♀：傻瓜
♂：點啊，比個評分黎啦
♀：餐蛋麵有分湯，可以加分，炒蛋都唔錯，可以加少少鹽，腸仔都幾有水準，另外最令我驚訝既係你杯奶茶，你真係用茶膽去沖？
♂：奶茶我係外賣買既，邊有可能沖奶茶啊，好大工程呢
♀：頂，仲等我開心左一陣！
♂：有咩咁開心喎
♀：我心諗以後我朝早有杯好奶茶飲，好幸福
♂：唔……咁我去應徵做間茶記既水吧，我學完就可以每日沖比你飲喇
♀：唔好玩啦……你每日去買比我就已經好滿足喇
♂：唔係啊，我認真，尋日我諗左每日同你做一樣新野之外，我自己人生都希望可以體驗唔少新野，我申請左做外賣仔喇，做水吧可以係我下一個目標！
♀：係你既話，當你試左樣新野應該會令你寫到更多唔同既野
♂：係啊，我係會一路做一路諗既人
♀：到時本小姐安排你做我既專屬奶茶大臣！
♂：我有個問題想問你好耐，你想唔想同我一齊住啊？阿豪個邊下個月收樓，個邊夠你同我住
♀：同你同居……我咪好大獲！
♂：反正你都係我既人喇，怕什麼
♀：怕我同你一齊住之後會討厭你，相見好同住難啊先生
♂：既然認真既，怕乜早少少一齊住，可以早一步了解大家嘛
♀：呢樣，你比我考慮下先
♂：咁我訂定雙人床，所有野都買兩份喇
♀：喂……如果我同你住，我想所有野都係我同你一齊決定囉，你點知我習慣訓咩！
♂：好，我比你決定，但你真係要快喇，我再唔買野到時入伙真係要訓地下
♀：家陣你迫我咁話嘛！
♂：小人點敢啊！
♀：同你一齊……真係好開心……但係愈開心我就愈怕有日會有落差
♂：你唔係講過，依家開心咪得咩
♀：可以既，可唔可以令我開心耐d
♂：我……我答應你我一世都會令你開心，好唔好
♀：仆街喇！
♂：咩料啊……駛唔駛講粗口
♀：你呢句野，我竟然有一下子信左……今次真係仆街喇！
♂：你仆街會有我墊住你！
♀：唔得喇，我覺得好唔妥！痴線，我係咁笑，咩料，一陣點開工
♂：今日你要做慘既角色？
♀：咩角色都好啦，都唔係咁笑法囉好唔好，唔同你講喇！我做野！你要掛住我！
♂：我一向都有掛住你囉
♀：蔣艾，我都掛住你
♂：岑雪兒，加油！
♀：哎……我終於收工喇
♂：真係好夜喎你，返到屋企未啊
♀：剛剛返到，頭先經理人送我返黎，一路上都係咁講公事……
♂：咁你好好沖個涼訓個覺，聽日我地再搵樣新野做！
♀：我地一齊食過午餐下午茶同晚餐喎，你唔可以再用食飯呢招！
♂：放心，我諗好左喇，哈哈
♀：頂……我好似有少少驚
♂：乖，我會就住你既，晚安喇，你早少少訓啦
♀：好啦，晚安
——
第二部的最終回見面版已上載Patreon，連結
https://www.patreon.com/posts/chang-qing-bu-di-56476445?utm_medium=clipboard_copy&utm_source=copy_to_clipboard&utm_campaign=postshare
四條仔去Staycation的上篇都在patreon可以觀看
今晚會上載埋中篇 響30
#長傾不見 #蔣薇 #小說 #故事 #好久不見
未睇過既重頭睇：
https://www.patreon.com/maydreaming/posts?filters[tag]=長傾不見&sort=published_at
唔好玩啦 在 唔該你唔好玩啦！ - YouTube 的推薦與評價
唔該你唔好玩啦！ 1,543 views1.5K views. Sep 22, 2022. 7. Dislike. Share. Save. Yuen Ho Leung. Yuen Ho Leung. 19 subscribers. Subscribe ... ... <看更多>